އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި ޕީއެންސީން ކެންޑިޑޭޓަކު ނެރުމާ ގުޅޭ ގޮތުން މަޝްވަރާ ކުރުމަށް އެ ޕާޓީގެ ސެނެޓް ބައްދަލުވުމެއް ބާއްވަން ނިންމައިފިއެވެ.
ޕީއެންސީގެ ސެނެޓް މެމްބަރުން ތިއްބަވާ ވަޓްސްއެޕް ގްރޫޕަށް އެ ޕާޓީގެ ރައީސް އަބްދުއްރަހީމް އަބްދުﷲ ފޮނުއްވި މެސެޖެއްގައިވާ ގޮތުން ޕީއެންސީގެ ސެނެޓްގެ ބައްދަލުވުން ކުރިއަށް ގެންދިއުމަށް ހަމަޖެހިފައި ވަނީ މާދަމާ ހެނދުނު 10 ޖަހާއިރުއެވެ. އެޖެންޑާގައިވާ ގޮތުން މާދަމާ އޮންނާނީ ރިޔާސީ އިންތިހާބުގައި ވާދަކުރުމާ މެދު ގޮތެއް ނިންމުމާއި އެ ގޮތަށް ނިންމައިފި ނަމަ ޕީއެންސީގެ އަސާސީ ގަވާއިދަށް ގެންނަންޖެހޭ ބަދަލުތައް ގެނައުމެވެ.
ޕީއެންސީގެ ސެނެޓްގެ ބައްދަލުވުމެއް މި ތާވަލުކުރީ ލީޑަޝިޕްގެ ބައްދަލުވުމަށް ފަހުގައެވެ.
ޕީއެންސީން އިންތިހާބުގައި ވާދަކުރުމާ ގުޅޭ ގޮތުން ސެނެޓް އެއްވާއިރު، ޕީޕީއެމްގެ ރިޔާސީ ކެންޑިޑޭޓަކަށް ކުރީގެ ރައީސް އަބްދުالله ޔާމީން ވަނީ ހަމަޖައްސައިފައެވެ. އެކަމަކު، އެމަނިކުފާނުގެ މައްޗަށް އިއްވާފައިވާ ޖަލު ހުކުމްގެ ސަބަބުން ރިޔާސީ އިންތިހާބުގައި ވާދަކުރުމުގެ ޝަރުތެއް އުނިވެފައިވާތީ އިންތިހާބުގައި ވާދަކުރެވިދާނެތޯ އަންނަނީ ސުވާލު އުފައްދަމުންނެވެ.
އެމަނިކުފާނަށް ކުރިމަތިނުލެއްވޭ ހާލަތުގައި ޕީޕީއެމް/ޕީއެންސީން ވާދަކުރާނެ ކެންޑިޑޭޓަކު ކަނޑައެޅުމަށް ތިން ފަހަރެއްގެ މަތިން ޔާމީން އަންގަވާފައިވެއެވެ. އެކަމަކު، އެ ހުރިހާ ފަހަރަކު ވެސް އެ ދެ ޕާޓީގެ ލީޑަޝިޕުން މަޝްވަރާ ކުރުމަށް ފަހު، ނިންމީ އެކަން ޔާމީނަށް ދޫކޮށްލުމަށެވެ.
ގާނޫނުއަސާސީގައި ރައީސުލްޖުމްހޫރިއްޔާ ކަމަށް ކުރިމަތިލުމުގެ ޝަރުތުތަކުގެ ތެރޭގައި ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ކޮށްފައިވާ މީހަކު ނަމަ އެ ހުކުމް ތަންފީޒު ކޮށް ނިމުނުތާ ނުވަތަ ހުކުމް ކަނޑައެޅި އަދަބު މާފު ކުރިތާ ތިން އަހަރުވެފައި ވުން ހިމެނެއެވެ. މަނީ ލޯންޑަރިން އާއި ރިޝްވަތު ހިފުމުގެ ކުށް ސާބިތުވެގެން، ޔާމީނަށް މިދިޔަ އަހަރުގެ ޑިސެމްބަރު 25 ގައި ކްރިމިނަލް ކޯޓުން ވަނީ 11 އަހަރުގެ ޖަލު ހުކުމެއް އިއްވައިފައެވެ.
ޔާމީން ވަނީ އިންތިހާބުގައި ވާދަކުރެއްވުމަށް އިއްޔެ އިލެކްޝަންސް ކޮމިޝަނަށް ފޯމް ހުށަހަޅުއްވައިފައެވެ. އެކަމަކު، އެ ފޯމް ބަލައިނުގަތުމުން ޔާމީންގެ ފަރާތްޕުޅުން އެ މައްސަލަ ވަނީ ސުޕްރީމް ކޯޓަށް ހުށަހަޅުއްވައިފައެވެ.
ޔާމީންގެ ކެންޑިޑެސީ މައްސަލަ ސުޕްރީމް ކޯޓުން މިހާރު ވަނީ ބަލައިވެސްގެންފައެވެ.
ރިޔާސީ އިންތިހާބަށް ޝައުގުވެރިވާ މީހުންގެ ކެންޑިޑެސީ ފޯމު ހުށަހެޅުމުގެ ފަހު ދުވަހަކީ އަންނަ ހޯމަ ދުވަހެވެ.
