ބޮލީވުޑްގެ ރީތި ބަތަލާ ކެޓްރީނާ ކައިފް އާއި ސައުތުގެ އެފަދަ ދެވަނެއް ނުވާ ކާމިޔާބު އެކްޓަރ ވިޖޭ ސެތުޕަތީ އެކުގައި ފެނިގެންދާ ފިލްމް "މޭރީ ކްރިސްމަސް" ގެ ޕޯސްޓަރުތަކެއް ދައްކާލައިފިއެވެ.
މިދިއަަހަރުގެ މެދުތެރޭގައި ޝޫޓިންގ ފެށި މި ފިލްމުގެ ބޮޑު ބައެއް މިހާރު ޝޫޓް ކޮށްފައިވާ އިރުގައި ކުރިން ފިލްމު ރިލީޒްކުރަން ތާވަލް ކޮށްފައި އޮތީ މި އަހަރުގެ ކްރިސްމަސް އަށެވެ. ކޮންމެ އަހަރެއްގައި ވެސް ކްރިސްމަސް ފާހަގަ ކުރަނީ ޑިސެމްބަރު މަހުގެ 25 ވަނަ ދުވަހުއެވެ.
ނަމަވެސް ޕޯސްޓަރު އާއި އެކުގައި ފިލްމް ރިލީޒް ކުރާނެ ކަމަށް ބުނެފައިވަނީ ޑިސެމްބަރު 15 ގަ އެވެ. މި ފިލްމުގެ ކުރިން ނޮވެމްބަރު މަހުގެ މެދުތެރޭގައި ކެޓްރީނާ އާއި ސަލްމާން ޚާންގެ "ޓައިގާ 3″ ސިނަމާތަކަށް އަންނާނެ އެވެ.
View this post on Instagram
"ރޭސް" ފަދަ ކާމިޔާބު ފިލްމުތަކެއް ގެނެސްދިން ރަމޭޝް ތައުރާނީ ޕްރޮޑިއުސްކޮށް، ސްރީރާމް ރަގްވަން ޑައިރެކްޓްކުރާ "މޭރީ ކްރިސްމަސް" އަކީ ތުރިލާއެކެވެ. ސްރީރާމް އެންމެ ފަހުން ގެނެސްދިން ފިލްމަކީ ތިން ނެޝަނަލް އެވޯޑް ހޯދި 2018 ގެ ބްލެކް ކޮމެޑީ ކްރައިމް ތުރިލާ "އަންދާދުން" އެވެ.
"މޭރީ ކްރިސްމަސް" އަކީ އިންޓަވަލެއް ނުހިމެނޭ ގޮތަށް ހަދާ 90 މިނިޓްގެ ފިލްމެކެވެ. ބޮލީވުޑް ހަންގާމާއިން ބުނިގޮތުގައި މި ފިލްމު ސްރީރާމް ހަދަނީ ކުރު ވާހަކައެއްގެ މައްޗަށް ބިނާކޮށެވެ.
