އިދިކޮޅު ޕީޕީއެމްގެ ރިޔާސީ ކެނޑިޑޭ، ކުރީގެ ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތެއްގައި، އިދިކޮޅު ކެނޑިޑޭޓެއްގެ ގޮތުގައި، ޕީއެންސީގެ ޓިކެޓްގައި ވާދަކުރާ ކެނޑިޑޭޓަކު އައްޔަން ކުރުމަށް އިއްޔެ ބޭއްވި، އެޕާޓީގެ މަޝްވަރާ މަޖިލިހުގެ ސިއްރު ވޯޓު ކާމިޔާބުކޮށް، ޕީއެންސީގެ ރިޔާސީ ޓިކެޓް ކަށަވަރު ކުރެއްވި މާލޭ ސިޓީގެ މޭޔަރ ޑރ. މުއިއްޒުއަށް ރައީސް ޔާމިންގެ ގާނޫނީ ވަކީލު ޑރ. ޖަމީލް މަރުހަބާ ވިދާޅެއް ނުވިއެވެ.

ރައީސް ޔާމިނަށް ރިޔާސީ އިންތިޚާބުގައި ވާދަ ނުކުރެވޭގޮތް ވެއްޖެ ހާލަތެއްގައި ބެކްއަޕް ކެނޑިޑޭޓަކު ތައްޔާރު ކޮށްފައި ބެހެއްޓުމަށް އިދިކޮޅު ޕީއެންސީގެ މަޝްވަރާ މަޖިލިހުގައި އިއްޔެ ނެގި ސިއްރު ވޯޓު ޑރ. މުއިއްޒު ކާމިޔާބު ކުރެއްވީ މަޑުއްވަރި ދާއިރާގެ މެމްބަރު އާދަމް ޝަރީފުއާއި ވާދަކޮށް އެންމެ 2 ވޯޓުގެ ތަފާތަކުންނެވެ.

މިގޮތުން ޕީއެންސީގެ މަޝްވަރާ މަޖިލިހުގެ 48 މެމްބަރުން މި އިންތިޚާބުގައި ވޯޓު ލާފައިވާއިރު، މުއިއްޒުއަށް ވޯޓު ދީފައިވަނި 25 މެމްބަރުންނެވެ. އާދަމް ޝަރީފަށް ވޯޓު ދީފައިވަނީ 23 މެމްބަރުންނެވެ.

އިއްޔެ ބޭއްވުނު ޕީއެންސީގެ މަޝްވަރާ މަޖިލިހުގެ ސިއްރު ވޯޓު މުއިއްޒު ކާމިޔާބު ކުރެެއްވިއިރު، ޓިކެޓް ކަށަވަރު ކުރުމަށް މުއިއްޒު ކުރި ކެމްޕޭންގައި ރައީސް ޔާމިންގެ އަރިސް ގިނަ ބޭފުޅުން ހަރަކާތްތެރިވި މަންޒަރު ވަނީ ފެނިގެން ގޮސްފައެވެ.

އިއްޔެގެ ވޯޓަށްފަހު ޕީޕީއެމް/ޕީއެންސީގެ ލީޑަރޝިޕްގެ ގިނަ ބޭފުޅުން ވަނީ މުއިއްޒުއަށް މަރުހަބާ ވިދާޅުވެ، ރިޔާސީ އިންތިޚާބު ކާމިޔާބު ކުރުމަށް އެކީ ދެމިތިބޭނަކަމަށް ވިދާޅުވެފައެވެ. އެހެންނަމަވެސް، އިންތިޚާބު ނިމި، އެއް ދުވަސް ފާއިތުވެގެން ދިޔައިރުވެސް، ޑރ. މުއިއްޒުއަށް ޑރ. ޖަމީލް މަރުހަބާ ވިދާޅުވެފައެއް ނުވެއެވެ.

ޑރ. ޖަމީލަކީ ރައީސް ޔާމިންގެ ގާނޫނީ އިސް ވަކީލްގެ އިތުރުން، މިފަހަރުގެ ރިޔާސީ އިންތިޚާބުގެވެސް އެމަނިކުފާނުގެ ރަނިންމޭޓެވެ. އެހެންނަމަވެސް، މިހާރު ސުޕްރިމް ކޯޓުގައި ކުރިޔަށްދާ ދުސްތޫރީ މައްސަލަ ނިމިގެންދާއިރު، ރައީސް ޔާމިނަށް މައްސަލަ ކާމިޔާބު ނުކުރެވިއްޖެނަމަ، ކުރިޔަށް އޮތް ރިޔާސީ އިންތިޚާބުގައި ރަނިންމޭޓެއްގެ ގޮތުގައި ވާދަކުރުމުގެ ފުރުސަތު ޖަމީލަށް ގެއްލިގެން ދާނެއެވެ.