ކުރީގެ ރައީސް އަދި އިދިކޮޅު ޕީޕީއެމްގެ ރިޔާސީ ކެނޑިޑޭޓް ރައީސް ޔާމީނަށް އިންސާފު ލިބުން ލަސްވުމުގެ ޒިންމާ ރައީސް އިބްރާހިމް މުހައްމަދު ޞާލިހު ނަންގަވަން ޖެހޭކަމަށް އެމަނިކުފާނަށް ބޮޑުބޭބެ ވިދާޅުވާ ޕީޕީއެމްގެ ނައިބް ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.
ވ. އާރަށް ކުއްޔަށް ދިނުމުގައި ރިޝްވަތު ގަބޫލުކޮށް، އެ ފައިސާ ލޯންޑާ ކުރިކަން ސާބިތުވެ ޔާމީނުގެ މައްޗަށް އިއްވާފައިވާ 11 އަހަރުގެ ޖަލު ހުކުމްގެ އިސްތިއުނާފު މައްސަލަ މި އަހަރުގެ ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަކުރެއްވޭނެ މުއްދަތު އޮއްވައި ނިންމައި ދިނުމަށް އެދި އިދިކޮޅުން އަންނަނީ ތަކުރާރުކޮށް މަސައްކަތް ކުރަމުންނެވެ.
ޣައްސާން ކުރެއްވި ޓްވީޓެއްގައި ވިދާޅުވީ ދިވެހި ދައުލަތުގެ އެންމެ އިސްފަރާތަކީ ރައީސުލްޖުމްހޫރިއްޔާ ކަމަށެވެ. ދައުލަތުގެ އެއްވެސް ބާރެއްގެ ހިންގުން ހީނަރު ވިޔަސް އަވަސް ކުރަން ގާނޫނުގެތެރެއިން އެއްގުމަކީ ރައީސްގެ މަގާމުގެ މަސްއޫލިއްޔަތެއް ކަމަށް ވިދާޅުވިއެވެ.
ދިވެހި ދައުލަތުގެ އެންމެ އިސް ފަރާތަކީ ރައީސުލްޖުމްހޫރިއްޔާ. ދައުލަތުގެ އެއްވެސް ބާރެއްގެ ހިންގުން ހީނަރު ވިޔަސް އަވަސް ކުރާން ޤާނޫނުތަކުގެ ތެރެއިން ރައީސުލްޖުމްހޫރިއްޔާ އެންގުމަކީ މަޤާމުގެ މަސްއޫލިއްޔަތެއް. ރައީސް ޔާމީން އަށް އިސްނާފު ލިބުން ލަސްވުމުގެ ޒިންމާ ރައީސް ޞާލިހު އުފުއްލަވަން ޖެހޭނެ.
– ޣައްސާން ވިދާޅުވިއެވެ.
ޔާމީންއާ ދެކޮޅަށް ކްރިމިނަލް ކޯޓުން ކުރި ހުކުމަށް ނިހާއީ ހުކުމެއް ނައިސް ދިގުލައިގެން ދިއުމުގެ ފުރުސަތު އޮތުމުން އެމަނިކުފާނަށް ރިޔާސީ އިންތިހާބުގައި ވާދަކުރެއްވި ދާނެތޯ ވަނީ ވަރަށް ބޮޑަށް ސުވާލު އުފެދިފައެވެ. އެ ސުވާލު އުފެދެނީ ރައީސް ޔާމިންގެ ޖަލު ހުކުމް އިސްތިއުނާފްގެ މައްސަލަ އިންތިހާބުގެ ކުރިން ބަލައި ނިމޭނެ ކަމަށް ނުބެލެވޭތީއެވެ.
އިންތިޚާބުގައި ޔާމީނަށް ވާދަކުރެއްވޭނެ ކަމާ މެދު ސުވާލު އުފެދީފައިވީ ނަމަވެސް، އެހެން ކެންޑިޑޭޓަކު ނެރުމަށް ނުވެސް ވިސްނާނެ ކަމަށް އިދިކޮޅު ޕީޕީއެމް/ޕީއެންސީގެ ލީޑަޝިޕުގެ ބޭފުޅުން ގެންދަވަނީ ތަކުރާރުކޮށް ވިދާޅުވަމުންނެވެ.
ރިޔާސީ އިންތިޚާބުގައި ވާދަކުރަން ކުރިމަތިލާން ބޭނުންވާ ފަރާތްތަކަށް މިމަހުގެ 23 ން އޮގަސްޓް 7 ގެ ނިޔަލަށް ކުރިމަތިލާން ހުޅުވާލާނެއެވެ. ކުރިން ޤާނޫނުގައި އޮތް ގޮތުން ކެންޑިޑޭޓެއްގެ ގޮތުގައި ކުރިމަތިލުމުގެ ފުރުޞަތު ލިބެނީ ޖުލައިމަހުގެ 23 ވަނަ ދުވަހުން ފެށިގެން އޮގަސްޓް މަހުގެ 3 ވަނަ ދުވަހުގެ ނިޔަލަށެވެ. ނަމަވެސް ޤާނޫނަށް ހުށަހަޅާފައިވާ އިޞްލާޙް ފާސްވެފައިވާއިރު، މި މުއްދަތު 14 ދުވަހަށް އިތުރު ކުރެވިގެން ގޮސްފައި ވެއެވެ.
އިންތިޚާބުގައި ވާދަކުރައްވާ ކެންޑިޑޭޓުންގެ މެދުގައި ގުރުއަތުލުން އޮންނާނީ، ކެމްޕޭން ކުރުމަށް 30 ދުވަސް ލިބޭގޮތަށް، އޮގަސްޓް 9 ވާ ބުދަ ދުވަހުއެވެ.
