ޗައިނާގެ ހުޅަގު ދެކުނު ސިޓީއެއް ކަމުގައިވާ ޗޮންކިންގައި، ކޯލް މައިނެއްގައި ތާށިވެގެން 18 މީހަކު މަރުވެއްޖެއެވެ.
ޗައިނާގެ ޒިންހުވާ ނޫހުން މައުލޫމާތު ދޭގޮތުގައި، ޑައިޝުއިޑީންގ ނަމަކަށް ކިޔާ މި މައިންގައި ތާށީވެފައި ތިބި 24 މީހުންގެ ތެރެއިން 18 މީހުން މަރުވެފައިވަނީ، ވިހަ ގޭހެއް ކަމުގައިވާ ކާބަން މޮނޮކްސައިޑްގެ ލެވެލް މައިންގެ ތެރޭގައި އާދަޔާ ޚިލާފަށް މަތިވެގެން ދިއުމާ ގުޅިގެންނެވެ. ސަލާމަތްވި މީހުންގެ ތެރެއިން އެކަކު ސަލާމަތްވެފައިވަނީ، މީހުން ސަލާމަތްކުރުމަށް ކުރެވުނު މަސައްކަތްތަކުގެ ތެރެއިން ކަމަށްވެސް ޒިންހުވާ ނޫސް އޭޖެންސީން މައުލޫމާތު ދެއެވެ.
މި މައިންއަކީ، މައިންގެ އެތެރޭގައި ހުރި ބައެއް ސާމާނުތައް ރުޅާލުމަށްޓަކާ 2 މަސްދުވަހަށް ބަންދު ކޮށްފައި ބެހެއްޓުމަށްފަހު އަލުން މަސައްކަތް ކުރަން ފެށުނު މައިނެކެވެ. ޗައިނާގެ ކަމާބެހޭ އިދާރާތަކުން މިހާރު ދަނީ މިހާދިސާ ތަހުގީގު ކުރަމުންނެވެ.
ޗައިނާގެ މައިން ތަކަކީ، ދުނިޔޭގައި އެންމެ ގިނަ އަދަދަކަށް މީހުން މަރުވާ މައިންތަކެވެ. ފާއިތުވެދިޔަ ސެޕްޓެމްބަރު މަހުގައިވެސް، ޗައިނާގެ ޗޮންގިން ސިޓީގައި ހުންނަ ސޮންގޒާއޯ މައިނުގައި، ކާބޮން މޮނޮކްސައިޑް ގޭހުގެ ލެވެން އާދާޔާ ޚިލާފަށް މަތިވެގެން މައިނުގައި މަސައްކަތް ކުރަންތިބި 16 މީހުންވަނީ މަރުވެފައެވެ.
ޑައިޝުއިޑީންގ މައިނަކީ، 1975 ވަނަ އަހަރު ބިނާ ކުރެވުނު މައިނެކެވެ. އުފެދޭ ގޭހުގެ މިންވަރު މަތި މައިނެއްގެ ގޮތުގައި ފާހަގަ ކުރެވިފައިވާ މި މައިނަކީ، އަހަރަކު 12،000 ޓަނުގެ ކޯލް އުފެއްފުމުގެ ގާބިލްކަން ލިބިފައިވާ މައިނެކެވެ.
މިމައިންގައި 2013ވަނަ އަހަރު، ވިހަ ގޭހެއް ކަމުގައިވާ ހައިޑްރޮޖެން ސަލްފައިޑްގެ ލެވެލް އާދާޔާ ޚިލާފަށް މަތިވެގެން 3 މީހަކު މަރުވެ، 2 މީހަކަށް އަނިޔާ ވެފައި ވެއެވެ.
