ރައްޔިތުންގެ މަޖިލިހުގެ އިނގުރައިދޫ ދާއިރާގެ ކުރީގެ މެމްބަރު އިބުރާހިމް ފަލާހު މިރޭ ޕީޕީއެމްއަށް ސޮއި ކުރައްވަން ނިންމަވައިފިއެވެ. ފަލާހު މިރޭ ޕީއެމްއަށް ސޮއި ކުރައްވަން ނިންމަވާފައިވަނީ، އިދިކޮޅު ޕީއެންސީގެ ރިޔާސީ ކެނޑިޑޭޓް ޑރ. މުއިއްޒުގެ މައި ކެމްޕޭން ޖަގަހަ ހުޅުވުމަށް މިރޭ ބޭއްވުމަށް ހަމަޖެހިފައިވާ ޚާއްސަ ރަސްމިއްޔާތުގައެވެ.

ދުވަސްތަކެއް ވަންދެން ސިޔާސީ ހަރަކާތްތަކާ ދުރުގައި ހުންނެވުމަށްފަހު މީގެ ހަފްތާއެއް ކުރިން ފަލާހުވަނީ ކުރިޔަށް އޮތް ރިޔާސީ އިންތިޚާބުގެ ކެމްޕޭނަށް ނިކުންނެވުމަށް ނިންމަވާފައެވެ. އެހެންނަމަވެސް، އޭނާ ގުޅިވަޑައިގަންނަވަނީ ކޮން ކެނޑިޑޭޓެއްގެ ކެމްޕޭނަކާކަމެއް އޭރު އޭނާ ހާމަ ކުރައްވާފައެއް ނުވެއެވެ.

މިރޭ ޑރ. މުއިއްޒުގެ ކެމްޕޭނާ ފަލާހު ގުޅިވަޑައިގެންނެވުމަށްފަހު މުއިއްޒުގެ ރިޔާސީ ކެމްޕޭންގައި އޭނާ ވަރަށް އިސް ދައުރެއް އަދާ ކުރައްވާނެކަމަށްވެސް ވަނީ މައުލޫމާތު ލިބިފައެވެ.

18 ވަނަ ރައްޔިތުންގެ މަޖިލިހުގައި އިނގުރައިދޫ ދާއިރާގެ މެމްބަރުކަން ކުރެއްވި އިބުރާހިމް ފަލާހު ކުރިން ހުންނެވީ އިދިކޮޅު ޕީޕީއެމްގެ އިސް ބޭފުޅެއްގެ ގޮތުގައެވެ. އަދި އޭނާ ފާހަގަ ކުރެވުނީ އޭރު ރައީސް ޔާމީނާ ވަރަށް އަރިސް ބޭފުޅެއްގެ ގޮތުގައެވެ.

ފަހުން އޭނާ ގުޅިވަޑައިގެންނެވީ ޖުމުހޫރީ ޕާޓީއާއެވެ. އެހެންމަވެސް، ޖުމުހޫރީ ޕާޓީގެ ރިޔާސީ ކެނޑިޑޭޓް ގާސިމް އިބުރާހިމްގެ ރިޔާސީ ކެމްޕޭން ހަރަކާތްތަކުން މިހާތަނަށް ފަލާހު ފެނިފައެއް ނުވެއެވެ.

މިރޭ ހުޅުވާ ޑރ. މުއިއްޒުގެ މައި ކެމްޕޭން ހަރުގެ ހުންނަނީ ހޭންވެރު ކޮޅުގައި ހުންނަ ސްކައި ވިއު ރެސްޓޯރަންޓުގެ ތިރީގައެވެ.