ރާއްޖޭގެ އެކި ކަންކޮޅުތަކުގައި ދިމާވާ ޞިއްޚީ ކުއްލި ކަންކަމުގައި އަވަސް ފަރުވާ ދިނުމަށް އެއާ އެމްބިއުލާންސްގެ ޚިދުމަތް ތަޢާރަފްކޮށް، ދަރިމައިވުމުގެ މައްސަލައިގެ ހައްލު ކަމުގައިވާ އައިވީއެފްގެ ޚިދުމަތް އާސަންދަ ތެރެއިން ކަވަރު ކުރެވޭނެ މަގު ފަހިކޮށް ދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ކުޑަހުވަދޫގައި މިރޭ ބޭއްވި ކެމްޕޭން ޖަލްސާގައި މުއިއްޒު ވިދާޅުވީ ރާއްޖޭގެ ސިއްޚީ ނިޒާމަށް ހެޔޮ ބަދަލު ގެނެސް ދެއްވުމަށް ރައީސް ޔާމީން ފެއްޓެވި މަސައްކަތް މިސަރުކާރު އައިފަހުން އޮތީ ވަޅު ޖެހިފައިކަމަށެވެ. ސިއްޚީ އަވަސް ފަރުވާ ދެވޭނެ އިންތިޒާމުތަކާއި، ރާއްޖެއިން މިހާރު ކޮންމެހެން ލިބެންޖެހޭ ބޭސްފަރުވާ ލިބެން ނެތުމަކީ ރައްޔިތުންގެ އޮތް ބޮޑު ކަންބޮޑުވުމެއްކަމަށެވެ.
މީގެ ތެރެއިންވެސް މުއިއްޒު ވަނީ ސިއްޚީ އަވަސް ފަރުވާ ދިނުމަށް އެއްރަށުން އަނެއް ރަށަށް މީހުން އުފުލަށް ރައީސް ޔާމީން ތަޢާރަފް ކުރެއްވި ސީ އެމްބިއުލާންސްގެ ޚިދުމަތް މިސަރުކާރުން ވެރިކަމަށް އައިސް އެންމެ އެދެވޭ ގޮތުގައި ނުދެވޭކަން ފާހަގަ ކުރައްވާފައެވެ. މުއިއްޒު ވިދާޅުވީ މިޚިދުމަތް އިތުރަށް ފުޅާ ކުރުމަށް ވެރިކަމާއި ހަވާލު ވުމަށްފަހު އެއާ އެމްބިއުލާންސެއް ތަޢާރަފްކޮށް ޚިދުމަތް ދޭން ފައްޓަވާނެކަމަށެވެ.
އެކަން އަޅުގަނޑުމެން އިރާދަކުރެއްވިއްޔާ ކުރިއަށް ގެންދާނަން. ބަލި މީހުން އެ ތަނުން އަނެއް ތަނަށް އުފުލާނަން. އެކަން ކުރާނީ ސީޕްލޭންއެއް މެދުވެރިކޮށް. މިކަން ކާމިޔާބު ވެއްޖެނަމަ އިތުރު ފްލީޓެއްވެސް މިކަމަށް ޚާއްސަ ކުރެވޭނެ.
– މުއިއްޒު ވިދާޅުވިއެވެ.
މީގެ އިތުރުން ރާއްޖޭގައި ދަރިމައިވުމުގެ މައްސަލަ އަށް ހައްލު ހޯދުމަށް އައިވީއެފްގެ ޚިދުމަތް ހޯދުމަށް އާންމު ރައްޔިތުންގެ އަތުން ދާ ޚަރަދުތަކަށް ނިމުން ގެނައުމަށް އެޚިދުމަތަކީ އާސަންދަ ތެރެއިން ފޯރުކޮށްދެވޭ ޚިދުމަތަކަށް ހަދާނެކަމަށް މުއިއްޒު ވިދާޅުވިއެވެ.
މިރޭގެ ޖަލްސާގައި މުއިއްޒު ވަނީ ކުޑަހުވަދޫއަށް ރައީސް ޔާމީން ގެނެސް ދެއްވި ތަރައްޤީ މިސަރުކާރުގެ މިވީ ފަސް އަހަރު މަޑުޖެހިފައިވާކަން ފާހަގަކުރައްވާފައެވެ. އަދި ޕީޕީއެމްގެ ދެން އުފެދޭ ވެރިކަމެއްގައި ރައީސް ޔާމީން ކުޑަހުވަދުއަށް ގެނެސްދެއްވި ތަރައްޤީ ހުއްޓުމެއްނެތި ކުރިއަށްދާނެކަމުގެ ޔަގީންކަން މުއިއްޒު ވަނީ ދެއްވާފައެވެ. އަދި މުޅި ރާއްޖެ ތަރައްޤީ ކުރުމަށް ރައީސް ޔާމީން ފެއްޓެވި މަސައްކަތްޕުޅަށް އިންގިލާބީ ބަދަލު އެމަނިކުފާނުގެ އިރުޝާދާއިއެކު ގެނެސްދެއްވާނެކަމަށް މުއިއްޒު ވިދާޅުވިއެވެ.
