ގައުމީ ފުޓްބޯޅަ ޓީމުގެ ކޯޗަކަށް ހުރި، އިޓަލީގެ ފްރެންޗެސްކޯ މޮރިއޭރޯގެ ކޮންޓްރެކްޓް އަންނަ މަހުގެ ނިޔަލަށް ހަމަވުމާ އެކު، ގައުމީ ފުޓްބޯޅަ ޓީމުގެ ކޯޗުކަން އަލީ ސުޒޭންއާ ހަވާލުކުރާނެ ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
އެފްއޭއެމްގައި މިއަދު ބޭއްވި ނޫސްވެރިންގެ ބައްދަލުވުމުގައި ބައްސާމް ވިދާޅުވީ މޮރިއޭރޯ އާއެކު އެފްއޭއެމުން ހަދާފައިވާ އެއްބަސްވުމުގެ މުއްދަތު އޯގަސްޓު މަހު ހަމަވާނެ ކަމަށެވެ. އެހެންކަމުން މިހާރު ނިންމާފައި ވަނީ އެއްބަސްވުން އައު ނުކުރަން ކަމަށް ވެސް ވިދާޅުވިއެވެ. މީގެ އިތުރުން ޤައުމީ ޓީމަށް ބިދޭސީ އެހެން ކޯޗެއް ހަމަޖެއްސުމުގެ މަސައްކަތް އަހަރުގެ ބާކީ އޮތް ދުވަސްތަކުގައި ނުކުރާނެ ކަމަށާއި، އެ މަސައްކަތް ދެން ކުރާނީ އަންނަ 2024 ވަނަ އަހަރުގެ ކުރީ ކޮޅު ކަމަށް ވިދާޅުވިއެވެ. އެ މުއްދަތުގައި ޤައުމީ ޓީމާ ވަގުތީ ގޮތުން ހަވާލުވާނީ އެސިސްޓެންޓް ކޯޗު އަލީ ސުޒެއިންއެވެ.
މި ވަގުތު އޮތް ވިސްނުމަކީ މިހާރު ވެސް އެ އޮތް އަންޑަ 16 މިހާރު އޮތް ޓީމު މަސައްކަތް ކުރާނެ، އަންޑަ 19 ގައި ވެސް މިހާރު އޮތް ޓީމު ކުރާނެ. އަންޑަ 23 ޓީމާއި ސީނިއާ ޓީމު ބަދަލުތަކެއް އަންނާނެ. އަޅުގަނޑުމެންގެ މިހާރުގެ ކޯޗުގެ ކޮންޓްރެކްޓް ހަމަވާނެ އޮގަސްޓްގެ ނިޔަލަށް، އެ އަށް ފަހު، އަޅުގަނޑުމެންގެ ވިސްނުމަކީ ކޯޗުގެ ކޮންޓްރެކްޓް އާ ނުކުރުން، އެ ހިސާބުން، ގައުމީ ޓީމާ ހަވާލުވެގެންދާނީ އެސިސްޓަންޓް ކޯޗަކަށް ހުރި އަލީ ސުޒޭން.
– ބައްސާމް ވިދާޅުވިއެވެ.
މޮރިއޭރޯގެ އެއްބަސްވުން އައު ނުކުރަން އެފްއޭއެމުން ނިންމީ، ދާދި ފަހުން އިންޑިއާގައި ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެ އަށް އެކަށީގެންވާ ނަތީޖާއެއް ނުނެރެވި، ގިނަ ފާޑު ކިޔުންތަކެއް އަމާޒުވަމުން އައި ވަގުތެއްގައެވެ. އެ މުބާރާތުން ރާއްޖެ ކެޓީ ގްރޫޕް ސްޓޭޖުންނެވެ. މިއީ ސާފް ޗެމްޕިއަންޝިޕްގެ ގްރޫޕް ސްޓޭޖުން ރާއްޖެ ކެޓި ފުރަތަމަ ފަހަރެވެ. މިދިޔަ ހަފްތާގެ އަންގާރަ ދުވަހު އެފްއޭއެމްގެ ރައީސް ބައްސާމް ވިދާޅުވީ މޮރިއޭރޯ ދޭންވާ މުސާރަ ނުދެވި އޮތް ކަމަށެވެ. ނަމަވެސް ކުރިއަށް ދާނީ އެ މުސާރަތައް ދީ ނިންމާފައި ކަމަށް ވެސް އެ ދުވަހު ބައްސާމް ވިދާޅުވިއެވެ.
މޮރިއޭރޯ ހަވާލުވީ 2021 ވަނަ އަހަރުގެ އޮކްޓޫބަރު މަހު ފަހުކޮޅުގަ އެވެ. އޭގެ ފަހުން، ސުޒޭން ހުރީ މޮރިއޭރޯގެ އެސިސްޓަންޓް އަކަށެވެ. ރާއްޖޭގެ އެންމެ ކާމިޔާބު އެއް ފުޓްބޯޅަ ކޯޗު ސުޒޭން ވަނީ މީގެ ކުރިން ވެސް 23 އަހަރުން ދަށުގެ ޓީމުގެ ހެޑް ކޯޗުކަން ކޮށްފައެވެ. އެ ގޮތުން ސުޒޭން ވަނީ 2008 ވަނަ އަހަރުގެ ބެއިޖިން އޮލިމްޕިކްސްގެ ކޮލިފައިންގައި ވާދަކުރި 23 އަހަރުން ދަށުގެ ޓީމަށް 2007 ގައި ކޯޗުކޮށްދީފައެވެ.
