އިދިކޮޅު ޕީޕީއެމްގެ ރިޔާސީ ކެނޑިޑޭޓް، ކުރީގެ ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތެއްގައި، އިދިކޮޅު ކެނޑިޑޭޓެއްގެ ގޮތުގައި، ޕީއެންސީގެ ޓިކެޓްގައި ވާދަކުރާނޭ ކެނޑިޑޭޓަކު އައްޔަން ކުރުމަށް ސިއްރު ވޯޓު ނެގުން މިއަދު ހަވީރު 4:00 ގައި ބާއްވާގޮތަށް އެޕާޓީގެ މަޝްވަރާ މަޖިލިހުން ނިންމާފައިވާއިރު، ޑރ. މުއިއްޒުއަށް ތާއީދު ހޯދުމަށް ރައީސް ޔާމިންއާއި މެޑަމް ފާތުންގެ އަރިސް ގިނަ ބަޔަކު މަސައްކަތް ކުރަމުން ދާކަން ހާމަ ވެއްޖެއެވެ.
މިގޮތުން "ޚަބަރު އޮންލައިން"އަށް މައުލުމާތު ލިބިފައިވާ ގޮތުގައި، ރައީސް ޔާމިންގެ އިތުބާރު އެންމެ ބޮޑަށް އޮންނަކަމަށް ބެލެވޭ، އެމަނިކުފާނުގެ ކުރީގެ ޗީފް އޮފް ސްޓާފު މުސްއތަފާވެސް ގެންދަވަނީ ޑރ. މުއިއްޒުއަށް ވޯޓު ހޯދުމަށް އިސްކޮށް މަސައްކަތް ކުރަމުންނެވެ. އަދި މުއިއްޒުއަށް ޕީއެންސީގެ ވޯޓު ކަށަވަރު ކުރުމަށް، ކެމްޕޭން ޓީމުގައި މަސައްކަތް ކުރަމުންދާ ފަރާތްތަކުގެ ތެރޭގައި މެޑަމް ފާތުންގެ އަރިހުގައި ވަރަށް އިސްކޮށް މަސައްކަތް ކުރި ޕީޕީގެ އިސް އަންހެން އެކްޓިވިސްޓުނުންވެސް ހިމެނެއެވެ.
އޭގެ ތެރޭގައި މެޑަމް ފާތުންގެ ވަރަށް އަރިސް ކަނބަލުންގެ ގޮތުގައި ފާހަގަ ކޮށްލެވޭ، ޕީއެންސީގެ މަޝްވަރާ މަޖިލިހުގެ ބައެއް މެމްބަރުން ކަމަށްވާ ޝިޒްލީންއާއި މަރީ (އައްޑޫ މަރީ) އާއި، އަދި ސާމިޔާވެސް ހިމެނެއެވެ.
އޭގެ އިތުރުންވެސް ޕީޕީއެމްގެ ސެނެޓްގެ ގިނަމެމްބަރުންނާއި، ރައްޔިތުންގެ މަޖިލިހުގެ ކުރީގެ ގިނަ މެމްބަރުންވެސް ދަނީ މިއަދު ބޭއްވުމަށް ހަމަޖެހިފައިވާ ސިއްރު ވޯޓު މުއިއްޒުއަށް ކާމިޔާބު ކޮށްދިނުމަށް މަސައްކަތް ކުރަމުންނެވެ.
މިއަދު ކުރިޔަށްދިޔަ ޕީއެންސީގެ މަޝްވަރާ މަޖިލިހުގެ ޚާއްސަ ބައްދަލުވުމަށްފަހު އާންމުކުރި ބަޔާނެއްގައި އެޕާޓީން ބުނެފައިވަނީ، 2023 ވަނަ އަހަރުގެ ސެޕްޓެމްބަރު 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރުމަށް ޕީއެންސީގެ 3/2003 ވަނަ މަޝްވަރާ މަޖިލިހުގެ ބައްދަލުވުމުގެ އަޢުލަބިއްޔަތުން ނިންމާފައިވާތީ އާއި އަދި އެ ބައްދަލުވުމުގައި ނިންމާފައިވާ ގޮތުގެމަތިން، ޕާޓީގެ ފަރާތުން ޝައުގުވެރިވާ އެޕާޓީގެ މެމްބަރުންނަށް އެފުރުސަތު ހުޅުވާލާފައިވާ ކަމުގައެވެ.
މިގޮތުން ހުޅުވާލި މުއްދަތު ހަމަވެގެންދިޔަ އިރު، ކުރިމަތި ލާފައިވަނީ މާލޭ ސިޓީގެ މޭޔަރު ޑރ. މުއިއްޒުއާއި، މަޑުވަރި ދާއިރާގެ މެމްބަރު އާދަމް ޝަރީފެވެ.
"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ޕީއެންސީގެ ޓިކެޓަށް ވާދަ ކުރުމުގެ ޝައުގުވެރިކަން، ޕީޕީއެމްގެ ނާއިބު ރައީސް ޢައްސާން މައުމޫން ގެންގުޅުއްވި ނަމަވެސް އޭނާ މިހާރުވަނީ އެ ވިސްނުން ދޫކޮށްލައްވާފައެވެ. އަދި ޓިކެޓަށް ވާދަކުރެއްވުމުގެ ވިސްނުން ގެންގުޅުއްވި، ނައިފަރު ދާއިރާގެ މެމްބަރު އަހުމަދު ޝިޔާމްވެސް ފަހުން އެވިސްނުން ދޫކޮށްލައްވާފައިވާއިރު، ޝިޔާމްއާއި ޢައްސާންގެ އިތުރުން، މާލޭ ސިޓީ ކައުންސިލްގެ މެމްބަރު އިބުރާހިމް ޝުޖާއާއި، މަހިބަދޫ ދާއިރާގެ މެމްބަރު އަހުމަދު ތާރިގު ކެމްޕޭން ކުރައްވަމުން ގެންދަވަނީ އާދަމްޝަރީފުއަށް ކަމަށްވެސް ވަނީ މައުލޫމާތު ލިބިފައެވެ.
އެހެންނަމަވެސް، ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ޕީއެންސީގެ ސެނެޓްގެ ގިނަ މެމްބަރުންނާއި، ޕީޕީއެމްގެ ލީޑަރޝިޕްގެ ގިނަ ބޭފުޅުންގެ ތާއީދު އަދިވެސް އޮތީ ޑރ. މުއިއްޒުއަށެވެ. އަދު މިއަދު ޕީއެންސީގެ ސެނެޓްގައި ނެގުމަށް ހަމަޖެހިފައިވާ ވޯޓު، ބޮޑު ތަފާތަކުން ޑރ. މުއިއްޒު ކާމިޔާބު ކުރައްވާނެކަމަށްވެސް ވަނީ ބެލެވިފައެވެ.
