އިދިކޮޅު ޕީޕީއެމްގެ ރިޔާސީ ކެނޑިޑޭ، ކުރީގެ ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތެއްގައި، އިދިކޮޅު ކެނޑިޑޭޓެއްގެ ގޮތުގައި، ޕީއެމްސީގެ ޓިކެޓްގައި ވާދަކުރާ ދެ ކެނޑިޑޭޓަކު ސިއްރު ވޯޓު ނެގުން މިއަދު ހަވިރު 4:00 ގައި ބާއްވާގޮތަށް އެޕާޓީގެ މަޝްވަރާ މަޖިލިހުން ފާސްކޮށްފިއެވެ. އަދި މަޝްވަރާ މަޖިލިހުން ވަނީ ރިޔާސީ ޓިކެޓަށް ޝައުގުވެރިވާ ފަރާތްތަކުން މިއަދު 2:00 ގެ ކުރިން ކުރިމަތި ލުމަށްވެސް ހުޅުވާލާފައެވެ.
މިއަދު ކުރިޔަށްދިޔަ އެޕާޓީގެ މަޝްވަރާ މަޖިލިހުގެ ޚާއްސަ ބައްދަލުވުމަށްފަހު އާންމުކުރި ބަޔާނެއްގައި އެޕާޓީން ބުނެފައިވަނީ، 2023 ވަނަ އަހަރުގެ ސެޕްޓެމްބަރު 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރުމަށް ޕީއެންސީގެ 3/2003 ވަނަ މަޝްވަރާ މަޖިލިހުގެ ބައްދަލުވުމުގެ އަޢުލަބިއްޔަތުން ނިންމާފައިވާތީ އާއި އަދި އެ ބައްދަލުވުމުގައި ނިންމާފައިވާ ގޮތުގެމަތިން، ޕާޓީގެ ފަރާތުން ޝައުގުވެރިވާ އެޕާޓީގެ މެމްބަރުންނަށް އެފުރުސަތު ހުޅުވާލާކަމުގައެވެ.
އެގޮތުން، ރިޔާސީ އިންތިޚާބުގައި ޕާޓީގެ ފަރާތުން ވާދަކުރުމަށް އެދޭ ފަރާތްތަކުން މިއަދު މެންދުރު 2:00ގެ ކުރިން އެ ޕާޓީގެ ރައީސްއަށް އެޑްރެސްކޮށް ޝައުގުވެރިކަން ފާޅުކުރާކަން ބަޔާންކުރާ ލިޔުމެއް ޕާޓީއަށް ފޮނުވުމަށްވެސް އިއުލާނުގައި ބުނެފައި ވެއެވެ.
އަދި ޝައުގުވެރިކަން ފާޅުކުރާ ފަރާތްތަކުގެ ތެރެއިން ޕާޓީގެ ޓިކެޓްގައި ކުރިޔަށްއޮތް ރިޔާސީ އިންތިޚާބުގައި ވާދަކުރުމަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޕާޓީގެ ޓިކެޓްގައި ކުރިޔަށް އޮތް ރިޔާސީ އިންތިޚާބުކުރާ ފަރާތެއް ކަނޑައަޅާނީ މިއަދު ހަވީރު 4:00 ގައި ބާއްވާ، ޕާޓީގެ މަޝްވަރާ މަޖިލިހުގެ ބައްދަލުވުމުގައިކަމަށްވެސް ޕީއެންސީގެ ބަޔާނުގައި ބުނެފައި ވެއެވެ.
ޕީއެންސީން ރިޔާސީ އިންތިޚާބުގައި ވާދަކުރާގޮތަށް ފާސްކުރީ މިއަދު ހެނދުނު ކުރިޔަށްދިޔަ އެޕާޓީގެ މަޝްވަރާ މަޖިލިހުގެ ބައްދަލުވުމުގައި ބައިވެރިވި 47 މެމްބަރުންގެ ތެރެއިން 44 މެމްބަރުންގެ ތާއީދާއެކުވެ. ޕީއެންސީގެ މަޝްވަރާ މަޖިލިހުގައި ތިއްބަވަނީ 47 މެމްބަރުންނެވެ.
