ކުރިއަށް އޮތް ރިޔާސީ އިންތިޚާބު ބޮއިކޮޓް ކުރުމަށް އިދިކޮޅު ރިޔާސީ ކެނޑިޑޭޓް ރައީސް ޔާމީނަށް ވާދަނުކުރެވޭ ހާލަތުގައި ކެނޑިޑޭޓަކު ނެރުމުގެ ބަދަލުގައި އިންތިޚާބު ބޮއިކޮޓް ކުރެއްވުމަށް ރައީސް ޔާމީން ދެއްވި އިރުޝާދާއިއެކު އިދިކޮޅު ޕްރޮގްރެސިވް ކޯލިޝަންގެ ޖޮއިންޓް ސެނެޓް ހޫނުވެ ބޮޑު ހަމަނުޖެހުމަކަށް ގޮސްފިއެވެ.

އިންތިޚާބު ބޮއިކޮޓް ކުރުމާއި ގުޅޭގޮތުން ބޭއްވި ބައްދަލުވުން ފަށައި، އިންތިޚާބް ބޮއިކޮޓް ކުރަން ވޯޓަށް އަހަން އުޅުނު ހިސާބުން ވަނީ ޚިޔާލް ތަފާތުވުން އުފެދި އެކަކު އަނެކަކަށް ޒުވާބުކޮށް ގަޔަށް ބޮލަށް އަރާ ހިސާބަށް ގޮސްފައެވެ.

އެނގިފައިވާ ގޮތުގައި އެ ބައްދަލުވުން ހޫނުވީ ޔާމީނުގެ ހުށަހެޅުއްވުމާ މެދު ބަހުސް ނުކޮށް ވޯޓަށް އަހަން ޔާމީނުގެ ސަޕޯޓަރުން އެދުމުން، އެކަމާ ބައެއް ސެނެޓަރުން ދެކޮޅު ހެދުމުންނެވެ. ބައެއް ސެނެޓަރުން އެދުނީ އިންތިހާބު ބޮއިކޮޓްކުރުމާ މެދު ވޯޓަށް އެހުމުގެ ކުރިން އެކަމާ ބަހުސްކުރާށެވެ.

އެނގިފައިވާ ގޮތުގައި ޕީޕީއެމް އޮފީސް ތެރެއަށް ވަނީ އާންމުން ވެސް ވަދެގެންފައެވެ. އަދި ހިންގަމުން އަންނަ މާރާމާރީ ހުއްޓުވަން ފުލުހުން ވެސް ޕީޕީއެމް އޮފީސް ތެރެއަށް ވަންނަން މަސައްކަތް ކުރަމުންނެވެ.

އެކަމަކު، ފުލުހުން އޮފީސް ތެރެއަށް ވައްދަން އާންމުން ދަނީ ދެކޮޅު ހަދަމުންނެވެ. އަދި އާންމުން ވަނީ ގަދަބާރު ބޭނުންކޮށްގެން ފުލުހުން ވަނުން ހުއްޓުވައިފައެވެ. އެނގިފައިވާ ގޮތުގައި ޕީޕީއެމް އޮފީސް ދޮރު މިހާރު ވަނީ ބަންދުކޮށްފައެވެ.

ރަޔަޓްގިޔަރުގައި ތިބި ފުލުހުން ދަނީ ޕީޕީއެމްގެ އޮފީސް ކައިރީގައި ހަރަކާތްތެރި ވަމުންނެވެ. އަދި އޮފީސް ތެރެއަށް ވަދެ ހަމަ ނުޖެހުން ކޮންޓްރޯލް ކުރުމަށް ފުލުހުން ދަނީ މަސައްކަތް ކުރަމުންނެވެ.