އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ނަންތައް މިއަދު ތަރުތީބުކޮށްފިއެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ކެންޑިޑޭޓު ނަންބަރު ތަރުތީބު ކުރުން އޮތީ އިލެކްޝަންސް ކޮމިޝަން (އީސީ) ގެ އިންތިހާބީ މަރުކަޒު ދަރުބާރުގޭގައެވެ. މި ރަސްމިއްޔާތުގައި އިންތިހާބުގައި ވާދަކުރައްވާ ގިނަ ކެންޑިޑޭޓުންތަކެއް ބައިވެރިވެވަޑައިގެންނެވިއެވެ.
ކެންޑިޑޭޓުންގެ ކެންޑިޑޭޓު ނަންބަރު ތަރުތީބުކޮށްފައި ވަނީ ދަރުބާރުގޭގައި އޮތް ބައްދަލުވުމުގައި ގުރު ނަގައިގެންނެވެ.
ކެންޑިޑޭޓުންގެ ކެންޑިޑޭޓު ނަންބަރުތައް ތަރުތީބުވި ގޮތް:
1- އަމިއްލަ ގޮތުން ވާދަކުރެއްވި ކުރީގެ ހޯމް މިނިސްޓަރު އުމަރު ނަސީރު
2- އަމިއްލަ ގޮތުން ވާދަކުރެއްވި ޑިފެންސް މިނިސްޓްރީގެ ކުރީގެ ނައިބު ހަސަން ޒަމީލް
3- ރައީސް އަދި އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހް
4- މާލޭގެ މޭޔަރު އަދި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު
5- ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް
6- އަމިއްލަ ގޮތުން ވާދަކުރެއްވި އެމްއާރުއެމްގެ ރައީސް ފާރިސް މައުމޫން
7- ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބް
8- އެމްއެންޕީގެ ރިޔާސީ ކެންޑިޑޭޓު ކާނަލް މުހައްމަދު ނާޒިމް
މި ފަހަރުގެ އިންތިހާބަށް ނަން ހުށައެޅުއްވި ކެންޑިޑޭޓުންގެ ތެރެއިން ގާސިމް އިބްރާހިމް މީ ރިޔާސީ އިންތިހާބުގައި ވާދަކުރައްވާ ތިން ވަނަ ފަހަރެވެ. މީގެކުރިން 2008 ވަނަ އަހަރާއި 2013 ވަަނަ އަހަރުގެ ރިޔާސީ އިންތިހާބުގައިވެސް ގާސިމް ވާދަކުރެއްވިއެވެ. ރައީސް ސޯލިހް ދެވަނަ ދައުރެއް ހޯއްދަވަން ނުކުންނެވިއިރު އުމަރު ނަސީރު މީ ރިޔާސީ އިންތިޚާބުގައި ވާދަކުރައްވާ ދެ ވަނަ ފަހަރެވެ. އުމަރު ވަނީ އާ ގާނޫނު އަސާސީން 2008 ވަނަ އަހަރު ބޭއްވި ރިޔާސީ އިންތިހާބުގައިވެސް ވާދަކުރައްވާފައެވެ.
ރިޔާސީ އިންތިހާބުގެ ފުރަތަމަ ބުރު އޮންނާނީ ސެޕްޓެމްބަރު މަހުގެ 9 ވަނަ ދުވަހުއެވެ. ދެވަނަ ބުރެއް ބާއްވާނަމަ ބާއްވާނީ ސެޕްޓެމްބަރު މަހުގެ 30 ވަނަ ދުވަހުއެެވެ.