ޕީއެންސީގެ މަޝްވަރާ މަޖިލިހުގެ މިއަދުގެ ބައްދަލުވުމުގައި، ކުރިޔަށް އޮތް ރިޔާސީ އިންތިޚާބުގައި ޕީއެންސީން ވާދަކުރުމަޓަކާ އެޕާޓީ އަސާސީ ގަވާއިދަށް އިސްލާހު ގެނައުމަށް ނިންމާފައިވާއިރު، މިހާރު ބެލެވެމުންދަނީ، އެޕާޓީގެ ރިޔާސީ ޓިކެޓް ވެގެންދާނި، މާލޭ ސިޓީގެ މޭޔަރު ޑރ. މުއިއްޒުއާއި ރައްޔިތުންގެ މަޖިލިހުގެ މަޑުއްވަރި ދާއިރާގެ މެމްބަރު އާދަމް ޝަރީފް އާ ދެބޭފުޅުންގެ ގަދަ ހިފުމެއްގެ ގޮތުގައި ކަމުގައެވެ.
ޕީއެންސީގެ އަސާސީ ގަވާއިދަށް ބަދަލު ގެނައުމަށްފަހު، އެޕާޓީގެ ރިޔާސީ ޓިކެޓް، ޕްރައިމަރީއަކަށް ނުގޮސް ދިނުމަށްޓަކާ އަސާސީ ގަވާއިދަށް ގެންނަންޖެހޭ ބަދަލުތައްވެސް މަޝްވަރާ މަޖިލިހުގެ ތާއީދާއެކީ އަސާސީ ގަވާއިދަށް މިއަދުވަނީ ގެނެސްފައެވެ.
ޕީއެންސީގެ މިއަދުގެ މަޝްވަރާ މަޖިލިހުގެ ބައްދަލުވުމުގެ ރިޔާސަތު ބަލަހައްޓަވާފައިވަނީ އެޕާޓީގެ ރައީސް އަބުދުއްރަހީމްއެވެ.
އިދިކޮޅު ރިޔާސީ ކެނޑިޑޭޓެއްގެ ގޮތުގައި ކުރީގެ ރައީސް ޔާމިނަށް ވާދަކުރެވޭ ގޮތް ނުވެއްޖެ ހާލަތެއްގައި އިދިކޮޅު ކެނޑިޑޭޓަކު ޕީއެންސީން ނެރުމަށް މިހާރު ވާދަކުރަމުން ދަނީ ޑރ. މުއިއްޒުއާއި ރައްޔިތުންގެ މަޖިލިހުގެ މަޑުއްވަރި ދާއިރާގެ މެމްބަރު އާދަމް ޝަރީފުއެވެ.
"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ޕިއެންސީގެ ޓިކެޓަށް ވާދަ ކުރުމުގެ ޝައުގުވެރިކަން، ޕީޕީއެމްގެ ނާއިބު ރައީސް ޢައްސާން މައުމޫން ގެންގުޅުއްވި ނަމަވެސް އޭނާ މިހާރުވަނީ އެ ވިސްނުން ދޫކޮށްލައްވާފައެވެ. އަދި ޓިކެޓަށް ވާދަކުރެއްވުމުގެ ވިސްނުން ގެންގުޅުއްވި، ނައިފަރު ދާއިރާގެ މެމްބަރު އަހުމަދު ޝިޔާމްވެސް ފަހުން އެވިސްނުން ދޫކޮށްލައްވާފައިވާއިރު، ޝިޔާމްއާއި ޢައްސާންގެ އިތުރުން، މާލޭ ސިޓީ ކައުންސިލްގެ މެމްބަރު އިބުރާހިމް ޝުޖާއާއި، މަހިބަދޫ ދާއިރާގެ މެމްބަރު އަހުމަދު ތާރިގު ކެމްޕޭން ކުރައްވަމުން އާދަމްޝަރީފުއަށް ކަމަށްވެސް ވަނީ މައުލޫމާތު ލިބިފައެވެ.
އެހެންނަމަވެސް، ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ޕީއެންސީގެ ސެނެޓްގެ ގިނަ މެމްބަރުންނާއި، ޕީޕީއެމްގެ ލީޑަރޝިޕްގެ ގިނަ ބޭފުޅުންގެ ތާއީދު އަދިވެސް އޮތީ ޑރ. މުއިއްޒުއަށެވެ. އަދު މިއަދު ޕީއެންސީގެ ސެނެޓްގައި ނެގުމަށް ހަމަޖެހިފައިވާ ވޯޓު، ބޮޑު ތަފާތުން ޑރ. މުއިއްޒު ކާމިޔާބު ކުރައްވާނެކަމަށްވެސް ވަނީ މައުލޫމާތު ލިބިފައެވެ.
