އިދިކޮޅު އެންމެ ބޮޑު ޕާޓީ ޕީޕީއެމްއާއި އިދިިކޮޅު ފަރާތްތަކަށް ރާއްޖޭގެ މިހާރުގެ ހާލަތު އޮތް ގޮތުން އޮތް އެންމެ ބޮޑު އުންމީދަކީ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ކަމަށް އެމަނިކުފާނުގެ ތަރުޖަމާން އަދި ކުރީގެ ހެލްތު މިނިސްޓަރ އަމީން ވިދާޅުވެއްޖެއެވެ.

ޒުވާނުންނަށް ހާއްސަކޮށްގެން "35-18″ ގެ ނަމުގައި ޖޭޕީން ރާޅުގަނޑު ސަރަހައްދުގައި ރޭ ބޭއްވި އިވެންޓުގައި އަމީން ވަނީ ރިޔާސީ އިންތިޚާބަށް އެއް ކެނޑިޑޭޓަކު ނެރުމަށް ކުރަމުންދާ މަސައްކަތުގައި އޮތް އެންމެ ރަނގަޅު ފޯމިއުލާއަކީ ކޮބައިކަން ވިދާޅުވެފައެވެ. އަމީން ވިދާޅުވީ ރާއްޖޭގައި އޮތް އެންމެ ބޮޑު އިދިިކޮޅު ޕާޓީއަކީ ޕީޕީއެމް ކަމަށެވެ. ޕީޕީއެމްގެ މެމްބަރުން ރިޔާސީ އިންތިޚާބަށް ކުރަމުންދާ އުންމީދުތަކަށް ހަގީގީ ކުލަ ޖައްސައި، ރައީސް ޔާމީނަށް ކުރިމަތިވެފައިވާ ހާލަތުން ތަސައްލީއެއް ގެނެސްދެވޭނެ ވެރިޔަކީ ޤާސިމް ކަމަށެވެ.

ރައްޔިތުންނަށްޓަކައި އިންތިޚާބު ކާމިޔާބު ކުރެވޭނެ ފޯމިއުލާއެއް އަޅުގަނޑުމެން ނެރެދޭން އެބަޖެހޭ. މިގޮތުން ބަލާއިރު އިދިކޮޅު އެންމެ ބޮޑު ޕާޓީއެއް ކަމުގައި ފާހަގަ ކުރެވެނީ ޕީޕީއެމް. އަޅުގަނޑުމެންނަށް މިހާތަނަށް ރާއްޖޭގެ 45 ވަރަކަށް ރަށަށް ދަތުރު ކުރެވުނުއިރު، އަޅުގަނޑުމެންނަށް ފާހަގަކުރެވުނީ، ޕީޕީއެމްގެ ވަރަށް ގިނަ މެމްބަރުން އެބަ ބޭނުންވޭ، އުންމީދެއް. އެބޭފުޅުން އެބަބޭނުންވޭ ރިޔާސީ އިންތިޚާބަށް ހަތަރު އަހަރު، ފަސް އަހަރު ކުރި ފޮނި އުންމީދަށް ޖަވާބެއްލިބެން. އަޅުގަނޑު ދަންނަވާނީ ޕީޕީއެމްއަށް އޮތް އުންމީދަކީ ޤާސިމް އިބްރާހިމްއޭ.

– އަމީން ވިދާޅުވިއެވެ.

އަމީން ވިދާޅުވީ އިދިކޮޅު ފަރާތްތަކުން، ވަކިން ޚާއްސަކޮށް އިދިކޮޅު ލީޑަރުން މިދަނޑިވަޅުގައި އެކައްޗެއް ކިޔައި އެއް އަޒުމެއްގައި މަސައްކަތް ކުރަންޖެހޭކަމަށެވެ. އެމަސައްކަތް ކުރެވޭނީ އެއް ލީޑަރެއްގެ ފަހަތުގައި ތިބެގެން ކަމަށެވެ. މިހާރުގެ ވެރިކަން ބަދަލުކޮށް، ރައްޔިތުން އެދޭފަދަ ވެރިކަމެއް ޤާސިމް ކުރެވޭނީ ޤާސިމަށް ފުރުސަތު ލިބިގެންކަމަށް އަމީން ވިދާޅުވިއެވެ

