ހެވިކަމުގެ ކުޅިވަރުތަކަށްފަހު ތަފާތު މަންޒަރެއް، އެތައް ސަތޭކަ ކުދިންނެއް ރައީސް ވަށާލީ ސަލާމް ކުރުމަށް!

ރޭ ގަލޮޅު ދަނޑުގައި ކުރިޔަށްދިޔަ މިނިވަން ދުވަހުގެ ހެވިކަމުގެ ކުޅިވަރުތަކަށްފަހު، ގަލޮޅު ދަނޑުން ފެނިގެން ދިޔައީ އެހެން އަހަރުތަކުގައިވެސް މިނިވަން ދުވަހާއި ދިމާކޮށް ގަލޮޅު ދަނޑުން އޮންނަ ކުޅިވަރުތަކަށްފަހު ފެނިގެން ގޮސްފައި ނުވާ، މުޅިން ތަފާތު މަންޒަރެކެވެ.

ރޭގެ ހެވިކަމުގެ ކުޅިވަރުތައް ނިމުމާއެކު، އާންމު އުސޫލުން ގިނަ ބަޔަކު ތައްޔާރު ވަމުން ދިޔައީ ގަލޮޅު ދަނޑު ދޫކޮށް ގެއަށް ދިއުމަށެވެ. އަދި ކުޅިވަރު ބެލުމަށް ދަނޑަށް ވަޑައިގެން ތިއްބެވި އިއްޒަތްތެރިންވެސް، ކުޑަ ވަގުތުކޮޅަކަށް އެރުވި ބަޑިބޭހުގެ ކުޅިވަރުތަކާއެކު ދިޔައީ، ދަނޑި ދޫކޮށް ގެއަށް ވަޑައިގަތުމަށް ތައްޔާރު ވަމުން ވަމުންނެވެ.

އެހެންނަމަވެސް، ކުޅިވަރުތައް ނިމުނު ފަހުންވެސް، ރޭ ޓީވީތަކުން މަންޒަރުތައް ލައިވް ކުރަމުންދިޔައިރު، ކުޅިވަރުގެ ހަރަކާތްތައް ނިންމާލުމުގެ ގޮތުން، ކުޅިވަރުތަކުގައި ބައިވެރިވި ގިނަ އަދަދެއްގެ ކުޑަކުދިން، ދަނޑަށް ވަޑައިގެން ތިއްބެވި އިއްޒަތްތެރިން ކުޅިބައްލަވަން ތިއްބެވި ރޮސްޓޮމް ކުރިމަތީގައި ސަފުސަފަށް ޖަމާވެ އެތުރެމުންނެވެ.

އެހާތަނުންވެސް ގިނަ ބަޔަކަށް ގަބޫލު ކުރެވުނީ، ކުޅިވަރުތައް ނިންމާލުމުގެ ގޮތުން ކުޅިވަރުތަކުގެ ބައިވެރިން ރޮސްޓޮމް ކުރިމަތީގައި ސަފުހެދުމަށް އެތުރެމުން ދިޔައީކަމުގައެވެ. އަދި އެއީ ރަސްމިއްޔާތުގެ ބައެއްގެ ގޮތުގައިވެސް ސިފަވަމުން ދިޔައެވެ. މިގޮތުން ގިނަ ބައިވެރިންތަކެއް އެއްތަނަކަށް އެއްވަމުން ދިޔަ މަންޒަރުތައް، ކުޅިބައްލަވަން ވަޑައިގެން ތިއްބެވި ގިނަ އަދަދެއްގެ އިއްޒަތްތެރިން ގެންދިޔައީ ފޮޓޯވެސް ނަގަމުންނެވެ.

އޭގެ ތެރޭގައި ރައީސް ސާލިހުގެ އަނބި ކަބަލުންވެސް، އެ މަންޒަރުތައް، ރޮސްޓޮމްގައި އިންނަވައިގެން ފޮޓޯ ނަންގަވަމުން ގެންދިޔަ މަންޒަރު ފެނިގެން ދިޔައެވެ. އޭރު ރައީސް ސާލިހުގެ ސެކިއުރިޓީގައި ހިމެނޭ ގިނަ އޮފިޝަލު އެ ސަރަހައްދަށް ހަމާވެފައި ނުވާއިރު، ރައީސް ކާރުކޮޅުވެސް ދަނޑަށް ވަދެފައެއް ނުވެއެވެ.

