މިދިޔަ މަހު 21 ގައި ރިލީޒްކުރި "ބާބީ" އަށް ލިބުނު އާމްދަނީ ބިލިއަން ޑޮލަރު ހުރަސްކޮށްފި އެވެ.
ރިލީޒްކުރިތާ 17 ދުވަހުގެ ތެރޭގައި "ބާބީ" އިން މިހައިބޮޑޫ އާމްދަނީއެއް ހޯދައިފައިވާ އިރުގައި އަދިވެސް މި އަދަދު އިތުރު ވާނެކަމަށް ވެއެވެ. ފިލްމަށް ދުނިޔޭގެ އެކި ހިސާބުތަކުން ބޮޑު ތަރުހީބެއް ލިބެމުން އަންނަ އިރު، އެކި ހިސާބުތަކުގައި ފިލްމު ދައްކައިގެން ލިބުނު ޖުމްލަ އާމްދަނީ މިހާރު ވަނީ 1.013 ބިލިއަން ޑޮލަރަށް އަރައިފަ އެވެ.
މިއީ މި އަހަރު އެއް ބިލިއަން ޑޮލަރުގެ އާމްދަނީއެއް ލިބުނު ދެވަނަ ފިލްމެވެ. ފުރަތަމަ ފިލްމަކީ ޔުނިވާސަލް ޕިކްޗާސްގެ "ދަ ސުޕަ މާރިއޯ ބްރޯސް މޫވީ" އެވެ. އެ ފިލްމަށް ބޮކްސް އޮފީހުގައި 1.13 ބިލިއަން ޑޮލަރު ލިބިފައިވެ އެވެ.
"ބާބީ" އިން ބޮޑު ކާސްޓެއް ހިމެނޭއިރު، އޭގެ ތެރޭގައި މަޝްހޫރު އޭ-ލިސްޓް ތަރިންތަކެއްވެސް ހިމެނެއެވެ. އެގޮތުން ފިލްމުން ފެންނާނެ ތަރިންގެ ތެރޭގައި މާގޯ ރޮބީ، ރަޔަން ގޮޒްލިން، ވިލް ފެރެލް، ކޭޓް މެކިނަން، އެމެރިކާ ފެރޭރާ، އެމާ މެކީ އަދި މައިކަލް ޝީރާ ހިމެނެއެވެ.
