ބޮޑު ކަންނެލި ގަންނަ އަގު ބޮޑުކޮށް، މަސްވެރިން ތެލަށް ކުރާ ބޮޑު ޚަރަދު ކުޑަކޮށްދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މުލަކުގައި ބޭއްވި ޖަލްސާގައި ޑރ.މުއިއްޒު ވިދާޅުވީ ބޮޑުކަންނެލީގެ މަސްވެރިކަން އިތުރަށް ކުރިއެރުވުމަށްޓަކައި، ބޮޑު ކަންނެލި މިފްކޯއިން ގަންނަން ފައްޓަވާނެ ކަމަށެވެ. އަދި ބޮޑު ކަންނެލީގެ އަގު ވަކި މިންގަނޑެއްގައި ހިފަހެއްޓެވުމަށް މަސައްކަތްކުރައްވާނެ ކަމުގައިވެސް ޑރ.މުޢިއްޒު ވިދާޅުވިއެވެ.
އެގޮތުން ބޮޑު ކަންނެލި ގަންނަ އަގަކީ ކިލޯއެއް 80 ރުފިޔާއަށް ކަމުގައި ކަނޑައަޅުއްވާނެ ކަމަށާއި، އަދި އޭ ގުރޭޑު ކަންނެލި ގަންނަ އަގަކީ 100 ރުފިޔާކަމަށް ކަނޑައަޅުއްވައި ނިންމަވާނެ ކަމުގައިވެސް ޑރ.މުޢިއްޒު ވިދާޅުވިއެވެ.
އޭގެ އިތުރަށް މަސްވެރިންނަށް ޑީސަލާއި ޕެޓްރޯލު މިހާރު ވިއްކަމުންދާ އަގަށްވުރެ ހެޔޮ އަގުގައި ޕެޓްރޯލު އަދި ޑީސަލް ލިބޭނެ ގޮތް ފަހިކުރައްވައި އެކަމުގެ ޚާއްޞަ ސިޔާސަތުތަކެއް ތަންފީޒުކުރައްވާނެ ކަމުގައި ޑރ.މުޢިއްޒު ވިދާޅުވިއެވެ. މިކަންކަން ހާސިލުކުރަން ކުރަންޖެހޭ މަސައްކަތްތައް ގިނަކަން ފާހަގަކުރައްވައި ޑރ.މުޢިއްޒު ވިދާޅުވީ އެކަންކަން ހާސިލުކުރުމަށް ކުރަންޖެހޭ ހުރިހާ މަސައްކަތްތަކެއް އޭނާގެ ވެރިކަމެއްގެ ފުރަތަމަ ދުވަހުން ފެށިގެއ ްކުރައްވާނެ ކަމަށެވެ.
މުއިއްޒު ވަނީ މަސްވެރިންގެ ކޯޕަރޭޓް ސޮސައިޓީއެއް ޤާއިމުކުރައްވައި އެ ކޯޕަރޭޓިވް ސޮސައިޓީގެ ހިއްސާ މިފްކޯގައި އޮންނަ ގޮތަށް ކަނޑައަޅުއްވައި، އެ ހިއްސާގެ ސަބަބުން މިފްކޯއިން ދީދާ ގޮތުގައި މަސްވެރިންނަށް ބޭރު ފައިސާއިން ފައިދާ ލިބޭނެ އިންތިޒާމު ހަމަޖައްސަވާނެކަން ނިލަންދޫގައި އޮތް ޖަލްސާގައި އޭނާވަނީ އިއުލާނުކުރައްވާފައެވެ.
