ޕީޕީއެމްގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީންގެ ކެންޑިޑެސީ މައްސަލައިގެ ހުކުމް އިއްވަން ސުޕްރީމް ކޯޓުން ތާވަލްކޮށްފިއެވެ.
އެ މައްސަލައިގެ އަޑުއެހުމެއް ސުޕްރީމް ކޯޓުގައި ބާއްވަން ތާވަލްކޮށްފައި ވަނީ މާދަމާ މެންދުރު ފަހު 3:00 ގައެވެ.
މި މައްސަލަ ސުޕްރީމް ކޯޓުން ބައްލަވަނީ އެ ކޯޓުގައި ތިއްބަވާ ހުރިހާ ފަނޑިޔާރުން ތިއްބަވައިގެންނެވެ. އެއީ އުއްތަމަ ފަނޑިޔާރު އަހުމަދު މުއުތަސިމް އަދުނާން، ފަނޑިޔާރު ޑރ. އަޒްމިރާލްދާ ޒާހިރު، ފަނޑިޔާރު އައިޝާ ޝުޖޫން މުހައްމަދު، ފަނޑިޔާރު މަހާޒް އަލީ ޒާހިރު، ފަނޑިޔާރު ހުސްނުއް ސުއޫދު، ފަނޑިޔާރު އަލީ ރަޝީދު ހުސެއިން، ފަނޑިޔާރު ޑރ. މުހައްމަދު އިބްރާހިމެވެ.
އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ވާދަކުރައްވަން ނިންމަވައި، ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަނަށް ހުށަހަޅާފައި ވަނީ މިދިޔަ އަންގާރަ ދުވަހުއެވެ. އެކަމަކު، އެ ފޯމް އިލެކްޝަންސް ކޮމިޝަނަށް ހުށަހެޅިތާ އަށް ގަޑިއިރު ނުވަނީސް އެ ކޮމިޝަނުން ވަނީ ފޯމް ބޭރުކޮށްލައިފައެވެ. އެހެންވެ، އެ މައްސަލަ ޔާމީންގެ ފަރާތްޕުޅުން ވަނީ ސުޕްރީމް ކޯޓަށް ހުށަހަޅައިފައެވެ.
އިލެކްޝަންސް ކޮމިޝަނުން ޔާމީންގެ ކެންޑިޑެސީ ބަލައިނުގަތީ ވ. އާރަށް ކުއްޔަށް ދިނުމުގައި ރިޝްވަތު ގަބޫލުކޮށް އެ ފައިސާ ލޯންޑާކުރިކަން ސާބިތުވެ ކްރިމިނަލް ކޯޓުން ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައިވުމާއި އެމަނިކުފާނުގެ މައްޗަށް ސާބިތު ދަރަންޏެއް އޮތް ކަމަށް ބުނެއެވެ. މި ހުކުމް ޔާމީންގެ ފަރާތްޕުޅުން ހައި ކޯޓުގައި އިސްތިއުނާފް ކުރި ނަމަވެސް އެ މައްސަލައިގެ ޝަރީއަތުގެ އަޑުއެހުން ވަނީ މެދުކެނޑިފައެވެ. އެއީ އެ މައްސަލަ ބައްލަވާ ފަނޑިޔާރުންތަކެއް ޗުއްޓީ ނެންގެވުމުންނެވެ.
ސުޕްރީމް ކޯޓުގައި އޮތް އަޑުއެހުމުގައި އުއްތަމަ ފަނޑިޔާރު އަޑުއެހުން ނިންމަވާލައްވަމުން ވިދާޅުވީ އިތުރު ކަމެއް ސާފު ކުރަން ނުޖެހޭ ނަމަ، އެކަމުގައި ދެން އޮންނާނީ ހުކުމް އިއްވުން ކަމަށެވެ. އަދި ކަމެއް ސާފު ކުރަން ޖެހޭ ނަމަ، އިތުރު އަޑުއެހުމެއް ބާއްވާނެ ކަމަށް އެމަނިކުފާނު ވިދާޅުވިއެވެ.
މި މައްސަލައިގައި ޔާމީންގެ ވަކީލުން މައިގަނޑު ގޮތެއްގައި ފާހަގަ ކުރެއްވީ ދަށު ކޯޓަކުން އިއްވާފައިވާ ހުކުމަކުން ރިޔާސީ އިންތިހާބުގައި ވާދަކުރުމަށް ހުރަސް އެޅިގެން ނުވާނެ ކަމެވެ. އަދި އިންތިހާބުގައި ވާދަކުރުމުގެ ހައްގު ވެސް ހަނިވެގެން ނުވާނެ ކަމަށް ވިދާޅުވިއެވެ.
