ކުރިއަށް އޮތް ރާއްޖޭގެ ފުޓްބޯޅަ ސީޒަނުގެ މެޗުތަކުގައި ފަސް ކުޅުންތެރިން ބަދަލުކުރެވޭ ގޮތަށް ހެދުމަށް ކްލަބްތަކުގެ މެދުގައި ކުރެވުނު މަޝްވަރާތަކުގައި އެގޮތަށް އެކަން ކުރުމަށް ތާއީދެއް ނުލިބުނު ކަމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.
އެފްއޭއެމުން ވަނީ މިކަމާ ބެހޭ ގޮތުން ވަކިވަކިން ވެސް ކްލަބްތަކުގެ ވިސްނުން ހޯދައިފައެވެ. މި ހަފްތާގައި ބޭއްވި ބައްދަލުވުމުގައި ފުރަތަމަ ޑިވިޝަނުގެ އަށް ކްލަބްގެ ތެރެއިން ފަސް ބަދަލު އޮންނަ ގޮތަށް ހަދަން ތާއީދުކުރީ ތިން ކްލަބަކުންނެވެ. އަނެއް ފަސް ޓީމުން ބޭނުންވީ ކުރިން ވެސް އޮންނަ ގޮތަށް ތިން ބަދަލުކުރެވޭ ގޮތަށް ކުރިއަށް ގެންދިއުމަށެވެ.
އެފްއޭއެމްއިން ހާމަކޮއްފައިވާ ގޮތުގައި އެ ފުރުސަތު ކްލަބްތަކުގެ އަތްމައްޗަށް ދޫކޮށްލީ ފުޓްބޯޅައިގައި އެހެން ގައުމުތަކުގައި ވެސް މި ނިންމުން ނިންމަނީ މެޖޯރިޓީ ކްލަބްތަކުގެ ތާއީދު އޮތް ގޮތަށް ކަމަށްވާތީ ކަމަށެވެ. ގާތްގަނޑަކަށް އަށް މަސް ދުވަސް ފަހުން ފުޓްބޯޅަ މެޗުތައް އަލުން ފަށާއިރު ކުޅުންތެރިންގެ ފިޓްނަސް މައްސަލަތަކަށާއި އަނިޔާގެ ކަންތައްތަކުން ސަލާމަތްވެ ތިބުމަށް ފަސޭހަގޮތްތަކެއް ބޭއްވުމުގެ ގޮތުން ފަސް ބަދަލު ކުރެވޭ ގޮތަށް ހަދަން ކްލަބްތަކުގެ ހިޔާލަށް ހުޅުވާލީ އެފްއޭއެމުންނެވެ.
ރާއްޖޭގެ ފުޓްބޯޅަ ސީޒަން ފަށާނީ އަންނަ އަންގާރަ ދުވަހު މާޒިޔާ އާއި އީގަލްސް ކުޅޭ ޗެރިޓީ ޝީލްޑް މެޗުންނެވެ.
ކޮމެންޓު ފޮނުވާ