ކުރީގެ ރައީސް ޔާމީންގެ ޝަރީއަތް ހިނގަމުން ދަނީ އިންސާފުންކަމަށް ގަބޫލު ކުރާނެ އެއްވެސް ރައްޔިތަކު ނުހުންނާނެ ކަމަށް އެމަނިކުފާނުގެ ކެމްޕެއިން މެނޭޖަރު ގައުމީ އެއާލައިން، މޯލްޑިވިއަންގެ ކުރީގެ ފްލައިޓް އޮޕަރޭޝަންސް ޑިރެކްޓަރު މުހައްމަދު އަމީން ވިދާޅުވެއްޖެއެވެ.

އަމީން މިހެން ވިދާޅުވީ ރ.އަތޮޅު ފުއްގިރި މައްސަލައިގައި ދައުވާ އުފުލާފައިވާ އަހްމަދު ކްރިކް ރިޒާގެ މައްސަލަ ދައުލަތުން އަނބުރާ ގެންދިއުމަށްފަހު، ރައީސް ޔާމީންގެ މައްސަލަ އަދިވެސް ކުރިއަށް ގެންދަން ނިންމުމުންނެވެ. އަމީން ވިދާޅުވީ އަދުލްވެރިކަމާއި އިންސާފުވެރިކަމާއިއެކު ޝަރީއަތްކުރެވުމުގެ ހައްގު އެންމެންނަށް ވެސް ލިބިދޭންވާނެ ކަމަށެވެ.

ރައީސް ޔާމީންގެ ޝަރިއަތަކީ އިންސާފުވެރިކަމާއެކު ހިންގާ ޝަރީއަތެއްކަމަށް އެއްވެސް މީހަކު މިއަދު ގަބޫލެއް ނުކުރާނެ! ރޯމާދުވާލު ފެންނަން އޮތް އަދުގެ ހަގީގަތަކީ އަދުލުވެރިކަމާ އިންސާފުވެެރިކަމާއެކު ޝަރީއަތްކުރެވުމުގެ ހައްގު އެންމެންނަށްވެސް ގެއްލިއްޖެ ކަން! ކޮންމެ ރައްޔިތެކައްވެސް އިންސާފުން ޝަރީއަތްކުރެވުމުގެ ހައްގު ލިބިދޭންޖެހޭނެ!

– އަމީން ވިދާޅުވިއެވެ.

ދައުލަތުން ތުހުމަތު ކުރަނީ ފުއްގިރި މައްސަލައިގައި ރައީސް ޔާމީނަށް ރިޝްވަތު ދިނުމުގައި މެދުވެރިއެއްގެ ދައުރު އަދާކުރީ ކްރިކް ރިޒާ ކަމަށެވެ. ނަމަވެސް ދައުލަތުން ކްރިކް ރިޒާގެ މައްސަލަ އަނބުރާ ގެންދިއުމުން ރިޝްވަތު ދިންކަން ސާބިތުކޮށްނުދީ، ރިޝްވަތު ހިފުމުގެ ދައުވާ ރައީސް ޔާމީންގެ މައްޗަށް ސާބިތު ކުރާނެ ކަމަށް ބެލެވެއެވެ.

ރ.ފުއްގިރި މައްސަލައިގައި ރައީސް ޔާމީންގެ މައްޗަށް ކުރާ ދައުވާތަކުގެ އަޑުއެހުމެއް މިއަދު ހެނދުނު ކްރިމިނަލް ކޯޓުގައި ވަނީ ކުރިއަށް ގެންގޮސްފައެވެ.