އިދިކޮޅު ލީޑަރު، ރައީސް ޔާމިންގެ ރަނިން މޭޓެއްގެ ގޮތުގައި ހަމަޖައްސަވާފައިވާ ޑރ. ޖަމީލަކީ ފިދާއެއްގެ ގޮތުގައި ކަތިލާ ކަންބަޅިއެއް ކަމުގައި އަދާލަތު ޕާޓީގެ ރައީސް، ހޯމް މިނިސްޓަރ ޝެއިޚް އިމްރާން ވިދާޅުވެއްޖެއެވެ.

ޝެއިޚް އިމްރާން މިހެން ވިދާޅުވީ، މިރޭ ށ. މިލަންދޫގައި ބޭއްވުނު، ރައީސް ސާލިހުގެ "އުފާވެރި އަމާންދިވެހިރާއްޖެ" ކެމްޕޭން ޖަލްސާގައި ވާހަކަ ދައްކަވަމުންނެވެ.

ރައީސް ސާލިހުވެސް ބައިވެރިވެވަޑައިގެންނެވި ޖަލްސާގައި ވާހަކަ ދައްކަވަމުން ހޯމް މިނިސްޓަރ އިމްރާން ވިދާޅުވީ، އިދިކޮޅު ޕީޕީއެމްގެ ރަނިންމޭޓުކަން ޑރ. ޖަމީލްއާއި ރައީސް ޔާމިން ހަވާލު ކުރެއްވީ، ޖަލުގައި އޮންނެވި ކެނޑިޑޭޓެއްގެ ރަނިންމޭޓުކަން އެއްވެސް ބޭފުޅަކު ގަބޫލު ނުކުރައްވައިގެން ކަމުގައެވެ.

އަޅުގަޑު ކުޑަކުޑަކޮށް ބާލާލިން ކިހިނެއްތޯ ރަނިންމޭޓު ކަންތައް މިހިގަނީ. ބަލާލިއިރު މި ވާގޮތަކީ، ޖަލުގަ އޮންނެވި ކެޑިޑޭޓެއްގެ ރަނިންމޭޓުކަން ބަައިގަންނާނެ ހަމަ އެކަކުވެސް ނުވީ އުޅެއުޅެ. އެންމެފަހުން ގޮސް މިލިބުނީ އަޅުގަޑުމެން އަރަބިބަހުން ކިޔާނެ… މިކަހަލަ ވަގުތުތަކުގައި ފިދާއެއްގެ ގޮތުގައި ކަތިކާ ކަންބަޅިއެއް. އާދެ ރަނިންމޭޓަކަށް ހަވާލުވެވަޑައިގެންނެވީ.. އަޅުގަޑުމެންނަށް އެގިއްޖެތާ.. މިބޭފުޅާ ނިކުމެވަޑައިގެން ރަނިންމޭޓްކަން މި ގަބޫލުފުޅު ކުރެއްވީ، ހީފުޅު ކުރެއްވީ ރަނިންމޭޓްކަން ބަލައިގެންފިއްޔާ، ގަބޫލު ކޮށްފިއްޔާ ދެން، ކެނޑިޑޭޓު ޖަލުގަ ބާއްވާލީމަ ތިމަންނައަށްތާއޭ ކެނޑިޑަސީ ލިބެންޖެހޭނީ. އެހެންވެގެން އަސްލު ކެނޑިޑަސީ ގަބޫލުކުރެއްވީ. އެކަމަކު މިއަދު އެއްކަލަ ރަނިންމޭޓްކަން ގަބޫލުކުރެއްވި ބޭފުޅާއާ މަޝްވަރާކޮށްލުމެއްވެސް ނެތި މިހާރު އެދަނީ އެހެން ކެނޑިޑޭޓެއްގެ ކަންތައް ނިމެމުން. މީ އުޅުއްވާ ހާލަކީ.

މިރޭގެ ޖަލްސާގައި ވާހަކަ ދައްކަވަމުން، ޑރ. ޖަމީލަކީ ރައީސް ޔާމިން ގުރުބާން ކުރައްވާ ކަންބަޅިއެއްގެ ގޮތުގައި ސިފަކުރައްވަމުން އިމްރާން ވިދާޅުވިއެވެ.

