ރަޝިއާގެ އިދިކޮޅު ލީޑަރ އެލެކްސީ ނަވާލްނީ އިތުރު 19 އަހަރަށް ޖަލަށް ލާން ހުކުމް ކޮށްފިއެވެ.
ނަވާލްނީގެ މައްޗަށް ސާބިތު ވެފައިވަނީ، ހައްދުފަހަނައެޅި ޖަމާއަތްތަކަށް އޭނާ ފަންޑު ކުރިކަމުގެ ތުހުމަތު ތަކެވެ. ނަވާލްނީ މިހާރުވެސް ގެންދަވަނީ، ޕެރޯލްގެ އުސޫލުތަކާއި ޚިލާފްވުމުގެ އިތުރުން، މަކަރު ހެދުމާއި އަދި ކޯޓުގެ ހުރުމަތް ކެނޑުމުގެ ކުށް ސާބިތުވެ 9 އަހަރުގެ ޖަލު ހުކުމެއް ތަންފީޒު ކުރަމުންނެވެ.
އެހެންނަމަވެސް އޭނާ ވަނީ މި ހުރިހާ ތުހުމަތު ތަކަށްވެސް އިންކާރު ކޮށްފައެވެ. އަދި ބައިނަލްއަގުވާމީ މުޖުތަމަޢުން ގަބޫލު ކުރަނީ އޭނާގެ މައްޗަށް ރަޝިއާގެ ސަރުކާރުން ކުރަމުންދާ ތުހުމަތުތަކަކީ ސިޔާސީ ތުހުމަތުތަކެއް ކަމުގައެވެ.
ނަވާލްނީގެ މައްޗަށް ހުކުމް ކުރުމަށް މިއަދު ކުރިޔަށްދިޔަ ޝަރީއަތް ކުރިޔަށް ގެންގޮސްފައިވަނީ، 2021 ވަނަ އަހަރުން ފެށިގެން އޭނާ ހައްޔަރު ކޮށްފައި ހުންނަ ތަނުގައި ބަހައްޓައިގެން، ވީޑިއޯ މެދުވެރިކޮށެވެ.
ނަވާލްނީގެ މައްޗަށް ކުރި ހުކުމް އޭނާ ތަންފީޒު ކުރާނީ، ޚާއްސަ ޖަލެއްގައި ހުރެގެންނެވެ. މިއީ އޭނާގެ މައްޗަށް ދައުވާކުރި ރަޝިއާގެ ޕްރޮސެކިއުޓަރުން އެދެމުންދިޔަ ގޮތްވެސްމެއެވެ.
ހުކުމް ތަންފީޒު ކުރުމަށް ނަވާލްނީ ހައްޔަރު ކޮށްފައި ބަހައްޓާ ޖަލަކީ، ރަޝިއާގެ އެންމެ ސެކިއުރިޓީ ވަރުގަދަ ޖަލުތަކަށްވެސް އުސޫލުތައް ހަރުކަށި ޖަލެކެވެ. އެ ޖަލުގައި އާންމުކޮށް ބަންދު ކޮށްފައި ބަހައްޓަނީ ނުރައްކާތެރި ޖަރީމާތައް ހިންގާ ފަރާތްތަކާއި ތަކުރާރުކޮށް ބޮޑެތި ކުށްތައް ހިންގާ ފަރާތްތަކާއި އަދި އުމުރު ދުވަހުގެ ޖަލު ހުކުމް ތަންފީޒު ކުރާ ފަރާތްތަކެވެ.
އެ ޖަލުގައި ހުރެގެން އޭނާ ވަރަށް ބޮޑަށް އެކަހެރި ކުރެވި، އެހެނިހެން ފަރާތްތަކާއި މުއާމަލާތް ކުރުން އޭނާއަށް ވަރަށް ބޮޑަށް ހަނި ކުރެވިގެން ދާނެއެވެ. އަދި އާއިލާއަށާއި ވަކީލުންނަވެސް އޭނާއާއި ބައްދަލު ކުރެވޭ މިންވަރު ދަށްކުރެވި، އޭނާ ގިނައިރުވަންދެން ވަކީން ބަންދު ކޮށްފައި ބެހެއްޓޭނެއެވެ.
މިއަދުގެ ހުކުމަށްފަހު ނަވާލްނީގެ ފަރާތުން، ޓުވިޓަރގައި އޭނާ ވިދާޅުވެފައިވަނީ، "ޕުޓިންއަށް ކާމިޔާބު ވިޔަ ދީގެން ނުވާނެ. އުއްމީދު ކަނޑާނުލު" މަށެވެ.
