ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އައި ބްރެޒިލްގެ ފޯވާޑް ނޭމާ ޖޫނިއާ، ސައުދީ ޕްރޯ ލީގުގެ އަލް ހިލާލަށް ސޮއިކޮށްފިއެވެ.
އުމުރުން 31 އަހަރުގެ ކުޅުންތެރިޔާ އަލް ހިލާލަށް ސޮއިކޮށްފައި ވަނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި މަޑު ކުރާނެ އެވެ. އެއްބަސްވުމުގެ މުއްދަތު ހަމަވި ނަމަވެސް، އިތުރު އެއް އަހަރަށް އެއްބަސްވުން އައުކުރުމުގެ މާއްދާ ފަހުން ވަނީ އުނިކޮށްފަ އެވެ. އެއީ އެ މާއްދާ އުނިކުރުމަށް ނޭމާގެ ފަރާތުން ބޭނުންވުމުންނެވެ.
އެހެންކަމުން، ދެ އަހަރު ފަހުން ނޭމާ އެ ކުލަބު ދޫކޮށް އެހެން ކުލަބަކަށް ބަދަލުވުމުގެ ފުރުސަތު ބޮޑެވެ. ޕީއެސްޖީ އާއެކު ނޭމާ ސޮއިކޮށްފައި އޮތް އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ. އަލް ހިލާލުން މުސާރައިގެ ގޮތުގައި ނޭމާ އަށް ގާތްގަނޑަކަށް 300 މިލިއަން ޑޮލަރުގެ އަދަދެއް ދޭނެ އެވެ. ނަމަވެސް އިތުރު އެހެން އިނާޔަތްތަކާއެކު އެ އަދަދު 400 މިލިއަން ޑޮލަރަށް އެރުން ގާތް ކަމަށް މީޑިއާ ރިޕޯޓުތައް ބުނެ އެވެ. އެ ކުލަބުގައި ވެސް ނޭމާ ބޭނުންކުރާނީ 10 ނަންބަރު ޖާޒީ އެވެ.
ސައުދީ ލީގު ވަރުގަދަ ކުރުމަށް ޔޫރަޕޫން ބޮޑު އަގުގައި ކުޅުންތެރިން ގަނެފައިވާއިރު, ސައުދީގެ އަލް ހިލާލުން ދާދި ފަހުން ވަނީ ޕީއެސްޖީއަށް ކުޅެމުން އަންނަ ފުރާންސްގެ ކިލިއަން އެމްބާޕޭ ހޯދުމުގެ މަސައްކަތްވެސް ކޮށްފައެވެ. ދުނިޔޭގެ ރެކޯޑު އަގެއް އޭނާ އަށް ހުށައެޅި ނަމަވެސް އެމްބާޕޭ ވަނީ ޕީއެސްޖީގައި މަޑު ކުރަން ނިންމާފައެވެ.
މީގެ ހަ އަހަރު ކުރިން ސްޕެއިންގެ ބާސެލޯނާއިން ރެކޯޑު އަގެއްގައި ޕީއެސްޖީއަށް ބަދަލުވި ނޭމާ ވަނީ އެކުލަބާއި އެކު ގިނަ ކާމިޔާބީ ތަކެށް ހޯދާފައެވެ. އެގޮތުން ލީގު 1 ފަސް ފަހަރު ވަނީ ކާމިޔާބުކޮށްފައެވެ. އަދި ޗެމްޕިއަންސް ލީގުގެ ރަނަރަޕް އެއްފަހަރު ހޯދާފައިވާ އިރު, ކޮއުޕް ޑީ ފުރާންސް ތިން ފަހަރު ވަނީ ހޯދާފައެވެ. މީގެ އިތުރުން ޕީއެސްޖީއަށް ކުޅެދިން 112 މެޗުން 82 ގޯލު ވަނީ ކާމިޔާބުކޮށްފައެވެ.
