ކުރިޔަށް އޮތް ރިޔާސީ އިންތިޚާބުގައި، ކުރީގެ ބަންޑަރަ ނައިބު ދިޔާނާ ސައީދު ރައީސް ސާލިހަށާއި އެމަނިކުފާނުގެ ރަނިންމޭޓް މުހައްމަދު އަސްލަމަށް ތާއީދު ކުރައްވަން ނިންމަވައިފިއެވެ.
ރައީސް ސާލިހަށް ތާއީދުކުރައްވާ ދިޔާނާ ސައީދު ވާހަކަ ދައްކަވާފައި ވަނީ އެމްޑީޕީގެ ރިޔާސީ ކެންޑިޑޭޓް އިބުރާހިމް މުހައްމަދު ސާލިހުގެ ރަނިންމޭޓް މުޙަންމަދު އަސްލަމް، މާލޭގައި ދިރިއުޅުއްވާ އައްޑޫ ސިޓީގެ ރައްޔިތުންނާއި ބައްދަލު ކޮށްލެއްވުމަށް ރޭ ބޭއްވި ބައްދަލުވުމުގައެވެ.
މި ބައްދަލުވުމުގައި އައްޑޫ ބަހުން ވާހަކަ ދައްކަވަމުން ދިޔާނާ ސައީދު ވިދާޅުވެފައިވަނީ، އަސްލަމަކީ ރައްޔިތުންގެ މަޖިލިހުގައި 4 ދައުރު ފުރިހަމަ ކުރައްވާފައިވާ ބޭފުޅެއް ކަމަށާއި، އޭނާއަކީ ޚުލްގު ހެޔޮ، މީހުންނާ ގުޅޭ ބޭފުޅެއް ކަމުގައެވެ. އަދި ރައްޔިތުންގެ މަޖިލިހުގެ މެމްބަރަކަށް ވެވަޑައިގަތުމުގެ ކުރިންވެސް އަސްލަމްއަކީ އައްޑޫގެ ތައުލީމީ ދާއިރާއަށް ގިނަގުނަ ޚިދުމަތްތަކެއް ކޮށްދެއްވި ތައުލީމީ ބޭފުޅެއްކަމަށް ވިދާޅުވަމުން ދިޔާނާ ވިދާޅުވީ އަސްލަމަށްވުރެ އައްޑޫ ރައްޔިތުންނަށް ވަކީން ބޮޑަށް ހެޔޮ އެދޭ ބޭފުޅަކު މުޅި ރާއްޖެއިންވެސް ނުހޯދޭނެ ކަމުގައެވެ.
ދިޔާނާ ސައީދު ރައީސް ސާލިހާއި އަސްލަމްގެ ކެމްޕޭނާ ގުޅިވަޑައިގެންފައި ވާއިރު އޭނާއަކީ ފާއިތުވެދިޔަ ތަނުގައި ރައީސް ސާލިހުގެ ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދެވި ފަރާތެއްކަން ފާހަގަ ކޮށްލެއެވެ. އަދި އޭނާވަނީ އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ތާއީދު ކުރައްވާ، އަމަލީގޮތުން ކެމްޕޭންގަވެސް ހަރަކާތްތެރި ވެފައެވެ.
އަދި ރައީސް ނަޝީދު އާ ޕާޓީއެއް އުފެއްދެވުމަށް ނިންމެވުމާއެކު، ނަޝީދަށް ތައުރީފުކޮށް، ދިޔާނާވަނީ ޓުވީޓުވެސް ކުރައްވާފައެވެ.
ކުރިން މި ސަރުކާރަށް ވަރަށް ބޮޑަށް ފާޑު ވިދާޅުވުމަށްފަހު، ވިސްނުން ބަދަލުކޮށް، ކުރިޔަށް އޮތް ރިޔާސީ އިންތިޚާބަށް ރައީސ ސާލިހަށާއި އަސްލަމަށް ތާއީދު ކުރަން ދިޔާނާ ނިންމެވި ސަބަބެއް އެނގިފައެއް ނުވެއެވެ.
