އެމްޑީޕީ އުފެއްދި މަޤުސަދު މިއަދު އޮތީ މުޅިން ގެއްލިފައިކަމަށާއި، އެމްޑީޕީ ރޫޅާލާނެކަމުގެ ޔަގީންކަން ރައީސް ނަޝީދު ދެއްވައިފިއެވެ.

އެމްޑީޕީގެ ރައީސް ކަމުގެ މަޤާމުގައި ހުންނެވުމަށްފަހު އެޕާޓީން ވަކިވެ، ދަ ޑިމޮކްރެޓްސްގެ ނަމުގައި އުފެއްދި ސިޔާސީ ޕާޓީއަށް ސޮއި ކުރެއްވުމަށްފަހު ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެމްޑީޕީ އުފެދިގެން އައީ ވަކި އަސާސްތަކާއި ހަމަތަކުގެ ތެރެއިން ކަމަށެވެ. އެހަމަތަކާއި އުސޫލުތައް ދޫކޮށްލުމުން އެމްޑީޕީ ނޯންނާނެކަމަށް ރައީސް ނަޝީދު ވިދާޅުވިއެވެ.

ވާހަކަފުޅު ފައްޓަވަމުންވެސް ވާހަކަފުޅު ނިންމަވާލައްވަމުންވެސް ހަރު އަޑުން ތަކުރާރުކޮށް ރައީސް ނަޝީދު ވިދާޅުވީ އެމްޑީޕީ ރޫޅާލައްވާނެކަމަށެވެ. މިއަދު އެމްޑީޕީގެ ބޭނުމެއް ހިފޭނެ އެއްވެސް ގޮތެއް ނުފެންނަ ކަމަށާއި، ފެނިގެންދަނީ އެމްޑީޕީ ބައިބައިވެ ވިއްސި ވިހާލި ވަމުންދާތަންކަމަށް ރައީސް ނަޝީދު ވިދާޅުވިއެވެ.

އަޅުގަނޑުގެ ރަހުމަތްތެރިން އެމްޑީޕީގައި ތިބި. އަޅުގަނޑު ދަންނަވަން އޮތީ ތިޔަ ތިބީ ގޯސް ތަނުގައޭ. ތިޔަބޭފުޅުންނަށް ލޯނެއް ލިބިދާނެ. އަޅުގަނޑު އެމްޑީޕީ ރޫޅާލަން. ރޫޅާލާނަން. ރޫޅާލަނަން. ރޫޅާލާނަން. ތިޕާޓީގެ ކެޔޮކަނޑު ވެއްޓިއްޖެ. ތި ޕާޓީ ރޫޅާލާނަން.

– ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމްޑީޕީގެ ވެރިކަމެއް އޮވެ، ސިޔާސީ އެކި ވަޒީފާތަކުގައި ތިއްބެވި ބޭފުޅުން މިވަގުތީ ވަގުތުކޮށް ނުހަނު ވިސްނަން ޖެހޭކަމަށެވެ. ސިޔާސީ މަޤާމާއި، ބާރުވެރިކަމުގައި ލިބިދާނެ މަންފާތަކެއް އޮވެދާނެ ކަމަށާއި، ނަމަވެސް މީހާއަށާއި، ޤައުމަށް ލިބޭނެ މަންފާއެއް ނޯންނާނެކަމަށެވެ. އެމްޑީޕީން ގަބޫލުކުރި އަސާސްތަކާއި އުސޫލުތައް ފެންނަން އޮތީ ޑިމޮކްރެޓްސްގެ ތެރެއިން ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވި މިރޭ އެމަނިކުފާނާއިއެކު ސަރުކާރުގެ މަޤާމުތަކުގައި ތިއްބެވި ބޭފުޅުންގެ ތެރެއިން މަޤާމު ދޫކޮށްލައި ޑިމޮކްރެޓްސްއާއި ގުޅުނީ އެބޭފުޅުން ގަބޫލު ކުރެއްވި އަސާސްތައް ދޫކޮށްލާން ބޭނުން ނުވުމުން ނިންމި ހިތްވަރު ގަދަ ނިންމެވުމެއްކަމަށެވެ. ރައީސް ނަޝީދު ވަނީ މިރޭ ޑިމޮކްރަޓިކާއި ގުޅުނު އެންމެހާ ބޭފުޅުންނަށް މަރުހަބާ ދަންނަވާފައެވެ.