މިރޭގެ ޖަލްސާގައި އިމްރާނު ވިދާޅުވީ އިލެކްޝަންސްއަށް ފޯމުލާހިސާބަށް ދާއިރުވެސް ރައީސް ޔާމިންގެ ކެނޑިޑަސީގެ ކަންތަކުގައި ހައްލެއް ލިބޭނެކަމަށްގަބޫލު ނުކުރެއްވޭ ކަމުގައެވެ.

ދިއިކޮޅު ޕީޕީއެމްއިން ބުނެފައިވަނީ، ރައީސް ޔާމިންގެ ކެނޑިޑަސީ ފޯމު މާދަމާ ހެނދުނު 10:00ގައި އިލެކްޝަންސް ކޮމިޝަނަަށް ހުށަހެޅުމަށް ނިންމާފައިވާކަމުގައެވެ.

މާދަމާ އިލެކްޝަންސްއަށް ރައީސް ޔާމިންގެ ކެނޑިޑަސީ ފޯމު ވެއްދުމަށް ހަމަޖައްސާފައިވާއިރު، ރައީސް ޔާމިން މިއަދުވަނީ، އެމަނިކުފާނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވޭ ގޮތް ވެއްޖެނަމަ، އިދިކޮޅު ޕީއެންސީން ކެނޑިޑޭޓަކު ނެރުމަށްވެސް ނިންމާފައެވެ. މިގޮތުން، އިދިކޮޅު ޕީއެންސީގެ ކެނޑިޑޭޓުގެ ގޮތުގައި ޑރ. މުއިޒުއަށް އެޕާޓީގެ ޓިކެޓް ދިނުމަށް ޕީޕީއެމް ޕީއެންސީގެ ލީޑަރޝިޕުން ތާއީދު ކުރާއިރު، އިދިކޮޅުގެ އިސް ބައެއް ބޭފުޅުން މައުލޫމާތު ދީފައިވާ ގޮތުގައި ރަނިންމޭޓަކާއި ގުޅޭގޮތުން ޕާޓީގެ ތެރޭގައި ޚިޔާލު ތަފާތުވުން އެބަހުއްޓެވެ.

ކުރިޔަށް އޮތް ރިޔާސީ އިންތިޚާބަށް ކުރިމަތިލުމުގެ ފުުރުސަތު އިލެކްޝަންސް ކޮމިޝަނުން ހުޅުވާލާފައިވަނީ އަންނަ އޮގަސްޓުމަހުގެ 7 ވަނަ ދުވަހާ ހަމައަށެވެ. އެހެންނަމަވެސް، ގާނޫނު ބުނާގޮތުން، ޚިޔާނާތާއި މަނީ ލޯންޑަރިންގެ ދައުވާ ސާބިތުވެ، މިހާރު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް ޔާމިންގެ އިންތިޚާބީ ޝަރުތުރު ފުރިހަމައެއް ނުވެއެވެ. އެހެންނަމަވެސް އިދިކޮޅު ޕީޕީއެމްއިން އެކަން ގަބޫލެއް ނުކުރެއެވެ.

އިންތިޚާބާބެހޭ ގާނޫނު ބުނާގޮތުން، ރިޔާސީ އިންތިޚާބަށް ކުރިމަތިލާ ކެނޑިޑޭޓެއްގެ އިންތިޚާބީ ޝަރުތުތަކާއި ގުޅޭގޮތުން ޚިލާފް އުފެދިއްޖެނަމަ އެ މައްސަލައާއި ގުޅޭގޮތުން ގޮތް ނިންމަންޖެހޭނީ ސުޕްރިމް ކޯޓުންނެވެ. ނަމަވެސް، ޔާމިންގެ ކެނޑިޑަސީއާއި ގުޅޭގޮތުން ސުޕްރިމް ކޯޓަށް މިހާތަނަށް ހުށަހެޅި ދެ މައްސަލަވެސް އެކޯޓުން ބަލައިގެންފައެއް ނުވެއެވެ.

ބެލެވޭ ގޮތުގައި ރައީސް ޔާމިންގެ ފޯމު އިލެކްޝަންސްއިން ބަލައި ނުގެންފި ދެން އެމައްސަލައާއި ގުޅޭގޮތުން ގޮތެއް ނިންމާނީ ސުޕްރިމް ކޯޓުންނެވެ.