ވެރިކަމާއި ހަވާލުވުމަށްފަހު ޚިދުމަތް ކުރާނީ އެއްވެސް ސިޔާސީ ފިކުރަކަށް ބެލުމެއްނެތި އިންސާފާއި ހަމަހަމަ ކަމާއިއެކުގައި ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ހއ.އަތޮޅަށް ކުރައްވާ ދަތުރުފުޅުގައި މިއަދު ކެލާއަށް ވަޑައިގެން ރައްޔިތުންނާއި މުޚާތަބު ކުރައްވަމުން ޑރ.މުއިއްޒު ވިދާޅުވީ ޤައުމަށް ތަރައްޤީއާއި ކުރިއެރުން ގެނެވޭނީ ސިޔާސީ ޚިޔާލް ތަފާތުވުން ދުރުކޮށް، ހަމަޖެހުމާއި އަދުލު އިންސާފު ގާއިމް ކުރެވިގެން ކަމަށެވެ. ރައްޔިތުންނަށް ޚިދުމަތް ދެއްވުމުގައި އަބަދުވެސް އިސްކުރާނީ ހަމަހަމަކަން ކަމަށް މުއިއްޒު ވިދާޅުވިއެވެ.
އަޅުގަނޑުމެން ހުރިހާ ރައްޔިތުންގެ އަޑު އަހައި ޚިދުމަތް ދޭނީ އެއްވެސް ތަފާތު ކުރުމެއްނެތި. ވަކިފިކުރަކަށް ވަކި ސިޔާސީ ޕާޓީއަކަށް ނިބަތްވީތީ ޚިދުމަތް ނުދޭ ސަގާފަތެއް ނޯންނާނެ. ރާއްޖޭގައި ހަމަޖެހުން ގާއިމް ކުރަންޖެހޭ. އަދުލު އިންސާފު ގާއިމްކޮށް އަނިޔާވެރިކަން ނިމުމަކަށް އަންނަންޖެހޭ. އަނިޔާއާއި ބަދަލު ހިފުން ނިމުމަކަށް ގެނެސްގެން ނޫނީ ކަންކަން އިސްލާހެއް ނުވާނެ.
– މުއިއްޒު ވިދާޅުވިއެވެ.
މުއިއްޒު މިއަދު ކެލާއަށް ވަޑައިގެންނެވުމުން އެމްޑީޕީއަށް ނިސްބަތްވާ މަދު ބަޔަކު ވަނީ އަޑު އުފުލާފައެވެ. މުއިއްޒު ވިދާޅުވީ ޚިޔާލް ފާޅުކޮށް ޝުއޫރު ފާޅުކުރުމުގެ ފުރުސަތު އޮންނާނެ ކަމަށެވެ. އެކަން ކުރުމުގައި އެއްވެސް ތަފާތެއް ނެތި ކޮންމެ ރައްޔިތަކަށް ޝުއޫރު ފާޅުކުރުމުގެ ފުރުސަތު އޮންނަން ޖެހޭނެކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ ރައްޔިތުންގެ ކައިރިއަށް ވެރިކަން ހޯދަން އަންނަ ފަދައިން ވެރިކަން ލިބުމަށްފަހުވެސް ކަންކަން ކުރުމަށްޓަކައި ރައްޔިތުންގެ މަޝްވަރާ ހޯދުމަށް ރައްޔިތުން ކައިރިއަށް އަންނާނެކަމަށެވެ.
ވެރިކަން ކުރުމުގެ ފުރުސަތު ހޯދަންވެސް މިއަންނަނީ ރައްޔިތުން ކައިރިއަށް. ވެރިކަން ލިބުމުންވެސް އަންނާނީ ރައްޔިތުން ކައިރިއަށް. ރައްޔިތުންގެ ޚިޔާލާއި މަޝްވަރާގެ މަތީން ކަންކަން ކުރާނީ. އަޅުގަނޑު މާލެ ސިޓީ ކައުންސިލަށް ހޮވުނު ފަހުންވެސް މަސައްކަތް ކުރީީ ހަމަ މިމަގުން.
– މުއިއްޒު ވިދާޅުވިއެވެ.
މުއިއްޒު ވަނީ މިޖަލްސާގައި ކެލާ ރައްޔިތުން އެދުނު ކަންކަން ކޮށްދެއްވާނެކަމުގެ ޔަގީންކަން ދެއްވާފައެވެ. އަދި ކެމްޕޭން ކުރުމަށް ލިބިފައި އޮތް ކުޑަ ދުވަސްކޮޅުގައި ރާއްޖޭގެ މީހުން ދިރިއުޅޭ ކޮންމެ ރަށަކަށް ވަޑައި ނުގެންނެވުނު ނަމަވެސް ކޮންމެ ރަށެއްގެ ކޮންމެ ރައްޔިތަކު އެދޭ ކަންކަން ހާސިލް ކޮށްދެއްވުމަށް ކުރެވެން އޮތް ހުރިހާ މަސައްކަތެއް ކޮށްދެއްވާނެކަމަށް މުއިއްޒު ވިދާޅުވިއެވެ.
