ކުރީގެ ރައީސް އަބްދުﷲ ޔާމީންގެ ކެންޑިޑެސީ ގަބޫލު ކުރަން އިލެކްޝަންސް ކޮމިޝަން (އީސީ) އިން ދެކޮޅު ހެދުމުން އެ މައްސަލަ ސުޕްރީމް ކޯޓަށް ހުށަހެޅުމަށް މަސައްކަތް ކުރަމުން އަންނަ ކަމަށް އިދިކޮޅު ޕީޕީއެމުން މިއަދު ބުނެފިއެވެ.
ޕީޕީއެމުން ނެރުނު ބަޔާނެއްގައި ބުނީ އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ވާޑަކުރުމަށް ޔާމީންގެ ފަރާތްޕުޅުން އިލެކްޝަންސް ކޮމިޝަނަށް ހުށަހެޅުއްވި ހުށަހެޅުއްވުން ގަބޫލު ނުކުރުމަށް ނިންމި ނިންމުމަކީ ސައްހަ ނިންމުމެއް ކަމަށް ނުދެކޭ ކަމަށެވެ.
އެހެންވެ، އިލެކްޝަންސް ކޮމިޝަންގެ ނިންމުން އިންތިހާބުތަކާ ބެހޭ ގާނޫނުގެ 21 ވަނަ މާއްދާގެ (ބ) ގައި ބަޔާންކޮށްފައިވާ ގޮތުގެ މަތިން ސުޕްރީމް ކޯޓަށް ހުށަހެޅުމަށް ކުރަން ޖެހޭ އެންމެހާ މަސައްކަތް ޔާމީންގެ ވަކީލުންގެ ޓީމުން ކުރިއަށް ގެންދަވާ ކަމަށެވެ.
އަދި ސުޕްރީމް ކޯޓުން އިލެކްޝަންސް ކޮމިޝަންގެ ނިންމުން ބާތިލްކޮށް ރައީސް ޔާމީންގެ ކެންޑިޑަސީގެ ސައްހަކަން ކަށަވަރުވެގެން ދާނެކަމީ އެއްވެސް ޝައްކެއް އޮތް ކަމެއް ނޫން ކަމަށް ވެސް ޕީޕީއެމުން ނެރުނު ބަޔާނުގައި ބުނެފައިވެއެވެ.
އިންތިހާބުގައި ވާދަކުރާ ކެންޑިޑޭޓެއްގެ ކެންޑިޑެސީ އާއި މެދު ސުވާލު އުފައްދާ، ސުޕްރީމް ކޯޓަށް ހުށަހަޅާ މައްސަލަތައް ނިންމަން އެ ކޯޓަށް ހަތް ދުވަހުގެ މުހުލަތެއް ލިބޭނެއެވެ. އިންތިހާބަށް ކުރިމަތިލުމުގެ މުއްދަތު ހަމަވާނީ މިމަހުގެ ހަތް ވަނަ ދުވަހުއެވެ.
އިންތިހާބަށް ކުރިމަތިލާން އޮތް މުއްދަތު ހަމަވުމުގެ ކުރިން ޔާމީންގެ ކެންޑިޑެސީ އާމެދު އުފެދިފައިވާ ގާނޫނީ ސުވާލުތަކަށް ޖަވާބު ނުލިބިދާނެ ކަމަށް ލަފާކޮށް ޔާމީން ވަނީ ބެކަޕް ޕްލޭނަކަށް ތައްޔާރުވުމަށް އަންގަވާފައެވެ. އެ ޕްލޭންގެ ދަށުން ޕީއެންސީން ކެންޑިޑޭޓަކު ކަނޑައަޅަން ޔާމީން އެދިވަޑައިގެންފައި ވަނިކޮށް ޕީއެންސީގެ ލީޑަރުން ވިދާޅުވަނީ ކެންޑިޑޭޓަކު ކަނޑައެޅުން އެމަނިކުފާނު އަތް މައްޗަށް ދޫކޮށްލާފައިވާ ކަމަށެވެ.
ގާނޫނުއަސާސީގެ 113 ވަނަ މާއްދާގައި ބުނެފައި ވަނީ ރައީސުލްޖުމްހޫރިއްޔާ ކަމުގެ މަގާމަށް ކުރިމަތިލާ މީހެއްގައި ނުވަތަ ރައީސުލްޖުމްހޫރިއްޔާގެ ނައިބަކަށް ހުންނާނެ ކަމަށް އިއުލާން ކުރެވޭ މީހެއްގައި ހުންނާން ޖެހޭ ޝަރުތުތައް ފުރިހަމަވާ ކަމާ މެދު ނުވަތަ ރައީސުލްޖުމްހޫރިއްޔާއަކު އިންތިހާބު ކުރުމުގައި ދިމާވާ ކަމަކާ މެދު ނުވަތަ ރައީސުލްޖުމްހޫރިއްޔާ އޭނާގެ މަގާމުން ދުރުކުރުމަށް ރައްޔިތުންގެ މަޖިލިހުން ނިންމާ ނިންމުމަކާ މެދުގައި އެއްވެސް ހިލާފެއް އުފެދިއްޖެ ނަމަ، އެކަމެއް ވަކި ގޮތަކަށް ނިންމުމުގެ ބާރު ލިބިގެން ވަނީ ސުޕްރީމް ކޯޓަށް ކަމަށެވެ.
ހަމަ އެ މާއްދާގައި ބުނެފައި ވަނީ މިފަދަ ނިންމުމެއް ނިންމަން ވާނީ އެ ކޯޓުގައި ތިބޭ ހުރިހާ ފަނޑިޔާރުން ތިބެގެން ކަމަށެވެ. އަދި ކޯޓުން ނިންމާ ނިންމުމަކީ ފަހުގެ ނިންމުން ކަމަށް ބުނެފައިވެއެވެ.
