މިހާތަނަށް ބޭއްވި ކޮންމެ ނޫސްވެރިންގެ ބައްދަލުވުމެއްގައި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ ވާހަކަ އެހާ ގިނައިން ދައްކަވަނީ އެއްވެސް ގޮތަކަށްވެސް ޗެލެންޖަކަށް ވެގެން ނޫންކަމަށް އެމްޑީޕީގެ ރިޔާސީ ކެންޑިޑޭޓްގެ ތަރުޖަމާނު މާރިޔާ އަޙްމަދު ދީދީ ވިދާޅުވެއްޖެއެވެ.

ކޮންމެ ދުވަހަކު ބާއްވާ ނޫސްވެރިންގެ ބައްދަލުމުގެ ބޮޑުބައި މާރިޔާ ހޭދަކުރައްވަނީ ޑރ.މުއިއްޒުއަށް ފާޑު ވިދާޅުވުމަށާއި، ކުރީ ސަރުކާރުގެ ސިޔާސަތުތަކަށް ފާޑުވިދާޅުވުމަށެވެ. މާރިޔާ ކޮންމެ ދުވަހަކު މިގޮތަށް ކަންކަން ކުރައްވާތީ ނޫސްވެރިޔަކު ވަނީ ރައީސް ޞާލިހަށް އޮތް އެންމެ ބޮޑު ޗެލެންޖަކީ ޑރ.މުއިއްޒުތޯ ސުވާ ކުރައްވާފައެވެ.

މިސުވާލުގެ ޖަވާބުގައި މާރިޔާ ވިދާޅުވީ ޑރ.މުއިއްޒުގެ ވާހަކަ އެހާ ގިނައިން ދައްކަވަނީ އެއްވެސް ހާލެއްގައި ޖެލެންޖަކަށް ވެގެން ނޫންކަމަށެވެ. މުއިއްޒުގެ ވާހަކަ ދައްކަވަނީ ކަންކަން ހިނގާފައިވާ ގޮތް ހާމަކޮށްދޭނެކަމަށެވެ. މާރިޔާ މިހެން ވިދާޅުވިއިރު ޑރ.މުއިއްޒު ފިޔަވައި އިތުރު އެހެން އެއްވެސް ކެންޑިޑޭޓެއްގެ ވާހަކަ މިހާތަނަށް މާރިޔާ ދައްކަވާފައި ނުވެއެވެ.

ކޮންމެހެން މުއިއްޒު އެއީ ޗެލެންޖަކަށް ވެގެން އަޅުގަނޑުމެން ދައްކާ ވާހަކައެއް ނޫން.

– މާރިޔާ ވިދާޅުވިއެވެ.

މާރިޔާ ވިދާޅުވީ ޑރ.މުއިއްޒުއަކީ ރައީސް ޔާމީންގެ ވެރިކަމުގައި ރައީސް ޔާމީނާއި ވަރަށް އަރިސްކޮށް އުޅުއްވި ބޭފުޅަކަށްވުމުން އޭރުގެ ކަންކަން ހިނގާދިޔަ ގޮތް އެންމެ ބޮޑަށް އެނގޭނެ ބޭފުޅަކީ މުއިއްޒު ކަމަށެވެ.

ފެށުނީއްސުރެ އަޅުގަނޑުމެން ނިކުތީ ވާދަވެރި ސިޔާސީ ޕާޓީތަކެއް އޮވެގެން މަލްޓި ޕާޓީ ޑިމޮކްރަސީއެއްގެ ތެރެއިން މަސައްކަތް ކުރުމަށް. ދެން މިފަހަރު ޕީޕީއެމްއެއް ނުއެއް ނިކުމޭ. އެކަމަކު ޕީއެންސީގެ ފިލޯސަފީ އަކީ ޕީޕީއެމްގެ އެންމެ ގާތް ވިސްނުމަށް ވެފަ، މުއިއްޒުއަކީ ރައީސް ޔާމީނުގެ ހައުސިން މިނިސްޓަރުކަމާއި ވަޒީރުންގެ މަޖިލީހުގައި އިންނަވާ ރައީސް ޔާމީންގެ ހުރިހާ ކަމަކާއި އޭރު އެއްބައިވެ ވާގިވެރިވާ ބޭފުޅަކަށް ވާއިރު އެވާހަކަތައް ނުދައްކާ އަޅުގަނޑުމެންނަށް ކުރިއަށް ދެވޭކަތް ނެތް.

– މާރިޔާ ވިދާޅުވިއެވެ.

މާރިޔާ ވަނީ މިއަދުގެ ނޫސްވެރިންގެ ބައްދަލުވުމުގައި ރިޔާސީ އިންތިޚާބުގައި ވާދަކުރައްވާ ކޮންމެ ކެންޑިޑޭޓަކަށްވެސް ކެމްޕޭން ކުރުމުގެ ފުރުސަތު ދެއްވަން ވާނެކަމަށް ވިދާޅުވެފައެވެ. ވަކި ސިޔާސީ ޕާޓީއަކަށް ނިސްބަތްވީތީ ނުވަތަ ވަކި ފިކުރެއްގެ ބޭފުޅަކަށްވީތީ ކެމްޕޭން ކުރުމަށް ލިބޭ ފުރުޞަތަށް އެއްވެސް ފަރާތަކުން ހުރަސް އަޅުއްވައިގެން ނުވާނެކަމަށް މާރިޔާ ވިދާޅުވިއެވެ.