ކުރިއަށް އޮތް ރިޔާސީ އިންތިޚާބުގައި އެކީގައި މަސައްކަތް ކުރުމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމްއާއި، އެމްޑީޕީގެ ކުރީގެ ރައީސް މުހައްމަދު ނަޝީދާއި، އެމްއެންޕީގެ ރިޔާސީ ކެނޑިޑޭޓް ކާނާލް ނާޒިމް މިއަދު މަޝްވަރާ ބައްދަލުވުމެއް ބޭއްވުމަށް ނިންމައިފިއެވެ.
ރިޔާސީ އިންތިޚާބުގައި އިދިކޮޅު ފަރާތްތަކުން ގުޅިގެން މަސައްކަތް ކުރުމަށް އެކި މަޝްވަރާތަކާއި ބައްދަލުވުންތައް މިހާތަނަށް ވަނީ ބާއްވާފައެވެ. ނަމަވެސް މާބޮޑު އެދެވޭ ކުރިއެރުމެއް މިމަޝްވަރާ ތަކުގައި ވަނީ ނުހޯދިފައެވެ. ހުރިހާ ޕާޓީއަކުންވެސް މިހާތަނަށް ކުރި މަޝްވަރާތަކުގައި ނިންމާފައިވަނީ ފުރަތަމަ ބުރުގައި ވާދަ ކުރުމަށެވެ.
ރިޔާސީ އިންތިޚާބަށް އެކުގައި މަސައްކަތް ކުރުމުގެ ފޯމިއުލާއެއް ނެރުމުގެ މަޝްވަރާތައް ޖޭޕީގެ ލީޑަރު ގާސިމް އިބްރާހިމް އިސްވެ، އިއްޔެ އެމްއެންޕީއާ އެކު ކުރެއްވުމަށް ފަހު، ގާސިމާއި ނާޒިމް އަދި ކުރީގެ ރައީސް މުހައްމަދު ނަޝީދު އެކުގައި މިއަދު މާފަންނު ކުނޫޒްގައި ބައްދަލުވުމެއް ބޭއްވުމަށް ހަމަޖެހިފައިވާކަމުގެ މައުލޫމާތު ވަނީ ލިބުފައެވެ. މިބައްދަލުވުން އޮތީ މިއަދު މެންދުރު 1 ޖަހާއިރުއެވެ.
މިމަޝްވަރާތަކުގައި އިިދިކޮޅު އެންމެ ބޮޑު ޕާޓީ ޕީޕީއެމްއިން ބައިވެރިވާކަމެއް އެނގިފައި ނުތެވެ. އެޕާޓީން ބުނަމުންދަނީ އިންތިޚާބުގައި އެއްވެސް ޕާޓީއެއްގެ ފަހަތަށް އެޕާޓީން ނާރާނެކަމަށެވެ. ރިޔާސީ އިންތިޚާބުގައި އިދިކޮޅު ފަރާތްތަކުން އެއް ކެނޑިޑޭޓަކު ނެރުމާއި ގުޅޭގޮތުން މިހާތަނަށް ރަސްމީ ސިފައެއްގައި އަދި މަޝްވަރާ ކޮށްފައިނުވެއެވެ.
ދާދި ފަހުން ދަ ޑިމޮކްރެޓްސްއަށް ސޮއިކުރެއްވި ނަޝީދު ބ. ތުޅާދޫގައި ބޭއްވި އެ ޕާޓީގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، ވެރިކަމަށްޓަކައި ކުރާ އެއްވެސް މަސައްކަތެއްގައި ބައިވެރިއެއް ނުވެވޭނެ ކަމަށާއި، ވެރިކަން ލިބިދާނެ ކަމަށެވެ. އަދި ދެވަނަ ދައުރެއްގެ ބޭނުމުގައި ކޮންމެ ފަދަ ކަމެއް ކުރުން އެއީ ރާއްޖެއަށް ރަނގަޅު ކަމެއް ނޫން ކަމަށްވެސް ނަޝިދު ވިދާޅުވިއެވެ.
