ކުރިއަށް އޮތް ރިޔާސީ އިންތިހާބު ކާމިޔާބުކޮށް ވެރިކަމަށް ވަޑައިގެންފި ނަމަ، ވ. އަތޮޅުގައި ޕިކްނިކް އައިލެންޑެއް ގާއިމުކޮށް ދެއްވާނެ ކަމަށް އިދިކޮޅު/ޕީޕީއެމްގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވައުދުވެވަޑައިގެންފިއެވެ.
ވ. އަތޮޅުގެ ރަށްތަކަށް މުއިއްޒު ފެއްޓެވި ދަތުރުގައި ފުލިދު އަށް ވަޑައިގެން މުއިއްޒު ވިދާޅުވީ ރަށުގެ ރައްޔިތުންނާއި އަތޮޅުގެ ރައްޔިތުންނާއި އެހެން ރަށް ރަށުގެ މީހުން ދަތުރު ދާން ޕިކްނިކް އައިލެންޑެއް ތަރައްގީ ކުރުމަކީ މުހިންމު ކަމެއް ކަމަށެވެ. އެގޮތުން ތަނެއް ހިއްކައިގެން ވިޔަސް، ނޫނީ ފިނޮޅެއްގައި ޕިކްނިކް އައިލެންޑެއް ތަރައްގީ ކުރުމަކީ އިގްތިސާދު ކުރިއަރާނެ ކަމެއް ކަމަށް އޭނާ ވިދާޅުވިއެވެ.
އެހެންވެ، އެންމެ ރަނގަޅު ދިމާލެއްގައި ޕިކްނިކް އައިލެންޑެއް ތަރައްގީ ކުރައްވާނެ ކަމަށް ވިދާޅުވިއެވެ.
މުއިއްޒު ވިދާޅުވި ގޮތުގައި ކުރީގެ ރައީސް ޔާމީންގެ ވެރިކަމުގައި 108 ރަށެއްގެ ބަނދަރު ވަނީ ހަދައިފައެވެ. އެހެންވެ، އެ ރަށުގެ ބަނދަރު ވެސް ހަދައި ރައްޔިތުންނަށް ފަސޭހަ ކަން ލިބޭ ގޮތް ހެދުމަކީ ރައްޔިތުންނަށް ދެއްވާ ޔަގީން ކަމެއް ވެސް މުއިއްޒު ވިދާޅުވިއެވެ.
އެ ރަށުގެ ބިން ހުސްވުމާ ގާތްވެފައި އޮތް އިރު، 20 ގެވަޅު ދިނީމަ، ރަށުގެ ބިން ހުސްވެގެންދާ ކަމަށް ވެސް މުއިއްޒު ވިދާޅުވިއެވެ. ބިން ހިއްކުމަކީ ވަރަށް ހަރަދު ހިނގާ ކަމަކަށްވާ އިރު، އިގްތިސާދުކޮށްގެން ކުރިއަށް ގެންދިޔައީމަ، ސަރުކާރަށް އޭގެ ބުރަ ކުޑަވާނެ ކަމަށް ވެސް މުއިއްޒު ވިދާޅުވިއެވެ.
މުއިއްޒު ވިދާޅުވި ގޮތުގައި ރަށް ކުރިއަރަން އޮތީ ބިން ހިއްކައިގެންނެވެ. އެހެންވެ، މި އަތޮޅުގެ ބިން ހިއްކަން ކަނޑައަޅާފައިވާ ރަށްތަކުގެ ތެރެއިން އެ ރަށް ހިމަނައިގެން ފުލިދޫ ރައްޔިތުންނަށް ބޭނުންވާ ބިން ހިއްކުމުގެ މަސައްކަތް ކުރިއަށް ގެންގޮސް ދެއްވާނެ ކަމަށް ވެސް މުއިއްޒު ވިދާޅުވިއެވެ.
