އިސްރާއީލުން ހިފާފައިވާ ފަލަސްތީނުގެ ބިންތަކުގައި އުފައްދާ ތަކެތި ބަހުރެއިންނަށް އެތެރެކުރުމުގައި އެއްވެސް މައްސަލައެއް ނެތްކަމުގައި، އެގައުމުގެ ޓްރޭޑް މިނިސްޓަރ މިހަފްތާގެ ކުރީކޮޅު ވިދާޅުވި ވިދާޅުވުން ދޮގުކޮށް، އިސްރާއީލުގެ ހިފާފައިވާ އަރަބި ބިންތަކުގައި އުފައްދާ އެއްވެސް އުފެއްދުމެއް އެގައުމަށް އެތެރެ ކުރުމުގެ ހުއްދަ ނުދޭނެކަމަށް ބަހުރެއިންގެ ސަރުކާރުން ބުނެފިއެވެ.
ބަހުރެއިންގެ އިންޑަސްޓްރީ، ކޮމާސް އެންޑް ޓުއަރިޒަމް މިނިސްޓަރ ޒައިދު ބިން ރާޝިދު އަލް-ޒަޔާނީ މިހަފްތާގައި ވިދާޅުވެފައި ވަނީ، ބަހުރެއިނުން، އިސްރާއީލްގެ އުފެއްދުމެއް ކަމަށްވާނަމަ، އެއީ ހިފާފައިވާ ފަލަސްތީނުގެ ބިންތަކުގައި އަދި ގޯލާންގެ އުސްބިންތަކުގައި އުފައްދާފައިވާ އެއްޗެއްތޯ ނުވަތަ ނޫންތޯ ނުބަލާނެ ކަމަށެވެ.
އަލް-ޒަޔާނި ވިދާޅުވި ކަމަށް ރޮއިޓާސް ނިއުންސް އޭޖެންސީން ރިޕޯޓް ކޮށްފައިވަނީ، ބަހުރެއިން އިން "އިސްރާއީލުގެ އުފެއްމެއް ބަލާނީ އެއީ އިސްރާއީލުގެ އުފެއްދުމެއް ކަމުގައި..އެހެންކަމުން، އުފައްދާތަނަކީ ކޮބައިކަން ލޭބަލް ކުރުމުގައި އެއްވެސް މައްސަލައެއް ނެތް".
"މިނިސްޓަރުގެ ސްޓޭޓްމަންޓު ގެނެސްފައިވަނީ ހަގީގަތް އޮޅޭގޮތަށް. މިނިސްޓްރީގެ ނިންމުންތައް ހުންނާނީ، ޔޫއެންގެ ރިޒޮލިއުޝަންތަކަށް ތާއީދުކޮށް ބަހުރެއިންގެ ސަރުކާރުން ނިންމާފައިވާ އެންމެހާ ނިންމުންތާ އެއްގޮތަށް،" ޓްރޭޑް މިނިސްޓަރުގެ ވާހަކަތައް ދޮގު ކުރައްވަމުން، މިނިސްޓްރީ އޮފް އިންޑަސްޓްރީ، ކޮމާސް އެންޑް ޓުއަރިޒަމްގެ އޮފިޝަލުން ވިދާޅުވިކަމަށް ބަހުރެއިންގެ ގައުމީ ނޫސް އޭގެންސީ (BNA)އިން ރިޕޯޓު ކޮށްފައި ވެއެވެ.
އެމެރިކާ މެދުވެރިއެއްގެ ދައުރު އަދާކޮށްގެން، އަރަބި ގައުމުތައް ކަމުގައިވާ، ބަހުރެއިންއާއި ޔުނައިޓެޑް އަރަބި އެމިރޭޓްސް އިންވަނީ، މިއަހަރުގެ ސެޕްޓެމްބަރު މަހުގެ 15 ވަނަ ދުވަހު، އިސްރާއީލާ ގުޅުން ގާއިމްކުރުމުގެ ގޮތުން އެއްބަސްވުންތަކެއްގައި ސޮއިކޮށްފައެވެ. އަދި އެއްބަސްވުންތަކުގެ ބަދަލެއްގެ ގޮތުން އިސްރާއީލުން ވަނީ، ހުޅަގު އައްސޭރީގެ ބިންތައް އިސްރާއީލާ ގުޅުވުމަށް ހަދާފައިވާ ޕްލޭންތަކަށް އަމަލީސިފަ ގެނައުން މަޑުޖައްސާލާފައެވެ. ފަލަސްތީނާ އެއްވެސް މަޝްވަރާއެއް ކުރުމެއްތެއި އިސްރާއީލުން ހެދި މި ޕްލޭންތަކާއި، ދުނިޔޭގެ ގިނަ ގައުމުތަކުން ވަނީ ދެކޮޅު ހަދާފައެވެ.
ޔޫރަޕިއަން ޔޫނިއަނުން ހަދާފައިވާ ގައިޑްލައިންތަކުގައި ވާގޮތުން، އިސްރާއީލުން ހިފާފައިވާ ބިންތަކުގައި އުފައްދާ އުފެއްދުންތަކުގައި، އެއީ ހިފާފާފައިވާ ބިންތަކުގައި ހަދާފައިވާ ތަކެތިކަން އިގޭގޮތަށް ލޭބަލް ކޮށްފައި ހުންނަން ޖެހެއެވެ.
ފާއިތުވެދިޔަ މަހު އެމެރިކާގެ ރައީސް ޑޮނަލްޑް ޓްރަމްޕް ވަނީ، އެމެރިކާއަށް އެތެރެކުރާ އިސްރާއީލުގެ އުފެއްދުތައް، ހިފާފައިވާ ބިންތަކުގައި އުފައްދާ ތަކެތި އިގޭގޮތަށް ވަކިން ލޭބަލް ކޮށްފައި ހުންނަޖެހޭ ގޮތަށް އެމެރިކާގެ ކަސްޓަމުން ހަމަޖައްސާފައި އޮންނަ އޮތުމަށް ނިމުމެއް ގެނެސްފައެވެ.
ފަލަސްތީނުގެ ފޮރިން މިނިސްޓަރ ރިޔާދު އަލް-މާލިކީ ވިދާޅުވެފައިވަނީ، ބަހުރެއިންގެ ފޮރިން މިނިސްޓަރވެސް، ބަހުރެއިންގެ ޓްރޭޑް މިނިސްޓަރުގެ ސްޓޭޓްމަންޓް ދޮގު ކުރައްވާފައިވާ ކަމަށެވެ.
އިސްރާއީލުން އުއްމީދު ކުރާގޮތުގައި، 2021 ވަނަ އަހަރު، އެގައުމަށް ބަހުރެއިނާއެކު ވެފައިވާ ދިފާއީ އެއްބަސްވުންތަކާ އަދި ފަތުރުވެރިކަމާ ގުޅޭ މުއާމަލާތްތައް ނުހިމަނާ ،220 މިލިއަން ޑޮލަރުގެ ވިޔަފާރު ކުރެވޭނެއެވެ.
