ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ، ދިކޮޅު ލީޑަރ ރައީސް ޔާމިންގެ ރިޔާސީ ކެނޑިޑަސީއާއި ގުޅޭގޮތުން ސުވާލު އުފެދިފައިވަނިކޮށް، ޕީޕިއެމްގެ ނާއިބު ރައީސް އަދި މާލޭ ސިޓީގެ މޭޔަރު ޑރ. މުއިއްޒު މިއަދު ނޫސްވެރިންނާއި ބައްދަލު ކުރެއްވުމަށް ނިންމަވައިފިއެވެ.

މުއިއްޒުގެ ގާތް ބޭފުޅަކު "ޚަބަރު އޮންލައިން"އަށް މައުލޫމާތު ދީފައިވާ ގޮތުގައި މިއަދު 2:30 ގައި މުއިއްޒު ނޫސްވެރިންނާ ބައްދަކުކުރައްވާ، ކުރިޔަށް އޮތް ރިޔާސީ އިންތިޚާބުގައި ރައީސް ޔާމިނަށް ތާއީދު ކުރައްވާކަން ހާމަ ކުރައްވާނެއެވެ. އެހެންނަމަވެސް ރައީސް ޔާމިންއަށް ކުރިމަތި ނުލެވޭ ހާލަތުގައި ދެން މުއިއްޒު ހައްދަވާނެ ގޮތެއް މި ނޫސްވެރިންގެ ބައްދަލުވުމުގައި ހާމަ ކުރައްވާނޭކަމެއް އަދި ޔަގީން ކުރެވިފައެއް ނުވެއެވެ.

ގިނަ ބަޔަކު ފާހަގަ ކުރާ ގޮތުގައި، ކުރިޔަށް އޮތް ރިޔާސީ އިންތިޚާބުގައި ރައީސް ޔާމިނަށް ކުރިމަތި ނުލެވޭ ހާލަތުގައި، އިދިކޮޅު ޕީޕީއެމްއިން ވާދަކުރުމަށް އެންމެ ބޮޑު ތާއީދެއް މިހާރު އޮތީ ޑރ. މުއިއްޒުއަށެވެ. އަދި މިހާރު ގިނަ އޮންލައިން ނޫސްތަކުން ނަގަމުންދާ ޚިޔާލު ހޯދުމުގެ ވޯޓުތަކުންވެސް ބޮޑު ތަފާތަކުން ކުރި ހޯއްދަވަމުން ގެންދަވަނީ ޑރ. މުއިއްޒުއެވެ.

މިގޮތުން ކުރިޔަށް އޮތް ރިޔާސީ އިންތިޚާބުގައި، އިދިކޮޅު ޕީޕީއެމްގެ ރިޔާސީ ކެނޑިޑޭޓް، ކުރީގެ ރައީސް ޔާމިންއަށް ވާދަ ނުކުރެވޭ ހާލަތެއްގައި، އެޕާޓީގެ ރިޔާސީ ކެނޑިޑޭޓެއްގެ ގޮތުގައި އެންމެ ބޮޑު ތާއީދެެއް އޮތީ މާލޭ ސިޓީގެ މޭޔަރު ޑރ. މުއިއްޒުއަށް ކަމަށް "ޚަބަރު އޮންލައިން" އިން ނެގި ޚިޔާލު ހޯދުމުގެ ޕޯލްއިން އިން ވަނީ ދައްކާފައެވެ.

ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެވިއްޖެ ހާލަތުގައި، އިދިކޮޅު ޕީޕީއެމްއިން ޓިކެޓަށް އެންމެ ބޮޑަށް ޝައުގުވެރިކަން ހުރިކަމަށް ބެލެވޭ، ޕީޕީއެމްގެ ލީޑަރޝިޕްގެ ހަތަރު ބޭފުޅުންގެ މެދުގައި ނެގުނު މި ވޯޓު ބޮޑު ތަފާތުކުން ޑރ. މުއިއްޒު ކާމިޔާބު ކުރެއްވީ ވޯޓު ލީ މީހުންގެ %76 ކާމިޔާބު ކުރައްވައިގެންނެވެ. މުއިއްޒުއާއި އެންމެ ގާތުން ވާދަކުރެއްވި، ނައިފަރު ދާއިރާގެ މެމްބަރު ޝިޔާމަށް ކާމިޔާބު ކުރެއްވުނީ %8.8 ވޯޓެވެ. ދެން އެންމެ ގިބަ ވޯޓު ކާމިޔާބު ކުރެއްވީ ޕީޕީއެމް ނާއިބު ރައީސް ޢައްސާން މައުމޫންއެވެ. ޑރ. މުއިއްޒު ފިޔަވާ ދެން ވާދަ ކުރެއްވި 3 ބޭފުޅުންނަށްވެސް ދާދި އެއްވަރަކަށް ވޯޓު ލިބުނު ނަމަވެސް، އެންމެ މަދުން ވޯޓު ލިބިވަޑައިގެންނެވީ، ކުރީގެ ރައީސް ޑރ. ވަހީދަށެވެ. ރައީސް ވަހީދަށް ލިބިވަޑައިގެންނެވީ ވޯޓު ލީ މީހުންގެ %6.9 ވޯޓެވެ.

"ޚަބަރު އޮންލައިން"އަށް މައުލުމާތު ލިބިފައިވާ ގޮތުގައި، ރައީސް ޔާމިނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ނުލިބިއްޖެ ނަމަ، އިންތިޚާބަށް ކުރިމަތިލުމަށް ފޯމު ހުށަހެޅުމަށް، އިދިކޮޅު ޕީޕީއެމްގެ އިސް ބައެއް ބޭފުޅުން މިހާރު ތިބީ ތައްޔާރަށެވެ. އެގޮތުން، އެފަދަ ހާލަތެއްގައި ޓިކެޓަށް ޝައުގުވެރިވާ ބޭފުޅުންގެ ތެރޭގައި މާލޭ ސިޓީގެ މޭޔަރު ޑރ. މުއިއްޒުއާއި، ކުރީގެ ރައީސް ވަހީދުއާއި، ޕީޕީއެމްގެ ނާއިބު ރައީސްގެ މަގާމްގައި ހުންނެވި އައްސާން މައުމޫންއާއި އަދި ނައިފަރު ދާއިރާގެ މެމްބަރު އަހުމަދު ޝިޔާމް ހިމެނޭކަމަށްވެސް ވަނީ މައުލޫމާތު ލިބިފައެވެ.

އަދި މި ދަނޑިވަޅުގައި ރައްޔިތުންގެ މަޖިލިހުގެ ކުރީގެ ރައީސް މަސީހުވެސް ވަރަށް އަވަހަށް ރާއްޖެ ވަޑައިގަތުމަށް ހަމަޖެހިފައިވާކަމަށްވެސް ވަނީ މައުލުމާތު ލިބިގައެވެ. ރައީސް ޔާމިނަށް ކުރިމަތި ނުލެއްވޭ ހާލަތުގައި މަސީހުއަށް ޓިކެޓް ދިނުމުގެ ވިސްނުން ރައީސް ގެންގުޅުއްވާކަމަށްވެސް "ޚަބަރު އޮންލައިން"އާއި މައުލޫމާތު ހިއްސާކުރިން ޕީޕީއެމްގެ ލީޑަރޝިޕްގެ ބައެއް ބޭފުޅުން ވިދާޅުވެފައި ވެއެވެ.