އެހެންނަމަވެސް ކުޅިވަރުތައް ނިންމާލުމަށްފަހު ރައީސް ސާލިހު ދަނޑު ދޫކޮށް ވަޑައިގެންނެވުމަށް ރޮސްޓޮމް ދޫކޮށް ދަނޑުގެ ވިނަގަނޑު މައްޗަށް ފައިބައިވަޑައިގެންނެވުމާއެކު، ދެން ފެނިގެންދިޔައީ ގިނަބަޔަކަށް ހައިރާންކަން ގެނުވި ތަފާތު މަންޒަރެކެވެ.

ފެނިގެން ދިޔައީ ކުޅިވަރުތަކުގައި ބައިވެރިވުމަށް ދަނޑަށް ހާޒިރުވެތިބި އެތައް ސަތޭކަ ކުޑަކުދިންނެއް ރައީސް ސާލިހު ވަށާލާ، އެމަނިކްފާނާއި ސަމާލްކުރުމަށް މަސައްކަތް ކުރަމުންދިޔަ މަންޒަރެވެ. އެމަނިކްފާނާ ސަމާމްކުރުމަށް، ކުޅިވަރުތަކުގައި ބައިވެރިވި ކުދިން އުތުރި އަރައިގަތުމުން، ރައީސް ކުދިންނާ ސަލާމް ކުރަމުންމުން ކުރިޔަށް ވަޑައިގަންނަވަން ޖެހިވަޑައިގަތީ ސެކިއުރިޓީންގެ އެހީތެރިކަމާއެކުއެވެ.

މިގޮތުން ސެކިއުރިޓީންގެ އެހީތެރިކަމާއެކު، ގިނަ އަދަދެއްގެ ކުދިންނާއި ސަލާމް ކުރުމަށް ރައީސަށް ގިނަ ވަގުތު ދަނޑުމަތީގައި ހޭދަކުރައްވަން ޖެހިވަޑައިގެންނެވިއެވެ.

މިނިވަން ދުވަހުގެ އުފަލުގައި ބޭއްވި ކުޅިވަރުތަކަށްފަހު ރޭ ފެނިގެންދިޔައީ ފާއިތުވެދިޔަ އަހަރުތަކުގައި ފެނިގެން ގޮސްފައި ނުވާ، ވަރަށްވެސް ތަފާތު މަންޒަރެކެވެ. ފެނިގެންދިޔައީ ގިނައަދަދެއްގެ ކުޑަކުދިންނެއްގެ ހިތްތަކުގައި ރައީސަށް އޮތް ލޯތްބާއި ޝައުގެވެ.

މިނިވަންދުވަހުގެ ހެވިކަމާއި ކުޅިވަރު ހަރަކާތްތަކުގެ ތެރޭގައި ހިމަނައިގެން ބޭއްވި، ދިވެހިރާއްޖޭގެ ޤައުމީ ކެޑޭޓްކޯގެ ޝަރަފްގެ ހިނގާލުމުގައި މާލޭގެ 14 ސްކޫލަކުން ވަނީ ބައިވެރިވެފައެވެ. އަދި ކުޅިވަރު ހަރަކާތްތައް ހުށައަޅާފައި ވަނީ، މޯލްޑިވްސް ނެޝަނަލް ޑިފެންސް ފޯސްގެ އިތުރުން، ހުޅުމާލެ ޖޫނިއަރ އަދި ސީނިއަރ ގުރޫޕުންނާއި، މާލޭގެ ހެންވޭރާއި މާފަންނުގެ ދެގުރޫޕުންނާއި، ކ. ކާށިދޫ ރައްޔިތުންގެ ފަރާތުންނާއި، ހއ. ވަށަފަރު ރައްޔިތުންގެ ފަރާތުން އަދި ދިއްގަރު އެކުވެރި ޒުވާނުންގެ ގުޅުމުގެ ފަރާތުންނެވެ.

މިއަހަރަކީ، ދިވެހިރާއްޖޭގެ މިނިވަންކަމަށް 58 އަހަރު ފުރުނު އަހަރެވެ. ދިވެހިރާއްޖެއަށް ފުރިހަމަ މިނިވަންކަން ލިބިފައި ވަނީ، 26 ޖުލައި 1965 ގައެވެ.