އެމްޑީޕީން ވަކިވެ، އެޕާޓީ ރޫޅާލާނެކަމަށް ކިތަންމެ ވަރަކަށް އިންޒާރުދީ މަސައްކަތް ކުރި ނަމަވެސް ރައީސް ނަޝީދަށް އެކަން ނުކުރެވޭނެކަމަށް އެމްޑީޕީގެ ކުރީގެ ރައީސްކަން ކުރެއްވި ޑރ.އިބްރާހިމް ދީދީ ވިދާޅުވެއްޖެއެވެ.

އޭނާ މިހެން ވިދާޅުވީ ކަށިކެޔޮ ގަނޑެއްހެން އެމްޑީޕީގެ ފޫ ވައް ވެއްޓިއްޖެ ކަމަށާއި، އެ ޕާޓީ ރޫޅާލާއްވާނެ ކަމަށް އެމްޑީޕީގެ ކުރީގެ ރައީސް އަދި ކުރީގެ ރައީސް މުހައްމަދު ނަޝީދު ދަ ޑިމޮކްރެޓްސް އަށް ސޮއި ކުރެއްވުމަށްފަހު ދެއްކެވި ވާހަކަތަކަށް ރައްދު ދެއްވައި ކުރެއްވި ޓުވީޓުގައެވެ.

ރައީސް ނަޝީދު ވިދާޅުވެފައިވަނީ ވިދާޅުވީ އެމްޑީޕީ އުފެއްދުމުގެ މައިގަނޑު އަމާޒަކަށްވީ ހަރުދަނާ އުސޫލުތަކާއި ހަމަތަކެއްގެ ތެރެއިން ރައްޔިތުންގެ ހާލަތު ރަނގަޅު ކުރުން ކަމަށެވެ. އެކަމަކު އެ އުސޫލުތައް އެމްޑީޕީން ގެއްލުވާލުމުން، ޕާޓީ ދޫކުރައްވައި ޑިމޮކްރެޓްސް އުފައްދަވަން މަޖުބޫރުވި އެ ހަމަތައް ހިފެހެއްޓުމަށްޓަކައި ކަމަށެވެ.

ނަޝީދުގެ ވާހަކަތަކަށް ރައްދު ދެއްވައި ޑރ.ޑީޑީ ވިދާޅުވީ އެމްޑީޕީއަކީ ފުރިފައިވާ ޕާޓީއެއް ކަމަށެވެ. އެމްޑީޕީ ރޫޅާލާނެކަމަށް އިންޒާރު ދެއްވިޔަސް މިހާރު އެކަމެއް ނުވާނެކަމަށް ޑީޑީ ވިދާޅުވިއެވެ. އަދި ނަޝީދަށް އޮތް އެންމެ ރަނގަޅު ގޮތަކީ ދެންވެސް ޑިމޮކްރަޓިކް ހަމަތަކަށް ތަބާވެ ޑިމޮކްރަޓިކް އުސޫލުން ކަންކަން ކުރުންކަމަށް ޑީޑީ ވިދާޅުވިއެވެ.

އެމްޑީޕީއަކީ ފުރިފައި އޮތް ބިޔަ ބޮޑު ޕާޓީއެއް! ކިތަންމެ ވަރަކަށް ކޯފާ އިސްކުރައްވާ ރޫޅާލާނެކަމަށް އިންޒާރު ދެއްވިޔަސް ފުރިފަ ހުންނަ އެއްޗިހި ގުޑުގުޑެއް ނާޅާނެ ފަދައިން އެމްޑީޕީ އެއް ނުގުޑާނެ! ދެންވެސް ޑިމޮކްރަސީގަ ކޮޅުފައިން ޖައްސަވައި ޢާންމު އުސޫލުތަކަށް ރެސްޕެކްޓް ކުރެއްވުން މާ ރަނގަޅުވާނެ.

– އެމްޑީޕީގެ ކުރީގެ ރައީސްކަން ކުރެއްވި ޑރ.ޑީޑީ ވިދާޅުވިއެވެ.

އެމްޑީޕީ ރޫޅާލާނެކަމަށް ނަޝީދު ވިދާޅުވުމުން، އެމްޑީޕީގެ ޗެއާޕާސަން ފައްޔާޒުވެސް ވަނީ ނަޝީދަށް ރައްދު ދެއްވާފައެވެ. ފައްޔާޒު ވިދާޅުވީ ޑިމޮކްރެޓްސްގެ ނަމުގައި ސިޔާސީ ޕާޓީއެއް ހަދައި ހަމައެކަނި ސިޔާސަތަކީ އެމްޑީޕީގެ ކުރީގެ ރައީސް މުހައްމަދު ނަޝީދަށް ސިޔާސީ ބާރުވެރިކަން ހޯދަން ނަފްރަތު އުފެއްދުން ކަމަށް ވިޔަސް އެ މަގްސަދު ހާސިލްކުރަން އެމްޑީޕީ ރޫޅާޅައި ފުނޑުފުނޑުކޮށްލިޔަ ނުދޭނެ ކަމަށެވެ.