މިވަގުތު ޕީޕީއެމްގެ ރިޔާސީ ކެނޑިޑޭޓަށް ދިމާވެފައިވާ ހާލަތުން މިންޖުވެ، އަރައިގަތުމަށް އެބޭފުޅުން އެދޭފަދަ މިންޖުވުމަކަށް ދެވެން އޮތީ ޤާސިމް އިބްރާހިމަށް މިފުރުސަތު ހުޅުވިގެން. އެއީ އަޅުގަނޑުމެންގެ ތެރެއިން ވަރަށް ގިނަ ބަޔަކު ގަބޫލު ކުރާކަމެއް. އެހެންވީމާ އަޅުގަނޑު ދަންނަވާނީ އިދިކޮޅުގަ މަސައްކަތް ކުރާ ހުރިހާ ބޭފުޅުންގެ އުންމީދު ހަގީގަތަކަށް ވާނީ ޤާސިމް އިބްރާހިމަށް މިފުރުސަތު ދެވިގެންނޭ.

– އަމީން ވިދާޅުވިއެވެ.

އަމީން ވިދާޅުވީ ކޮންމެ މީހަކީވެސް ވެރިކަމުގެ އުންމީދު ދެކޭނެ މީހެއް ކަމަށެވެ. ވެރިކަމަކީ ތާއަބަދު ކުރިއަށް ޖެހުމުގެ ބަދަލުގައި ފަހަތަށް ޖެހެންވެސް އެގެންޖެހޭ ކަމެއްކަމަށް އަމީން ވިދާޅުވިއެވެ. އަމީން ވަނީ މިހާތަނަށް އެ ނަމޫނާ ކެތްތެރި ކަމާއިއެކު ދެއްކި ހަމައެކަނި ލީޑަރަކީ ޤާސިމް ކަމަށެވެ.

ކުރިއަށް އޮތް ތަނުގައި ސިޔާސީ ލީޑަރުން ގޮތްދޫނުކޮށް ތިއްބެވުމުގެ ބަދަލުގައި ގޮތްދޫކޮށް، އިންތިޚާބު ކާމިޔާބު ކުރެވޭނެ ފޯމިއުލާއަކަށް މަސައްކަތް ކުރުމަކީ މުހިންމު ކަމެއްކަމަށް އަމީން ވިދާޅުވިއެވެ. އަމީން މިހެން ވިދާޅުވެފައިވާއިރު، އިދިކޮޅު ލީޑަރުންގެ ތެރެއިން، ޤާސިމާއި، ނާޒިމް އަދި ރައީސް ނަޝީދު ބޭއްވި މަޝްވަރާތަކަށްފަހު ވަނީ އެއް ކެނޑިޑޭޓަކު ނެރުމަށް އެއްބަސް ވެފައެވެ. ނަމަވެސް ޕީޕީއެމްއިން ބުނެފައިވަނީ އެކެނޑިޑޭޓަކަށް ވާންޖެހޭނީ ރައީސް ޔާމީންކަމަށެވެ.

ރައީސް ޔާމީން މިވަގުތު ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ޤާނޫނުގައި ބުނެފައިވާގޮތުން 12 މަސް ދުވަހަށްވުރެ ދިގު ޖަލު ހުކުމެއް ތަންފީޒު ކުރާ މީހަކަށް އިންތިޚާބުގައި ވާދަ ނުކުރެވޭނެއެވެ. އިންތިޚާބުގައި ކުރިމަތިލުމަށް އާދީއްތަ ދުވަހު ހުޅުވާލާއިރު، ކުރިމަތިލުމުގެ އެންމެ ފަހު ތާރީހަކީ އަންނަ މަހުގެ 7 އެވެ. ރައީސް ޔާމީންގެ އިސްތިއުނާފްގެ ކަންކަން ކުރިއަށްދާ ގޮތަށް ބަލާއިރު މިމުއްދަތުގައި އެމަނިކުފާނުގެ އިސްތިއުނާފްގެ މައްސަލަ ނިމި ވާދަކުރެއްވުމުގެ ފުރުސަތު ކުޑައެެވެ