ކުރިޔަށް އޮތް ރިޔާސީ އިންތިޚާބުގެ ކެމްޕޭނަށް ރައީސް އިބުރާހިމް މުހައްމަދު ސާލިހު ފުވައްމުލައް ސިޓީއަށް ވަޑައިގެންފިއެވެ. ރައީސް ސާލިހުގެ އަރިހުގައި ނާއިބު ރައީސް ފައިސަލް ނަސީމު އަދި ކޯލިޝަން ލީޑަރު ސަން ސިޔާމުވެސް ބައިވެރި ވެލައްވައެވެ.

ރައީސް ސަލިހު ފުވައްމުލަކަށް ވަޑައިގަތުމުން އެމަނިކުފާނަށް މަރުހަބާ ދެންނެވުމަށް ފުވައްމުލަކުގެ ގިނަ އަދަދެއްގެ ރައްޔިތުން މަގުތަކަށް އެއްވެފައި ތިއްބެވެ.

ރައީސް ސާލިހު ފުވައްމުލަކަށް މި ކުރައްވާ ދަތުރުފުޅަކީ، ކުރިޔަށް އޮތް ރިޔާސީ އިންތިޚާބުގެ ކެމްޕޭން ދަތުރުފުޅުތައް މިނިވަންދުވަހަށް މެދު ކަނޑާލެއްވުމަށްފަހު ކުރައްވާ ފުރަތަމަ ދަތުރުފުޅެވެ.

އޭގެ ކުރިން ރައީސް ސާލިހު ވަޑައިގެންފައިވަނި ހއ. އަތޮޅުގެ ބައެއް ރަށްތަކަށެވެ.

ބައެއް ފަރާތްތަކުން ބުނެފައިވަނީ، މިހާރު ކުރައްވަމުން ގެންދަވާ ދަތުރުފުޅުގައި ރައީސް ސާލިހު އެމަނިކުފާނުގެ ރަނިން މޭޓެއްގެ ގޮތުގައި ފައިސަލް ނަސީމް ހަމަޖައްސަވާފައިވާކަން އިއުލާން ކުރައްވާނެ ކަމުގައެވެ. އެހެންނަމަވެސް ރައީސް ސާލިހުގެ ކެމްޕޭންގެ އިސް ބައެއް ފަރާތްތަކުން ވަނީ މިވާހަކަތައް ދޮގު ކުރައްވާފައެވެ.

ރައީސް ސާލިހުގެ ސަރުކާރުންވަނީ ފުވައްމުލަކުގައި ތަރައްގީގެ ގިނަ މަޝްރޫޢުތަކެއް ކުރިޔަށް ގެންގޮސްފައެވެ. އޭގެ ތެރޭގައި ފުވައްމުލަކު ވަށައިގެން ރިންގްރޯޑް މަގު ހެދުމާއި ފުވައްމުލަކު ސްކޫލް މަލްޓި ޕާޕަސް ހޯލާއި ހޮސްޕިޓަލް އަޕްގްރޭޑް ކުރުމާއި، ފުޓްބޯޅަ އާއި ފުޓްސަލް އަދި އެހެނިހެން ބައެއް ކުޅިވަރުތައް ކުޅޭ ދަނޑުތައް ތަރައްގީ ކުރުން ހިމެނެއެވެ.

އޭގެ އިތުރުންވެސް ރަށުގެ އެތެރޭގެ މަގުތައް ހެދުމާއި، ގޮނޑުދޮށް ހިމާޔަތް ކުރުމާއި، ހޮސްޕިޓަލް ތަރައްގީކުރުމުގެ މަސައްކަތްވެސް ދަނީ ކުރިޔަށެވެ.

13،499 މީހުންގެ ބޮޑު އަބާދީއެއް އޮންނަ ފުވައްމުލަކަކީ، ކޮންމެ ވެރިކަމެއްގައިވެސް ތަރައްގީގެ މަޝްރޫޢޫތައް ކުރިޔަށް ގެންދިއުމަށް ވަރަށްބޮޑަށް އިސްކަންދޭ ރަށެކެވެ.