މަރާލާފައިވާ ނޫސްވެރިޔާ ރިޟުވާންގެ މަރުގެ މައްސަލާގައި ތުހުމަތު ކުރެވޭ އިސްމާއިލް އަބްދުއްރަހީމް (އިސޫ) ބަންދުން ދޫކޮށްލައިފިއެވެ.

ކްރިމިނަލް ކޯޓުން މިއަދު އޭނާ ބަންދުން ދޫކޮށްލީ ޓެގް އަޅުވައި، ޕާސްޕޯޓް ހިފަހައްޓައި އަދި ޒަރޫރީ ބޭނުމަކަށް ނޫން ގޮތަކަށް ގެއިން ބޭރަށް ނުނުކުމެވޭ ގޮތަށް ޝަރުތުކޮށްފައެވެ. ޝަރީއަތް ނިމެންދެން ބަންދުކޮށްފައި ހުރި އިސޫ ބަންދުން ދޫކޮށްލަން ނިންމި ސަބަބެއް ސާފެއް ނުވެއެވެ.

މީގެ ކުރިން ވަނީ މި މައްސަލާގައި ތުހުމަތުވާ އަހްމަދު އިސްމާއިލް (އަހަނދު) ވެސް ބަންދުން ދޫކޮށްލައިފައެވެ. އޭނާގެ ފައިގައި މޮނިކޮމް ޓެގް އަޅުވައި މިހާރު ގެންދަނީ މޮނީޓާކުރަމުންނެވެ. އިސްމާޢީލް ޢަބްދުއްރަޙީމް އާދަމްގެ މައްޗަށް ކޮށްފައިވާ ދަޢުވާއަކީ ޓެރަރިޒަމް މަނާކުރުމުގެ ޤާނޫނުގެ ދަށުން, ޓެރަރިޒަމްގެ ޢަމަލެއް ކުރުމަށް އެހީތެރިވެދިނުމުގެ ކުށުގެ ދަޢުވާއެވެ.

އޭނާގެ މައްޗަށް މި ދަޢުވާ ކުރަނީ 2014ވަނަ އަހަރުގެ އޮގަސްޓު މަހުގެ ތެރޭގައި އަޙްމަދު ރިޟުވާން ރަހީނުކޮށް މަރާލުމަށްޓަކައި 2014ވަނަ އަހަރުގެ ތެރޭގައި އަޙްމަދު ރިޟުވާނަށް ފާރަލައި، އޭނާ ރަހީނުކޮށް، މަރާލުމުގައި އެހީތެރިވެދީފައިވާތީކަމަށް ޕީޖީން ވިދާޅުވެއެވެ. ދެން އޭނާގެ މައްޗަށް ދަޢުވާ ކުރަނީ ބްލޮގަރ ޔާމީން ރަޝީދުގެ ބްލޮގްގައާއި ސޯޝަލް މީޑިއާ ޕްލެޓްފޯމްތަކުގައި އިސްލާމްދީނާ ފުށުއަރާ ވާހަކަތައް ލިޔެ ޕޯސްޓުކުރަމުން ގެންދާކަމަށް ބުނެ، 23 އޭޕްރީލް 2017 ދުވަހުގެރޭ އަނިޔާވެރިގޮތަކަށް ޔާމީން ރަޝީދު މަރާލުމަށްޓަކައި، 2017ވަނަ އަހަރުގެ ތެރޭގައި އޭނާއަށް ފާރަލައި، މަރާލުމަށް އެހީތެރިވެދީފައިވާތީކަމަށްވެސް ޕީޖިން ވިދާޅުވެއެވެ.

ރިޟުވާން ގެއްލިފައިވަނީ 2014ވަނަ އަހަރުގެ އޯގަސްޓް މަހުގެ ތެރޭގައެވެ. ހުޅުމާލޭގައި ދިރިއުޅޭ ރިޟްވާން، 2014ވަނަ އަހަރުގެ އޮގަސްޓު މަހުގެ ހަތް ވަނަ ދުވަހުގެ ރޭ ދަންވަރު 12:45ހާއިރު، ހުޅުމާލޭ ފެރީ ޓާމިނަލުން ޓިކެޓު ގަނެގެން ފެރީއަށް އެރުމަށް ދާ މަންޒަރު މާލޭގައި ހަދާފައި ހުންނަ ހުޅުމާލެ ފެރީ ޓާމިނަލްގެ ސީސީޓީވީ މަންޒަރުތަކުން ވަނީ ފެނިފައެވެ.