ޕީޕީއެމްގެ ތެރޭގައި ޑިމޮކްރަސީ ނެތްކަމަށް ވިދާޅުވެ، ކުރީގެ ނައިބު ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެ ޕީޕީއެމްއަށް ވަރަށް ބޮޑަށް ފާޑު ވިދާޅުވެއްޖެއެވެ.

ޕީޕީއެމްއިން ވަހިކެވެ ވަޑައިގެންނެވިތާ ގިނަ ދުވަސްތަކެއް ނުވަނީސް ޖުމްހޫރީ ޕާޓީއަށް މިރޭ ސޮއިކުރައްވައި، މާމިގިލީގައި ބޭއްވި ޖަލްސާގައި ވާހަކަ ދައްކަވަމުން ރައީސް ވަހީދު ވިދާޅުވީ ގާތްގަނޑަކަށް ދިހަ އަހަރު ހޭދަކުރެއްވި ޕީޕީއެމުގައި ޑިމޮކްރަސީގެ އުސޫލެއް ނެތް ކަމަށާއި އަންނަ މަހު 9 ގައި އޮންނަ އިންތިހާބުގައި އެ ޕާޓީން ކެންޑިޑޭޓެއް ނެރުމުގެ ފުރުސަތު ނުދިން ކަމަށެވެ.

ޕީޕީއެމްގެ ކެންޑިޑޭޓެއް މިއަަހަރުގެ ރިޔާސީ އިންތިހާބުގެ ބެލެޓް ކަރުދާހަކު ނެތް. ޕިންކް ކުލަ ވެސް ނެތް. ޕީޕީއެމްގެ ކުލައެއް ވެސް ނިޝާނެއް ވެސް ނެތް. ކޮބައިތޯ ޕީޕީއެމްގެ ސާޅީހަކަށް ހާސްް މެމްބަރުން، އަޅުގަނޑު ދަންނަވާނީ އަޅުގަނޑު މަގުމަތިވިއްޔާ އެބޭފުޅުން ވެސް ތިބީ މަގުމަތީގައޭ.

– ރައީސް ވަހީދު ވިދާޅުވިއެވެ.

ވަހީދު ވިދާޅުވީ ޕީޕީއެމުން ވަކިވެވަޑައިގެންނެވި ޔަސް އެމަނިކުފާނު "މަގުމަތިވެއްޖެޔޭ" ވިދާޅުނުވާނެ ކަމަށެވެ. އެހެން ނަމަވެސް އެމަނިކުފާނު ސިފަކުރެއްވި ގޮޮތުގައި ރިޔާސީ އިންތިހާބަށް ކެންޑިޑޭޓަކު ނުނެރުމުން އެޕާޓީގެ އާއްމު މެމްބަރުން އެ ވަނީ މަގުމަތިވެފައެވެ.

ވަހީދު ވިދާޅުވި ގޮތުގައި ރާއްޖޭގެ މިނިވަންކަމާއި ރާއްޖޭގެ ޑިމޮކްރަސީ އަދި އިގްތިސޯދު މިއޮތީ ނުރައްކާތެރި ފައްތަރަކަށް ގޮސްފައި ކަމަށާއި ފިޔަވަޅުތައް ނާޅައިފި ނަމަ، އަވައްޓެރި ސްރީލަންކާއަށް ދިމާވި ހާލަތު ކުރިމަތިވެދާނެއެވެ. ވަހީދު ވިދާޅުވީ ރާއްޖޭގެ އިގްތިސޯދު ހަމައަކަށް އެޅުވުމަށް ލޯނުތައް ރީސްޓްރަކްޗާކޮށް އާމްދަނީ އިތުރުކުރެވޭނެ ގޮތްތައް ހޯދަންޖެހޭ ކަމަށެވެ. އަދި އެވަރުގެ ކަންތައްތައް ކުރެވޭނެ ހަމައެކަނި ބޭފުޅަކީ ގާސިމަށް ކަމަށް ވަހީދު ވިދާޅުވިއެވެ.

ޕީޕީއެމުން ވަކިވެވަޑައިގެންނެވުމަށް ފަހު ސޯޝަލްމީޑިއާގައި އާއްމުކުރެއްވި ބަޔާނެއްގައި އެމަނިކުފާނު ވިދާޅުވީ ޕީޕީއެމްއިން ވަކިވެވަޑައިގަތުމަށް ނިންމެވީ ފަރުވާތެރިކަމާ އެކު ވިސްނެވުމަށް ފަހު ކަމަށެވެ. ވަހީދުގެ ބަޔާނުގައި ޕީޕީއެމްއިން ވަކިވެވަޑައިގަންނަވާ ސަބަބު އޮމާންކޮށް ވިދާޅުވެފައި އޮތަސް، ޕާޓީގެ ސެކްރެޓަރީ ޖެނެރަލް މުހައްމަދު ތޮލާލަށް މިއަދު ފޮނުއްވި ސިޓީގައި ބަންޑުން ކޮށްލައްވާފައި ވަނީ ނުރުހުމާއި ހިތްހަމަނުޖެހުމެވެ.