އީސީން އެގޮތަށް ނިންމީ ގާނޫނުއަސާސީގެ 109 ވަނަ މާއްދާގެ (ޅ) އާ ހަވާލާދީފައެވެ. އޭގައި ބުނަނީ ރައިސުލްޖުމްހޫރިއްޔާގެ މަގާމަށް ކުރިމަތިލާ މީހާއަކީ 12 މަސް ދުވަހަށްވުރެ ދިގު މުއްދަތެއްގެ ހުކުމެއް ތަންފީޒުކުރަމުންދާ މީހަކަށް ވެގެން ނުވާނެ ކަމަށެވެ.
ގާނޫނުއަސާސީގައި ބުނާ ހައްގުތައް ހަނިކުރާ ނަމަ، އެ ހައްގު ހަނިކުރާ މިންވަރަކީ އެންމެ ކުޑަ މިންވަރު ކަމަށާއި ބައިނަލްއަގުވާމީ މިންގަނޑަށް ބަލާއިރު ޑިމޮކްރެޓިކް ޕްރެކްޓިސް އިން ހަނި ކުރާ ހައްގަކަށް ވާން ޖެހޭ ކަމަށް ވަކީލުން ވިދާޅުވިއެވެ.
މި މައްސަލައިގައި ޔާމީންގެ ވަކީލުން އެދިވަޑައިގެންފައި ވަނީ އިލެކްޝަންސް ކޮމިޝަންގެ ނިންމުމަކީ ބާތިލް ނިންމެވުމެއް ކަމަށް ކަނޑައަޅައި ދިނުމަށެވެ. އަދި ޔާމީނަކީ މި އަހަރުގެ ރިޔާސީ އިންތިހާބުގައި ވާދަކުރެއްވުމުގެ ޝަރުތު ހަމަވާ ބޭފުޅެއް ކަމުގައި ކަނޑައަޅައި ދެއްވުމަށާއި އިންތިހާބުގައި ބައިވެރިވުމަށްޓަކައި ހުރިހާ އިންތިޒާމުތަކެއް ހަމަޖައްސައި ދެއްވުމަށްޓަކައި އިލެކްޝަންސް ކޮމިޝަނަށް އަންގަވައި ދެއްވުމަށް ވެސް ވަކީލުން އެދިވަޑައިގެންފައިވެއެވެ.
މީގެއިތުރުން ސުޕްރީމް ކޯޓުން ނިންމާ ނިންމުމެއްގެ ސަބަބުން ޔާމީންގެ ކެންޑިޑެސީ ހުށަނޭޅޭ ހާލަތެއްގައި ޕީޕީއެމަށް އިތުރު ހުށަހެޅުމެއް ހުށަހެޅުމުގެ ފުރުސަތު ދިނުމަށް ވެސް އެދިވަޑައިގެންފައިވެއެވެ. އަދި ޔާމީންގެ އިތުރު ހުށަހެޅުމެއް ހުށަހަޅަން ޖެހޭ ހާލަތެއްގައި އެ ހުށަހެޅުން ހުށަހެޅުމަށް ސުޕްރީމް ކޯޓުން ފުރުސަތު ދެއްވުމަށް ވެސް ޔާމީންގެ ވަކީލުން އެދިވަޑައިގެންފައިވެއެވެ.
މި މައްސަލައިގައި ފަނޑިޔާރުންގެ ބެންޗުން ވަނީ ޔާމީންގެ ވަކީލުންނާއި އިލެކްޝަންސް ކޮމިޝަން އަދި އެޓާނީ ޖެނެރަލް އޮފީހުގެ ވަކީލުންނާއި ޕީޕީއެމްގެ ވަކީލުންނަށް ވަރަށް ގިނަ ސުވާލުތައް ކުރިމަތި ކުރައްވައިފައެވެ. އިލެކްޝަންސް ކޮމިޝަނާއި އެޓާނީ ޖެނެރަލް އޮފީހުގެ ވަކީލުން ވެސް ގަބޫލު ކުރައްވާ ގޮތުން ނަމަ، ޔާމީނަށް ރިޔާސީ އިންތިހާބުގައި ކުރިމަތިލެއްވިގެން ނުވާނެއެވެ. އަދި އެމަނިކުފާނުގެ ކެންޑިޑެސީ ބަލައިގަންނަން ޖެހޭ ސަބަބެއް ނެތް ކަމަށް އެ ބޭފުޅުން ވިދާޅުވިއެވެ.
