އިންގްލަންޑް އަދި ޓޮޓްނަމް ހޮޓްސްޕާގެ ކެޕްޓަން ހެރީ ކޭން، ޖަރުމަނުގެ ބަޔާން މިއުނިކާ ގުޅޭނެކަމުގެ ޔަގީންކަން ބޮޑު ކަމަށް އެ ކުލަބުގެ ރައީސް އުއީ ހޯންސް ވިދާޅުވެއްޖެއެވެ.
އިނގިރޭސި މީޑިއާ ރިޕޯޓުތައް ބުނާގޮތުގައި ޓްރާންސްފާއާ ގުޅޭގޮތުން ބަޔާން އާއި ޓޮޓްނަމްއާ ދެމެދު އެއްބަސްވުމަކަށް އަދި މިހާތަނަށް ނާދެވުނު ނަމަވެސް، އޭނާ ބަޔާންއާ ގުޅޭނެކަމުގެ އިތުބާރު އެ ކުލަބަށް އެބައޮތް ކަމަށެވެ.
އުމުރުން 29 އަހަރުގެ ކޭންގެ ޓްރާންސްފާއަށް ހުށަހެޅި 70 މިލިއަން ޔޫރޯއަށް ޓޮޓްނަމުންން އެއްބަސްވެފައެއް ނުވެއެވެ. ކޭން ބަޔާންއަށް ގެންދަން ޓްރާންސްފާ ފީއެއްގެ ގޮތުގައި ޓޮޓްނަމުން މަދުވެގެން 100 މިލިއަން ޔޫރޯ ބޭނުންވާ ކަމަށްވެސް ރިޕޯޓުތައް ބުނެއެވެ.
ބަޔާންގެ ރައީސް ވިދާޅުވީ އެ ކުލަބާ ގުޅެން ކޭން ބޭނުންވާ ކަމަށާއި އެ ވިސްނުމުގައި ކޭން ހުރެއްޖެނަމަ އެއީ ވުން ވަރަށް ގާތް ކަމެއް ކަމަށެވެ. އަދި މި ދަނޑިވަޅުގައި ޓޮޓްނަމުން ކޭން ހިފަހައްޓާނަމަ އޭގެ ގެއްލުން މާ ބޮޑުވާނެކަމަށް ގަބޫލުކުރައްވާ ކަމަށްވެސް ހޯންސް ވިދާޅުވިއެވެ.
ކޭން މިހާތަނަށް ޓޮޓްނަމްގައި ހޭދަކުރި މުއްދަތުގައި ކާމިޔާބީއެއް ހޯދިފައެއް ނުވެއެވެ. މިއީ އެހެން ކުލަބަކަށް ބަދަލުވާން ކޭން ބޭނުންވާ މައިގަނޑު ސަބަބުކަމަށް ރިޕޯޓުތައް ބުނެއެވެ. އަދި ކުރިއަށް އޮތް ސީޒަންގައި ޔޫރަޕްގެ މުބާރާތެއްގައި ޓޮޓްނަމަށް ނުކުޅެވުމަކީ ބަޔާނަށް އަންނަން ކޭން ބޭނުންވާ އެންމެ މުހިންމު ސަބަބު ކަމަށްވެސް ހޯންސް ވިދާޅުވިއެވެ.
ޓޮޓްނަމްއާއެކު ކޭން ހަދާފައިވާ އެއްބަސްވުން ހަމަވާނީ އަންނަ އަހަރުގައެވެ.
