ބްރެޒިލްގެ ޑިފެންޑަރު އެލެކްސް ޓެލެސް މެންޗެސްޓަރ ޔުނައިޓެޑް ދޫކޮށް ސައުދީ ޕްރޯ ލީގުގެ އަލް ނަސްރަށް ސޮއިކޮށްފިއެވެ.
2025 ވަނަ އަހަރާ ހަމަޔަށް އޭނާ ސައުދީ ޕްރޯ ލީގުގެ ޓީމާއެކު ސޮއިކުރިކަމަށް ދެ ޓީމުން ރަސްމީކޮށް އިއުލާނުކޮށްފައިވަނީ އާދިއްތަ ދުވަހުއެވެ. މި އެއްބަސްވުމަށް ޔުނައިޓެޑަށް ގާތްގަނޑަކަށް ހަ މިލިއަން ޕައުންޑް ލިބޭނެ ކަމަށް މީޑިއާ ރިޕޯޓްތައް ބުނިނަމަވެސް, މާލީ ތަފްސީލެއް އެއްވެސް ކުލަބަކުން ހާމައެއް ނުކުރެއެވެ.
30 އަހަރުގެ ޓެލެސް އަލް ނަސްރުގައި ގުޅޭނީ ކްރިސްޓިއާނޯ ރޮނާލްޑޯއާއެވެ. 2020 ވަނަ އަހަރު ޕޯޓޯއިން 13.6 މިލިއަން ޕައުންޑަށް ސޮއިކުރި ޓެލެސް ވަނީ ލެފްޓް ބެކްގައި ޔުނައިޓެޑަށް 50 މެޗު ކުޅެދީފައެވެ. ނަމަވެސް މިދިޔަ ސީޒަން އޭނާ ހޭދަކުރީ ސެވިއްޔާގައި ލޯން އެއްބަސްވުމެއްގެ ދަށުންނެވެ. އޭނާ ވަނީ ސެވިއްޔާއާއެކު ޔުރޮޕާ ލީގު ކާމިޔާބުކޮށްފައެވެ.
މިދިޔަ ޑިސެމްބަރު މަހު ރޮނާލްޑޯ ސައުދީ ލީގަށް ބަދަލުވިފަހުން ގިނަ އަދަދެއްގެ ކުޅުންތެރިން ވަނީ އެ ލީގަށް ބަދަލުވެފައެވެ. ދުނިޔޭގެ އެންމެ މަތީ ފަންތީގައި ނަން ހިނގާ ގިނަ ކުޅުންތެރިން ސައުދީ ލީގާ ގުޅެމުން އަންނައިރު، ކުރިއަށް އޮތް ފަސް ވަރަކަށް އަހަރު ތެރޭގައި ދުނިޔޭގެ އެންމެ ވަރުގަދަ ފަސް ލީގުގެ ތެރޭގައި ސައުދީ ލީގު ހިމެނޭނެ ކަމުގައިވެސް ރޮނާލްޑޯ ވަނީ ބުނެފައެވެ. މީގެ އިތުރުން ޔޫރަޕް ފުޓުބޯޅައިގައި މިހާރު އެއްވެސް ކޮލިޓީއެއް ނެތް ކަމަށާއި, ރަނގަޅު ލީގަކަށް ދެން އޮތީ އިނގިރޭސި ޕްރިމިއަރ ލީގު ކަމުގައިވެސް އޭނާ ވަނީ ބުނެފައެވެ.
ދުނިޔޭގެ ރިކޯޑު އަގަކަށް ސައުދީގެ ލީގަށް ބަދަލުވެ އަލް-ނަސްރަށް ރޮނާލްޑޯ ކުޅެމުން އަންނައިރު، ފުރާންސްގެ ޕީއެސްޖީ ދޫކޮށް އިންޓަރ މައޭމީއަށް މެސީ ބަދަލުވެފައިވަނީވެސް ރިކޯޑު އަދަކަށެވެ.
