2018 ގެ ރިޔާސީ އިންތިޚާބުގެ ކެމްޕޭނުގައި ވައުދުވި ވައުދުތަކުގެ 90 އިންސައްތަ މަސައްކަތް ނިމި، ބާކީ 10 އިންސައްތަ ކާމިޔާބު ކުރުމުގެ މަސައްކަތްތައް ހިނގަމުން އެބަދާ ކަމަށް ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ.
2023 ވަނަ އަހަރުގެ ރިޔާސީ އިންތިޚާބުގެ ކެމްޕޭނު ދަތުރުފުޅުތަކުގެ ތެރެއިން ވ. ކެޔޮދޫގައި ސަޕޯޓަރުންނާ މުހާތަބުކޮށް ވާހަކަފުޅު ދައްކަވަމުން ރައީސް ޞާލިހް ވިދާޅުވީ 2018 ގެ ރިޔާސީ އިންތިޚާބުގެ ކެމްޕޭންގައި ވައުދުވީ ރައްޔިތުންނަށް ބޭނުންޖެހިފައިވާ އަސާސީ ޙިދުމަތްތައް ރައްޔިތުންނަށް ފޯރުކޮށްދިނުން ކަމަށެވެ. އެގޮތުން މިހާހިސާބަށް އައިއިރު ހިތްހަމަޖެހޭވަރުގެ މަސައްކަތެއް ކުރެވިފައިވާ ކަމަށް ރައީސް ވިދާޅުވިއެވެ.
ރައީސް ޞާލިހް ވިދާޅުވީ މިހުރިހާ ކަމަކަށް ވާސިލުވެވުނީ ރާއްޖޭގައި ގާއިމުކުރެވުނު ހަމަޖެހިމާއި އަމާންކަމުގެ ސަބަބުން ކަމަށެވެ. އަދިއެކަން ކުރެވުނީ ގިނަބަޔަކު އެކުވެގެން ސަރުކާރެއް ހިންގުމަށް ނިކުތުމުން ކަމަށާއި އަދި އެކަން ދެމެހެއްޓުނީ އެ ކޯލިޝަން ދެމެހެއްޓުމުން ކަމަށެވެ.
ތަފާތު ހިޔާލުގެ މީހުންނާއެކު މަސައްކަތްކުރުމަކީ ބައެއް ފަހަރު ފަސޭހަކަމަކށް ނުވެދާނެކަން ފާހަގަކޮށް ރައިސް ސޯލިހް ވިދާޅުވީ ރާއްޖޭގެ ހާލަތު އޮތީ އެގޮތަށް ކަމަށާްއި، ގިނަބައެއްގެ ހިޔާލު އެއްތަންކޮށް އޭގެތެރެއިން އެންމެންނަށް ރަނގަޅުގޮތް ހޯދައިގެން މަސައްކަތްކުރުމުން ހަމަޖެހިމާ އަމާންކަން ގެނެސްދެވުނު ކަމަށެވެ.
ކުރިއަށްއޮތް ތަނުގައިވެސް ރާއްޖޭގައި ހަމަޖެހިގެން މަސައްކަތެއް ކުރެވޭނީ ގިނަބަޔަކުން ގުޅިގެން ވެރިކަމެއް ހިންގައިގެން ކަމަށް ގަބޫލުކުރައްވާ ކަމަށް ރައިސް ސޯލިހް ވިދާޅުވިއެވެ.
