އަމިއްލަފުޅަށް ބޭސްކާން ނުޖެހި، އެހެންނަަމެވެސް ރައީސް ސާލިހަކީ ކޮންމެ ދުވަހަކު ހެނދުނު "މުށެއް ފުރާ" ބޭސްކާން ޖެހިފައިވާ ބޭފުޅެއްކަމުގައި ވިދާޅުވެ އެމްޑީޕީގެ ކުރީގެ ރައީސް، މުހައްމަދު ނަޝީދު ރައީސް ސާލިހަށް މަލާމާތް ކޮށްފިއެވެ.
ރޭ ބޭއްވުނު، ނަޝީދުގެ "ދަ ޑިމޮކްރެޓްސް" ޕާޓީގެ ހަރުގެ ޖަލްސާގައި ވާހަކަ ދައްކަވަމުން، ރައީސް ސާލިހުގެ ޒާތުފުޅަށް އަމާޒުކޮށް ބޭއަދަބީ ބަހުން ފާޑު ވިދާޅުވަމުން ނަޝީދު ވިދާޅުވެފައިވަނީ ރައީސް ސާލިހަކީ މިހާރު މާ މުސްކުޅިފުޅު ބޭފުޅެއް ކަމަށާއި، ދިރިއުޅުއްވަނީ ކޮންމެ ދުވަހަކު ހެނދުނު "މުށެއްވަރަށް" ބޭސް ކައިންގެ ކަމުގައެވެ.
އަދި ނަޝީދު ވިދާޅުވީ އެމްޑީޕީގެ ކެނޑިޑޭޓެއްގެ ގޮތުގައި ހުންނެވީ ކޮންމެ ދުވަހަކު ހެނދުނު ބޭސްކާން ޖެހިފައިވާ ބޭފުޅެއް ކަމުގައެވެ.
އަޅުގަނޑު އެމްޑީޕީގެ މެމްބަރުންނަށް ތަކުރާރުކޮށް ދަންނަވަން ތިބޭފުޅުން ރައީސް އަދި ތިބޭފުޅުންގެ ކެންޑިޑޭޓް ކޮންމެ ދުވަހަކު ހެނދުނު މުށެއް ފުރައި ބޭސް ފަރިއްކުޅުއްވަން ޖެހިވަޑައިގަންނަވާ. ތިބޭފުޅުންގެ ކެންޑިޑޭޓުގެ ހިތުގެ އާލާސްކަންފުޅު. ތިބޭފުޅުންގެ ކެންޑިޑޭޓްގެ ސިއްހީ ހާލުކޮޅު އެއީ ވިސްނަވަން ޖެހޭނެ ކަންކަން.
ރައީސް ސާލިހުގެ ސިއްޙީ ހާލުކޮޅަށް މަލާމާތާއި ފުރައްސާރަ ކުރަމުން، އަދި ކުރީ ބަރީގައި އަތް ޖައްސަވަން އިންނެވި، ނަޝީދުގެ ޑިމޮކްރެޓްސް ޕާޓީގެ ކެނޑިޑޭޓް އިލްޔާސް ލަބީބަކީ ޒުވާން އަދި ސިއްހަތު ރަގަޅު ކެނޑިޑޭޓެއްކަމަށް މޭރުން ކުރައްވަމުން ނަޝީދު ވިދާޅުވެފައިވެއެވެ.
އޭގެ އިތުރަށް ނަޝީދު ވިދާޅުވީ އެބޭފުޅާއަކީ ހިތަށް ސްޓަންޓްވެސް ލައްވަން ޖެހިފައިވާ ބޭފުޅެއް ނޫންކަމަށާއި، ދިއިރުޅުމަށް ބޭސްވެސް ބޭނުންކުރާން ޖެހިފައި ނުވާކަމުގައެވެ.
މާތްރަސްކަލާނގެ އަމުރުފުޅާއި އިރާދަފުޅުން އަޅުގަނޑަށް މުށެއް ފުރައި ބޭސް ހެނދުނު ކާކަށް ނުޖެހޭ. މާތްރަސްކަލާގެ އަމުރާއި އިރާދަފުޅުން އަޅުގަނޑުގެ ހިތުގައި އަދި ހަތަރު ސްޓެންޓް ލައްވާފައެއް ނެތް. މާތްރަސްކަލާނގެ އަމުރާއި އިރާދަފުޅުން އަޅުގަނޑުމެންގެ ޖީލު އަދި އަޅުގަނޑުމެންގެ ޖެނެރޭޝަން އެ އުޅޭ ބުރަ ދިރިއުޅުން އެ އުޅޭ ތަކުލީފު އެ އުޅޭ ޒުވާންކަން ގެއްލި ގޮސްގެން އެ ހުރި އުނދަގޫތައް އަޅުގަނޑަށް އެބަ ފެނޭ.
ބައެއް ސިޔާސީ ބޭފުޅުންނަކީ ހިތަށް ސްޓަންޓް ލައްވަން ޖެހިފައިތިބި ފަރާތްތަކަން ފާހަގަކޮށް، އަދި އެފަރާތަތަކަށް މަލާމާތް ރައްދު ކުރައްމުން ނަޝީދު ވިދާޅުވިއެވެ.
ރައީސް ސާލިހަށް މައްލަވަކޮށް، ނަޝީދު ވާހަކަ ދައްކަވަމުން ގެންދެވިއިރު، ހަރުގެއަށް ޖަމާވެތިބި "ދަ ޑިމޮކްރެޓްސް"ގެ އެކްޓިވިސްޓުން ގެންގޮސްފައިވަނީ އަންޖަހަމުންނެވެ.
ރައީސް ސާލިހުގެ އުމުރުފުޅަށާއި އަދި ސިއްހީ ހާލުކޮޅަށް ފުރައްސާރަކޮށް ވާހަކަ ދައްކަވަމުން، އެމަނިކްފާނު ކޮންމެ ދުވަހަކު ހެނދުނު "މުށެެއް ވަރުގެ" ބޭސް ކާންޖެހޭ ކަމަށް ނަޝީދު ވިދާޅުވި ނަމަވެސް، ރައީސް ސާލިހުގެ ސިއްޙީ ހާލުކޮޅު ހުރިގޮތުން، އެ އުސޫލުން ބޭސް ބޭނުން ކުރައްވާކަމެއްވެސް ނުވަތަ ނޫންކަމެއްވެސް މީޑިއާތަކަށް ކަށަވަރު ކުރެވިފައެއް ނުވެއެވެ.
އެހެންނަމަވެސް، ކެމްޕޭން ދަތުރުފުޅުތަކުގައި، ގަދަ އަވީގައި ގިނަ ރަށްތަކަށް މިހާރުވެސް ރައީސް ސާލިހު ދަތުރު ކުރައްވަމުން ގެންދަވާއިރު، އެމަނިކްފާނުގެ ސިއްޙީ ހާލުކޮޅު ރަގަޅު ނޫންކަމަށް މިހާތަނަށް ފާހަގަ ކުރެވިގައި ނުވާކަންވެސް ފާހަގަ ކޮށްލާން ޖެހެއެވެ.
