ރިޔާސީ އިންތިހާބުގައި ވާދަކުރައްވާ ޖޭޕީގެ ލީޑަރު ގާސިމް އިބްރާހިމް، އަދި އެމްއެންޕީގެ ލީޑަރު މުހައްމަދު ނާޒިމް، އާ ސިޔާސީ ޕާޓީއެއް އުފައްދަވައިގެން މަސައްކަތް ކުރައްވަމުން ގެންދަވާ މަޖިލީހުގެ ރައީސް މުހައްމަދު ނަޝީދުގެ ބައްދަލުވުން ޖޭޕީގެ މައި އޮފީސް މ.ކުނޫޒްގައި ފަށައިފިއެވެ.
މިބައްދަލުވުމުގައި ތިން ލީޑަރުންނާއި، އެޕާޓީތަކުގެ އިސްބޭފުޅުން ވަނީ ބައިވެރިވެފައެވެ. މިއީ އިިދިކޮޅު ތިން ޕާޓީއަކުން އެއް މޭޒެއްގައި މިފަަހަރުގެ ރިޔާސީ އިންތިޚާބާއި ގުޅޭގޮތުން ކުރިއަށް ގެންދާ ފުރަތަމަ މަޝްވަރާއެވެ. މިބައްދަލުވުމަށްފަހު ނޫސްވެރިންނަށް މައުލޫމާތު ދެއްވާނެކަމަށް ބެލެވެއެވެ.
ނާޒިމާއި ގާސިމް އިއްޔެވެސް ބައްދަލުކުރެއްވިއެވެ. ގާސިމުގެ ސަން އައިލެންޑު ރިސޯޓުގައި ކުރިއަށްދިޔަ އެ ބައްދަލުވުމުގައި މަޝްވަރާކުރި ކަންކަމުގެ މާބޮޑު ތަފުސީލެއް ދެ ޕާޓީންވެސް ހާމަކޮށްފައެއް ނުވެއެވެ. ނަމަވެސް ދެކެވުނީ ކުރިއަށް އޮތް ރިޔާސީ އިންތިހާބުގެ ވާހަކަ ކަމަށް ޖޭޕީން ވަނީ ބުނެފައެވެ.
މިބައްދަލުވުމުގައި އިދިކޮޅު ޕީޕީއެމްއިން ބައިވެރި ވެފައި ނުވެއެވެ. އެޕާޓީން ބުނެފައިވަނީ އެޕާޓީން އެއްވެސް ކެނޑިޑޭޓެއް އަދި ޕާޓީއެއްގެ ފަހަތަށް މިފަހަރުގެ އިންތިޚާބުގައި ނާރާނެކަަމަށެވެ.
މިހާރުގެ ސަރުކާރު ކޯލިޝަނުގައިވެސް އޮތް ޖޭޕީއިން އެމްޑީޕީއާ އެކު ކޯލިޝަން ހަދައިގެން 2023 ގައި ވާދަކުރުމުގެ ދައުވަތު ވެސް ރައީސް އިބްރާހިމް މުހައްމަދު ސޯލިހު ގާސިމަށް ދެއްވިއެވެ. އެކަމަކު ޖޭޕީގެ ކޮންގްރެސްއިން ނިންމީ އިންތިހާބުގައި ވަކިން ވާދަކުރާށެވެ. ޖޭޕީގެ ރިޔާސީ ޓިކެޓާއި ހަވާލުވެވަޑައިގެން ގާސިމް ވެސް ވަނީ ކެމްޕެއިން ފައްޓަވާފައެވެ.
ނަޝީދު ވަކިން ޕާޓީއެއް އުފައްދަވަން މަސައްކަތް ކުރެއްވީ އެމްޑީޕީގެ ރިޔާސީ ޕްރައިމަރީގައި ލިބުނު ނާކާމިޔާބީއާ އެކުއެވެ. އެމްޑީޕީގެ ރައީސް ކަމުގައި ހުންނަވާ އުފެއްދި ޑިމޮކްރެޓްސްއާ ނަޝީދު ގުޅުނީ ރަސްމީކޮށް ރަޖިސްޓްރީ ކުރެވުމުންނެވެ. އެ ޕާޓީންވެސް ރިޔާސީ އިންތިހާބަށް ކެންޑިޑޭޓެއް ނެރޭނެކަން ވަނީ އިއުލާންކޮށްފައެވެ.
