އުފާވެރި އަންހެނުން "ޓީ ވިތް އިބޫ" މިއަދު ހަވީރު ބާއްވަން ހަމަޖެހިއްޖެއެވެ.
މިއީ އެމްޑީޕީގެ އަންހެނުންގެ ރޫހާއި، އެމްޑީއޭ އަދި އަދާލަތުގެ އަންހެނުންގެ ކައުންސިލްގެ ފަރާތުން ބާއްވާ އުފާވެރި އަންހެނުން "ޓީ ވިތް އިބޫ" އިވެންޓެވެ. މިއީ އެމްޑީޕީއާއި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް، އިބްރާހިމް މުހައްމަދު ޞާލިހާއެކު، މި 3 ޕާޓީގެ އަންހެނުންނާއި އެމަނިކުފާނުގެ ސަޕޯޓަރުންނަށް ހާއްސަކޮށްގެން ބޭއްވޭ ސަޔެކެވެ.
މި އިވެންޓާއި ގުޅޭގޮތުން އެމްޑީޕީގެ އަންހެނުންގެ ރޫހުން ބުނީ މި އިވެންޓަކީ ރައީސް ޞާލިހުގެ ސަރުކާރުގެ 5 އަހަރުގެ ކާމިޔާބީ އަދި ކުރިއަށް އޮތް 5 އަހަރަށް އަންހެނުންގެ އޮތް އުއްމީދު ފާހަގަކުރުމުގެ ގޮތުން ބާއްވާ އިވެންޓެއް ކަމަށެވެ.
މި އިވެންޓް ކުރިއަށްދާއިރު، ލައިވް މިއުޒިކާއި އަންހެން ބޮޑުބެރު ގްރޫޕެއްގެ ހަރަކާތްތައް ހިމެނިގެންދާނެއެވެ. މި އިވެންޓަކީ މުޅި ރާއްޖޭގައި އެއްވަގުތެއްގައި ކުރިއަށްދާ އިވެންޓެކެވެ. އެގޮތުން އެމްޑީޕީ، އެމްޑީއޭ އަދި އަދާލަތު ޕާޓީގެ ހުރިހާ ހަރުގެއެއްގައި މި އިވެންޓް ކުރިއަށްދާނެ ކަމަށާއި، މި އިވެންޓުގައި ސައި އޮވެފައި މާލޭގައި ރައީސް ބައިވެރިވާ އިވެންޓު، އެހެން ހަރުގެތަކުގައި ލައިވްކުރެވިގެންދާނެ ކަމަށެވެ.
މިއިވެންޓުގައި ރައީސް ވާހަކަ ދައްކަވާނެކަމަށް އަންހެނުންގެ ރޫހުން ބުނި ނަމަވެސް ރޯގާގެ ސަބަބުން ރައީސް ވަނީ އއ.އަތޮޅަށް ކުރެއްވި ދަތުރުފުޅު ކުރުކޮށް ލުމަށްފަހު މާލެ ވަޑައިގެންފައެވެ.
