އަންނަ މަހުގެ 9 ގައި އޮންނަ ރިޔާސީ އިންތިހާބުގައި ވާދަކުރެއްވުމަށް ރައީސް އިބްރާހިމް މުހައްމަދު ސޯލިހްގެ ފޯމް އިލެކްޝަންސް ކޮމިޝަނަށް މިއަދު ހުށަހަޅުއްވައިފިއެވެ.
ރައީސްގެ ފޯމު އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގް އާ ހަވާލު ކުރެއްވީ ކެމްޕޭން މެނޭޖަރު މުހައްމަދު ރަޝީދު ހުސެއިން (ބިގޭ)އެވެ. ރަނިންމޭޓަކަށް ހަމަޖައްސާފައި ވަނީ އެމްޑީޕީގެ ޕާލަމަންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލިހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ.
އެމްޑީޕީގެ ޓިކެޓު ރައީސް ސޯލިހް ކަށަވަރު ކުރެއްވީ އެ ޕާޓީން ބައިވެރިވި ޕްރައިމަރީ ކާމިޔާބު ކުރައްވައިގެންނެވެ. އެ ޕްރައިމަރީގައި ރައީސް ސޯލިހް ވަނީ އެ ޕާޓީގެ ކުރީގެ ރައީސް އަދި ރައްޔިތުންގެ މަޖިިލިހުގެ މިހާރުގެ ރައީސް މުހައްމަދު ނަޝީދުގެ މައްޗަށް ކުރި ހޯއްދަވައިފައެވެ. ރައީސް 24،566 ވޯޓު ހޯއްދެވި އިރު ނަޝީދަށް ލިބިވަޑައިގަތީ 15،641 އެވެ.
މިދިޔަ ރިޔާސީ އިންތިހާބުގައި، ހިންނަވަރު ދާއިރާގެ މެމްބަރު ކަމުގައި ހުންނަވައި ޅ. އަތޮޅު މެމްބަރުގެ ގޮތުގައި 1994 ގައި ރައްޔިތުންގެ މަޖިލީހަށް ހޮވިވަޑައިގެން ފަސް ދައުރު އެމަނިކުފާނު ފުރުއްވިއެވެ. އެއީ 25 އަހަރެއްހާ ދުވަހެވެ.
ރައީސް ސޯލިހް ވެރިކަމުގެ ދެވަނަ ދައުރަކަށް ކުރިމަތިލެއްވީ އަދާލަތު ޕާޓީ އާއި އެމްޑީއޭއާ އެކުގައި ކޯލިޝަނެއް ހައްދަވައިގެންނެވެ. އެމަނިކުފާނު ގަބޫލު ކުރައްވާ ގޮތުގައި މިފަހަރުގެ ރިޔާސީ އިންތިހާބު އެއް ބުރުން ކާމިޔާބު ކުރެއްވޭނެއެވެ. އަދި އަމާޒަކީ ވޯޓު ނެގުމާ ހަމައަށްދާއިރު، 100،000 ވޯޓު ހަމަ ކުރެއްވުން ކަމަށް ވިދާޅުވިއެވެ.
އެމްޑީޕިއާ ވާދަވެރި ޕާޓީ، ޕީޕީއެމުން ރިޔާސީ ކެންޑިޑޭޓެއްގެ ގޮތުގައި ކުރީގެ ރައީސް އަބްދުﷲ ޔާމީން ހަމަޖެއްސި ނަމަވެސް އެމަނިކުފާނަށް އިއްވާފައިވާ ޖަލު ހުކުމާ ހެދި އީސީން ނިންމީ ކެންޑިޑެސީ ބަލައިނުގަތުމަށެވެ. އެ މައްސަލަ މިހާރު އޮތީ ސުޕްރީމް ކޯޓުގައެވެ.
