ކުރިއަށް އޮތް ރިޔާސީ އިންތިޚާބުގައި ވެރިކަމަށް އެންމެ ލާއިގު ބޭފުޅަކީ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ކަމަށް ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާ ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވަދާކުރެއްވުމަށް އެ ޕާޓީގެ ރިޔާސީ ޓިކެޓް، ޖޭޕީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ޤާސިމް އިބްރާހީމާއި ހަވާލުކުރީ މިދިޔަ މަހު ބޭއްވި ޚާއްސަ ރަސްމިއްޔާތެއްގައެވެ.
ޤާސިމަށް ތާއީދު ކުރާކަން ހާމަކޮށް މުސްތަފާ ވިދާޅުވީ ޤާސިމަކީ ދައުލަތެއް ހިންގުމުގެ ޤާބިލްކަން ހުންނެވި އެތަޖުރިބާ ހުރި ބޭފުޅެއްކަމަށެވެ. ދައުލަތުގެ މުހިންމު މަޤާމުތައް ފުރުއްވާފައިވާ ޤާސިމަކީ ވެރިކަން ކުރެވޭނެ ޤާބިލްކަން ހުންނެވި މީހެއްކަމަށް މުސްތަފާ ވިދާޅުވިއެވެ.
ވެރިކަމަށް އެންމެ ލާއިގު ބޭފުޅަކީ ޤާސިމް އިބްރާހިމް. ޤާސިމް އެއީ އޭނައަށް މީހަކު އަނިޔާއެއް ދިނަސް ހިތުގައި އަޅައިގެން އުޅޭ މީހެއް ނޫން. ޤާސިމަކީ ސަރުކާރެއް ހިންގުމުގެ ފުރިހަމަ ތަޖުރިބާ ހުރި ބޭފުޅެއް. ޤާސިމް ހުރީ ގަވަރުނަރު ކަމާއި ފިނޭންސް މިނިސްޓަރު ކަމާއި މަޖިލިސްގެ ރައީސްކަން ކޮށްފަ. މިފަހަރަކީ ޤާސިމް އިބްރާހިމްގެ ފަހަރު.
– މުސްތަފާ ވިދާޅުވިއެވެ.
ރިޔާސީ ޓިކެޓާއި ޙަވާލުވެވަޑައިގަތުމަށްފަހު ޕާޓީގެ މެންބަރުންނާއި މުޚާތަބުކުރައްވާ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހީމް ވަނީ ޖުމްހޫރީ ޕާޓީގެ ވެރިކަމެއްގައި އެމަނިކުފާނު އިސްކަންދެއްވާނެ ކަންތައްތަކާއި، ގެންގުޅުއްވާނެ ސިޔާސަތުތަކުގެ މައްޗަށް އަލިއަޅުއްވާލައްވާ ވާހަކަދައްކަވާފައެވެ.
ޤާސިމް އިސްވެ ހުންނަވާ ޖޭޕީން ވަނީ 2008 އަދި 2013 ގެ ރިޔާސީ އިންތިޚާބުގައިވެސް ވާދަކޮށްފައެވެ. މިހާތަނަށް ޤާސިމަށް ވެރިކަމަށް ނާދެވުނު ނަމަވެސް ޤާސިމާއި ނުލައި އެއްވެސް ބޭފުޅަކަށް މިހާތަނަށް ވެރިކަމަށް އާދެވިފައި ނުވެއެވެ.
