ދިވެހި ރައްޔިތުން މިސަރުކާރު ބަދަލު ކުރަން ނިންމައިގެން ތިބީ އިތުރު ބުރަކަށްނުގޮސް، އެއްބުރުން އިންތިޚާބު ކާމިޔާބުކުރުމަށް ކަމުގައި އިދިކޮޅު ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ގިނަ އަދަދެއްގެ ރައްޔިތުންނާއިއެކު މިރޭ ބޮޑު ތިލަދުންމަތީގެ އާބާދީބޮޑު ދިއްދޫގައި ބޭއްވި ބޮޑު ޖަލްސާގައި ވާހަކަ ދައްކަވަމުން ޑރ.މުއިއްޒު ވިދާޅުވީ މިސަރުކާރަށް ދިވެހި ރައްޔިތުން މާކުރިން ނޫނެކޭ ބުނެފިކަމަށެވެ. ބޮޑުތިލަދުންމައްޗަށް ކުރި ދަތުރުގައި ސާފުވެގެން ދިޔަ މަންޒަރަކީ އެއްބުރުން މިސަރުކާރަށް ނޫނެކޭ ބުނާތަންކަމަށް މުއިއްޒު ވިދާޅުވިއެވެ.
މިއިންތިޚާބުގައި ބައިވަރު ބުރުތަކަށް ދާން ނަހަދާށޭ. އެންމެން އެކަތިގަނޑަކަށް އަރައި އަޅުގަނޑުމެން އަޅުގަނޑުމެންގެ ރާއްޖެ ހޯދަން ހިނގާށޭ. އެއީ ދިވެހިންގެ މިނިވަންކަމާއި ސިޔާސަދަތާއި އިސްތިގުލާލު ސަލާމަތްކުރާނެ ރާއްޖެ. އެކަން ކުރުމަކީ ވަތަނީ ޤައުމީ ވާޖިބަކަށް ހަދަންޖެހޭ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ދިއްދޫގައި މިސަރުކާރުން ފެށި އެއްވެސް މަސައްކަތެއް ނުނިމި ރައްޔިތުން މާޔޫސް ވެފައިވާކަމަށެވެ. މިމަންޒަރަކީ ދިއްދޫއިން އެކަނި ފެނުނު މަންޒަރެއް ނޫންކަމަށާއި، ހުރިހާ ރަށެއްގައިވެސް ކަންކަން ހުރީ މިހެންކަމަށެވެ. މަގު ހެދުމުގެ ނަމުގައި ބޮޑެތި އަދަދުތަކުން ފައިސާ ދިނުމަށްފަހު މަގު ބުރިތައް ރަށްރަށުން ފެންނަ ކަމީ ބޮޑު އިހުމާލެއްކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ ތަރައްޤީވެސް އަދި ރައްޔިތުން އުންމީދު ބަދަލެއްވެސް މިސަރުކާރަށް ނުގެނުނު ކަމަށެވެ.
ސަލާމަތީ ބާރުތަކަށް މުއިއްޒު ވަނީ އުންމީދީ މެސެޖުތަކެއް ދެއްވާފައެވެ. މުއިއްޒު ވިދާޅުވީ މިސަރުކާރުން ވަނީ ސަލާމަތީ ބާރުތައް ވަރަށް ބޮޑަށް ސިޔާސީ ކޮށްފައިކަމަށެވެ. ނަމަވެސް ވެރިކަމާއި ހަވާލުވުމަށްފަހު، ސަލާމަތީ ބާރުތަކަށް ވަދެފައި އޮތް ސިޔާސީ ނުފޫޒުން މިނިވަންކުރުމަށް ޤާނޫނަށް ގެންނަންޖެހޭ ބަދަލު ގެނެސްގެންވެސް މިނިވަން ކަމާއިއެކު ޚިދުމަތް ދެވޭނެ މަގު ފަހި ކޮށްދެއްވާނެކަމަށް ޑރ.މުއިއްޒު ވިދާޅުވިއެވެ.
ފުލުހުންނާއި ސިފައިންގެ މުވައްސަސާއަށް ވަނީ ސިޔާސީ ނުފޫޒު އިންތިހާއަށް ވަދެފަ. ޤާނޫނަށް ގެންނަން ޖެހޭ ބަދަލު ގެނެސްގެންވެސް ދެ މުވައްސަސާ މިނިވަންކޮށް ދޭނަން. މިނިވަން ކަމާއިއެކު ޚިދުމަތް ކޮށްދޭނެ މަގު ފަހިކޮށްދޭނަން.
– ޑރ.މުއިއްޒު ވިދާޅުވިއެވެ.
މުއިއްޒު ވަނީ ބޮޑު ތިލަދުން މަތީގެ ރައްޔިތުން ދެއްވި ފުރިހަމަ ތާއީދާއިއެކު މިސަރުކާރު އެއްބުރުން ބަދަލުވާނެ ކަމުގެ އުންމީދު އާވެފައިވާކަމަށް ވިދާޅުވެފައެވެ. އަދި މުއިއްޒު ވަނީ މިސަރުކާރުން އިހުމާލުވެފައިވާ ކަންކަން ހައްލުކޮށް ހެޔޮ ބަދަލުތަކެއް ދެން އަންނަ ވެރިކަމެއްގައި ގެނެސް ދެއްވާނެކަމުގެ ޔަގީީންކަން ދިވެހި ރައްޔިތުންނަށް ދެއްވާފައެެވެ.
One Response
ޕީ،ޕީ،އެމް އައް ވެރިކަންކުރަންދިން 5 އަހަރުގަ ދިވެހި ރައްޔިތުން ވަރައްރަނގަޅައް ތަޖުރިބާކޮއްފަ ބުނީ ހޯހޯ ދެނެއް ޕީ،ޕީ،އެމް ގެ ވެރިކަމެއް ބޭނުމެއްނޫނޭ.. ބޮޑުތަނުން ހަމަވީ ބަލި. ރައްޔިތިންގެ ބޮޑު ޕަސަންޓެއް ބުނީ އަނިޔާވެރިކަމާއި، ބިރުވެރިކަމާއި ނާއިންސާފުގެ ސަރުކާރެއް ދެނެއްއިތުރައް ތަޖުރިބާކުރާކައް ފުރުސަތެއް ނުދޭނަމޭ.. ވެރިކަމުގަހުރެ ނެގިވޯޓުން ބޮޑުތަނުން ބަލިފުޅުވި ޕާޓީއެއް އަދި ކޮންގޮތަކައް ކިހިނެއްތޯ ކާމިޔާބުކުރާނީ… ހަމަ އެވާނީ އެއައް..