ހުވަދު އަތޮޅަށް ކުރެއްވި ރިޔާސީ ކެމްޕެއިން ދަތުރުފުޅުގައި ފެނިވަޑައިގަތީ ރައީސް އިބްރާހިމް މުހައްމަދު ސޯލިހަށް ތާއީދު ނެތް މަންޒަރު ކަމަށާއި ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބް، ދެވަނަ ބުރު ކަށަވަރު ކުރައްވާފައިވާ ކަމަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު މިރޭ ވިދާޅުވެއްޖެއެވެ.
ދަ ޑިމޮކްރެޓްސްގެ މެނިފެސްޓޯ ލޯންޗު ކުރުމަށް ސަލްޓަން ޕާކްގައި ބޭއްވި ޖަލްސާގައި ނަޝީދު ވިދާޅުވީ އަންނަ މަހުގެ 9 ގައި އޮންނަ ރިޔާސީ އިންތިހާބުގައި އިލްޔާސް ލަބީބާއި އޭނާގެ ރަނިންމޭޓު ހުސެއިން އަމްރު ދެވަނަ ބުރަށް ދާނެ ކަމާ މެދުގައި ޝައްކު ވެސް ނުކުރައްވާ ކަމަށެވެ.
ހުވަދު އަތޮޅުގެ 10 ވަރަކަށް ރަށަށް ވަޑައިގެންނެވި އިރު، ކޮންމެ ރަށަކުން އިލްޔާސް މަދުވެގެން 50 ގެއަށް ވަޑައިގަންނަވާ ކަމަށް ނަޝީދު ވިދާޅުވިއެވެ. އަދި އެމަނިކުފާނު 25 ޕީޕީއެމް ގެއަށް ވަޑައިގަންނަވާ ކަމަށް ވެސް ނަޝީދު ވިދާޅުވިއެވެ.
"އިލްޔާސް ކޮންމެ ރަށަކުން ވެންނެވި 50 ގެއަކާއި އަޅުގަނޑު ވަތް ގެއާ އެކީގައި އެވްރެޖް ގޮތެއްގައި ރައީސް ސޯލިހަށް ވޯޓު ދޭނެ ކަމަށް ރަށަކުން ބުނަނީ ދެ ގެ. އަޅުގަނޑު ވަރަށް ތެދަށް މި ދަންނަވަނީ،" ނަޝީދު ވިދާޅުވިއެވެ.
ނަޝީދު ވިދާޅުވީ މި ހިސާބުތަކާ އެކީގައި ރައީސް ސޯލިހް އެ އުޅުއްވަނީ ގާތްގަނޑަކަށް %20 ގައި ކަމަށެވެ. އެމަނިކުފާނަށް ފެނިވަޑައިގަންނަވާ ތަނުގައި ދަ ޑިމޮކްރެޓްސް އިން މިތިބީ އެމްޑީޕީގެ ކެންޑިޑޭޓަށް ވުރެ ތަންކޮޅެއް މަގްބޫލްކަން ހޯދައިގެން ކަމަށް ނަޝީދު ވިދާޅުވިއެވެ.
"އަޅުގަނޑު ދެކޭ ގޮތުގައި މި އިންތިހާބު އަޅުގަނޑުމެން ކާމިޔާބު ކުރާނެ،" ނަޝީދު ވިދާޅުވިއެވެ.
ކޮމެންޓު ފޮނުވާ