އެމްއެމްޕީއާރުސީގެ ޚިޔާނާތުގެ ތުހުމަތުގައި ޖަލުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް ޔާމިނަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ ތެރެއިން އަނިޔާ ދިނުމުގައި އެންމެ އިސްކޮށް ހުންނެވީ ކުރީގެ ރައީސް މުހައްމަދު ނަޝީދު ކަމުގައި، ރައީސް ޔާމިންގެ އިސް ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ. ޖަމީލް މިހެން ވިދާޅުވީ ޔާމިން ދެވަނަފަހަރަށް ޖަލަށްލިތާ 1،000 ދުވަސް ފުރުން ފާހަގަ ކުރުމުގެ ގޮތުން މިއަދު މާލޭގައި ބޭއްވި ސައިކަލް ބުރުގައި ވާހަކަ ދައްކަވަމުންނެވެ. މި ސައިކަލް ބުރުގައި ވާހަކަ ދައްކަވަމުން ޑރ. ޖަމީލް ވިދާޅުވީ ރައީސް ޔާމިން ގަބޫލު ކުރައްވަނީ، ޔާމިނަށް އަނިޔާ ދިނުމުގައި ރައީސް ސާލިހުއާއި ރައީސް ނަޝީދު އެއްވަރު ކަމުގައި ކަމަށެވެ.
މި ދަނޑިވަޅުގައި ރައީސް ޔާމިންގެ ގާނޫނީ ވަކީލުގެ ހައިސިއްޔަތުން ރައީސް ޔާމިންގެ ޚާއްސަ މެސެޖެއް ތިބޭފުޅުންނަށް އަޅުގަޑު ދަންނަވާލާން ބޭނުންވޭ. ރައީސް ޔާމިން ގަބޫލު ކުރައްވަނީ އެމަނިކުފާނަށް މި އަނިޔާ ދިނުމުގައި އިސްކޮށް ހުންނެވީ ރައީސް އިބުރާހިމް ކަމުގައިވާއިރު، ހަމަ އެއްވަރަކަށް ޖޭއެސްސީގެ ތެރެއިން ރައީސް ނަޝީދު މި އަނިޔާ ދިނުމުގައި ބައިވެރިވާކަމަށް. ބައިވެރިވާކަމަށް.
ޔާމިނަށް "އަނިޔާ ދިނުމުގައ"ި އެންމެ އިސްކޮށް ހުންނެވި އެއް ފަރާތަކީ ރައީސް ނަޝީދުކަމަށް ޔާމިން ގަބޫލު ކުރައްވާކަމަށް ވިދާޅުވަމުން ޖަމީލު ވިދާޅުވިއެވެ. ޖަމީލް އިތުރަށް ވިދާޅުވީ ޔާމިނަ އަނިޔާ ދިނުމުގައި ހޯމް މިނިސްޓަރު އިމްރާނުވެސް ހަމަ އެއްވަރަކަށް ބައިވެރިވާކަމަށްވެސް ޔާމިން ގަބޫލު ކުރައްވާ ކަމުގައެވެ.
އެހެންވީމަ ރައީސް ޔާމިންގެ އިލްތިމާސަކީ ދަ ޑިމޮކްރޭޓުން ޖަހާ ސަކަރާތުގައި ޕީޕީއެމްގެ އެއްވެސް ބޭފުޅަކު ބައިވެވަޑައިނުގަތުން. ރައީސް ޔާމިންގެ އިލްތިމާސަކީ ތިބޭފުޅުން ބަދަހިކޮށް ތިއްބެވުން.
ޖަމީލް ވިދާޅުވިއެވެ.
މިހަފްތާގައި، ރިޔާސީ އިންތިޚާބުގެ ކެމްޕޭންއަށް ގައްދޫއަށް ވަޑައިގެން ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ، ރައީސް ޔާމިން ޖަލުން މިނިވަންވެފައި ނުވަނީ ޕީޕީއެމްގެ ލޑީަރޝިޕްގެ އިހުމާލުން ކަމުގައެވެ. އަދި ނަޝީދު ވިދާޅުވެފައިވަނީ، އެކީގައި މަސައްކަތް ކުރުމަށް އިދިކޮޅު ޕީޕީއެމްއިން ސޮއި އަޅާތާ 7 ދުވަހުގެ ތެރޭގައި ރައީސް ޔާމިން ޖަލުން މިނިވަން ކުރައްވާނެ ކަމުގައެވެ.
