އެމަނިކުފާނު ދެވަނަ ދައުރަކަށް އިންތިހާބުވެވަޑައިގެންފި ނަމަ، ދ. ބަނޑިދޫގެ ބިން ހިއްކައި ގޯތި ދެއްވާނެ ކަމަށާއި އެ ރަށުގެ މަގުތައް ޒަމާނީ ފެންވަރަކަށް ހައްދަވާނެ ކަމަށް ރައީސް އިބްރިމް މުހައްމަދު ސޯލިހް އެ ރަށުގައި މިއަދު ވިދާޅުވެއްޖެއެވެ.

ދ. އަތޮޅުގެ ރަށްތަކަށް ފެއްޓެވި ކެމްޕެއިން ދަތުރުފުޅުގައި ބަނޑިދޫ އަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވާ ރައީސް ސޯލިހް ވިދާޅުވީ ބަނޑިދޫ އޮތީ އެމްޑީއޭގެ ލީޑަރު އަހުމަދު ސިޔާމްގެ ޕާޓީ އާއި އެމްޑީޕީ އަދި އަދާލަތު ޕާޓީއާ އެކީގައި ކަން ސާފުވެވަޑައިގަންނަވާ ކަމަށެވެ. އަދި އެމަނިކުފާނު ރަށަށް ވަޑައިގެންނެވުމުން ވިދާޅުވި ހޫނު މަރުހަބާ އަށް ޝުކުރު ދަންނަވާ ކަމަށް ވެސް ރައީސް ސޯލިހް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ސަރުކާރުގެ އަމާޒަކީ އެއްވެސް ތަފާތު ކުރުމެއް ނެތި ހިދުމަތް ދިނުން ކަމަށެވެ. އެގޮތުން ބަނޑިދޫ އަށް ވެސް ގިނަ ކަންތައްތަކެއް ކޮށްދެއްވުމަށް އެމަނިކުފާނު ވަނީ ވައުދުވެވަޑައިގެންފައެވެ.

ރައީސް ސޯލިހް ވިދާޅުވީ ކުރިއަށް އޮތް ދައުރުގައި ބަނޑިދޫގައި އައިސް ޕްލާންޓެއް ބަހައްޓަވާނެ ކަމަށާއި ސްކޫލްގައި މަލްޓި ޕާޕަސް ހޯލެއް އަޅުއްވައި ދެއްވާނެ ކަމަށެވެ. އަދި ކުނި މެނޭޖް ކުރުމަށް ރާއްޖޭގެ އެކިކަންކޮޅުތަކުގައި ހާއްސަ މަޝްރޫއުތަކެއް ކުރިއަށް ގެންދާ އިރު، އެ ރަށްތަކުގެ ތެރޭގައި ބަނޑިދޫ ވެސް ހިމަނުއްވާނެ ކަމަށް ރައީސް ވިދާޅުވިއެވެ.

އަދި ކުރިއަށް އޮތް ދައުރުގައި އެރަށުގައި ބިން ހިއްކައި ގޯތި ދިނުމުގެ މަސައްކަތް ކުރައްވާނެ ކަމަށާއި ފުރަތަމަ ގޯތި ދެވޭނީ އެ ރަށުގެ ބިން ހިއްކައިގެން ކަމަށް އެމަނިކުފާނު ވިދާޅުވިއެވެ. އަދި ޒަމާނީ ފެންވަރަކަށް މަގުތައް ހަދައި ކައުންސިލަށް އާ އިމާރާތެއް އަޅުއްވައި ދެއްވާނެ ކަމަށް ވިދާޅުވިއެވެ.

ރައީސް ވިދާޅުވި ގޮތުގައި ބަނޑިދޫގައި އެއާޕޯޓެއް އެޅެން އޮތް ގޮތެއް ވެސް ބައްލަވާނެ ކަމަށެވެ. އެކަމަކު، އެ ރަށުގައި ސީދާ އެއާޕޯޓެއް އަޅުއްވައި ދެއްވާނެ ކަމުގެ ޔަގީންކަމެއް އެމަނިކުފާނު މިއަދު ނުދެއްވައެވެ.