ރާއްޖޭގެ ވެރިކަމުގެ ނިޒާމުގެ ތެރެއިން މިހާރު ވެރިކަން ކުރުމަށް ހޮވާ މީއާއާއިމެދު ގިނަ ބައެއްގެ ނަފްތަރު ލިބެނީ އެއީ ނިޒާމުގައި ހުރި މައްސަލައެއްގެ ސަބަބުން ކަމުގައި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ގާނޫނު އަސާސީއަށް ގެންނަން ފެންނަ ބައެއް ނިޒާމީ ބަދަލުތަކާ ގުޅޭ ގޮތުން އަލަށް އުފައްދަން އުޅޭ ދަ ޑިމޮކްރެޓްސްގެ މެންބަރުންނާ އެކު މިރޭ ބޭއްވި ބައްދަލުވުމެއްގައި ރައީސް ނަޝީދު ވިދާޅުވީ ރާއްޖޭގެ ރައްޔިތުން މަލްޓިޕާޓީ ނިޒާމުގެ ތެރެއިން އެކި ވެރިންގެ ތަޖުރިބާ ކޮށްފައިވާކަމަށެވެ. ކޮންމެ ވެރިޔަކާއިމެދުވެސް ރުހޭ މީހުންނަށްވުރެ ގިނައީ ނުރުހޭ މީހުން ކަމަށާއި، މިއީ ނިޒާމުގައި ހުރި މައްސަލައެއްގެ ސަބަބުން ދިމާވާ ކަމެއްކަމަށެވެ.

އަޅުގަނޑުމެން ކޮންމެ މީހަކު ލީމަވެސް ގޯސް މިވަނީ. އަދި ރަނގަޅު މީހަކު ވަތް ކަމަކަށް ނުވޭ. އެހެންވީމާ އަޅުގަނޑުމެން މިއުޅެނީ ގޯސް މީހާއަށްވެސް ރަނގަޅު ކަމެއް ނޫންކަމެއް ނުކުރެވޭނޭ ނިޒާމެއް ތައްޔާރުކުރުން. އަޅުގަނޑުގެ މުޅި ހަޔާތް މިދަނީ މިކަމުގަ. ރަނގަޅު މީހަކާއި ދިމައެއް ނުވޭ. ވަރިހަމަ ގާތް ރަހުމަތްތެރިއަކަސް. ވަރިހަމަ ކޮންމެ މީހަކަށްވިޔަސް. އަޅުގަނޑަށް ފެންނަ ފެނުމުގައި އަޅުގަނޑެއް ނޫޅެން މިހާރު ރަނގަޅު މީހެއް ހޯދާކަށް. ވަރަށް ގިނަ މީހުން ބުނޭ އަޅުގަނޑު ރަނގަޅުކަމަށް. އެހެން ނަމަވެސް އުޅޭނެ ހަމަ އަޅުގަނޑާ މެދުވެސް ނުރުހޭނެ މީހުން.

– ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ރިޔާސީ އިންތިޚާބުގެ ކުރިން ޑިމޮކްރެޓުން ނިޒާމަށް ގެނަން ބޭނުންވާ ބަދަލުތަކުގެ މަޝްވަރާކޮށް، ޤާނޫނު އަސާސީއަށް ގެންނަން ފެންނަ އިސްލާހުތައް ގަނޑަށް ތިރިކޮށް ނިޒާމު ހަރުދަނާ ކުރުމަށް ކުރަންޖެހޭ ކަންކަން ރައްޔިތުންނާއި ހަމައަށް ހުށަހެޅަން ޖެހޭކަމަށެވެ. ޑިމޮކްރެޓުންވެސް އަދި އެހެން ޕާޓީތަކުންވެސް އިސްކަންދޭންވީ ނެރޭ މީހާއަށްވުރެ ބޮޑަށް ސިޔާސަތަށް ކަމުގައި ރައީސް ނަޝީދު ވިދާޅުވިއެވެ.

އަޅުގަނޑު ދެކޭ ގޮތުގައި ކުރިއަށް މިއޮތް ހަފްތާއެއް، ދެހަފްތާއެއް ތެރޭގައި އަޅުގަނޑުމެން ހުށަހެޅުމެއްގެ ގޮތުގައި މިކަން އެބަހަދަންޖެހޭ. އޭރަށް އިންތިޚާބަށް ދާއިރުގައި މިމައްޗަށް ބިނާވެ ޑިމޮކްރެޓުންނަށް މީހުން ވޯޓު ދިނުމަށް ނިންމާނެ ނިންމެއްކަމަށް އަޅުގަނޑަށްދެކި، ފެންނަނީ، އަޅުގަނޑަކަށް އަޑެއްނީވޭ އެހެން ސިޔާސީ ޕާޓީތައް ސިޔާސަތެއް ހުށަހަޅަން އުޅޭތަނެއް. ދެން ބައެއް ބޭފުޅުން އެބަ ވިދާޅުވޭ ކެނޑިޑޭޓެއް ނެތޭ އެހެން ޕާޓީތަކުގައި. އަޅުގަނޑަށް ފެންނަ ފެނުމުގައި ކެނޑިޑޭޓެއް ނޫން މުހިންމީކީ. މުހިންމީ ސިޔާސަތު.

– ރައީސް ނަޝީދު ވިދާޅުވިއެވެ.

ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަށް ބަދަލު ކުރުމަަކީ ރައީސް ނަޝީދު އަބަދުވެސް ވަކާލާތު ކުރާ ގޮތެވެ. ރައީސް ނަޝީދު ވަނީ މިވެރިކަމުގެ ތެރެއިންވެސް އެކަން ކުރުމަށް ރައީސް ޞާލިހަށް ބާރު އަޅުއްވާފައެވެ. ނަމަވެސް ރައީސް ޞާލިހު އެކަމަށް އެއްބަހެއް ނުވިއެވެ. ރައީސް ނަޝީދު މިރޭވެސް ވިދާޅުވީ ދުނިޔޭގެ ބޮޑެތި ގައުމުތަކުގައި މިނިޒާމު އޮތުމުން ވެރިމީހާއަށް ބޭނުންހާ ގޮތެއް ހަދަން ބޭނުން ވަގުތެއް ނުލިބޭނެކަމަށެވެ.

ރައީސް ނަޝީދު މިސާލު ނެންނެވީ އިނގިރޭސި ވިލާތުގައި ކޯވިޑްގެ ތެރޭގައި ދިމާވި ކަންތައްތަކާއި ގުޅިގެން އެޤައުމުގެ ބޮޑު ވަޒީރު ބޮރިސް ޖޯންސަން އިސްތިއުފާ ދޭންޖެހުނު ހާދިސާއަށެވެ. ރައީސް ނަޝީދު ވިދާޅުވީ އެއީ ނިޒާމު ރަނގަޅުވުމުން ގޯސް މީހާވެސް އަދި ރަނގަޅު މީހާވެސް ޢަމަލު ކުރާނެ ގޮތްކަމަށެވެ.