ރައްޔިތުންގެ މަޖިލީހަށް ސިފައިން ވެއްދުމުގެ އިޚްތިޔާރު މަޖިލިސް ރައީސަކަށްވެސް ނޯންނާނެކަމަށް 18 ވަނަ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެއެވެ.
އަމީތު މިހެން ވިދާޅުވީ މަޖިލީހަށް ސިފައިން ވެއްދުމާއި ނުވެއްދުމަކީ މަޖިލީހުގެ ރައީސްގެ އިހްތިޔާރުގައި އޮންނަ ކަމެއްކަމަށް ވިދާޅުވެ މަޖިލީހުގެ ރައީސް މުހައްމަދު ނަޝީދު ކުރެއްވި ޓުވީޓަކާއި ގުޅިގެންނެވެ. ނަޝީދު މިޓުވީޓު ކުރެއްވީ ރައްޔިތުންގެ މަޖިލިސް މިއަދު ބޭނުން ގޮތަކަށް ހިންގުމުގެ މިނިވަންކަން އެބައޮތް ކަމަށާއި އެތަނަށް މިސަރުކާރުގައި "ސިފައިން ވަދެ ނުހުއްޓުވާ" ކަމަށް ރައީސް ސޯލިހް ރޭ ވިދާޅުވެފައި ވަނިކޮށެވެ.
ރައީސް ޞާލިހު މިހެން ވިދާޅުވީ 18 ވަނަ މަޖިލީހުގައި އޭރުގެ ރައީސް ޔާމީނާއި ދެކޮޅަށް ތެދުވި 12 މެމްބަރަކު މަޖިލީހުން ނެރުމަށް ސިފައިން މަޖިލީހަށް ވައްދައި ހިންގި އަމަލުތަކާއި ގުޅިގެންނެވެ. ރައީސް ނަޝީދުގެ ވާހަތަކާއި ގުޅިގެން 18 ވަނަ މަޖިލީހުގައި ސިފައިން އެތައް ފަހަރަކު ގަދަމުން މަޖިލީހުން ނެރުނު މެމްބަރުންގެ ތެރޭގައި ހިމެނޭ އަމީތު ވިދާޅުވީ މަޖިލީހުގެ ތެރެއަށް ސިފައިން ވެއްދުމުގެ އިހްތިޔާރު މަޖިލީހުގެ ރައީސަށް އޭރުވެސް އަދި މިހާރުވެސް ނޯންނާނެކަމަށެވެ. އެއީ ޤާނޫނީ ބޮޑު ކުށެއްކަމަށް އަމީތު ވިދާޅުވިއެވެ.
ރައްޔިތުންގެ މަޖިލީހަށް ސިފައިން ވެއްދުމުގެ އިޚްތިޔާރު މަޖިލިސް ރައީސަކަށްވެސް ނޯންނާނެ. އެގޮތަށް މިހާރުގެ މަޖިލިސް ރައީސަށް ހީކުރެއްވޭނަމަ އެއީ ވަރަށް ނުރައްކާތެރި ކަމެއް. މަޖިލިސް ރައީސްގެ ހުއްދަ އޮވެގެންކަމަށް ބުނެ އޭރުވެސް ކުރީ ގާނޫނީ ބޮޑު ކުށެއް. އެކުށްކުރި ފަރާތްތަކާއި ހަމައަށް ގާނޫނުގެ ދިގުއަތް ފޯރާންވެސް ޖެހޭ.
– އަމީތު ވިދާޅުވިއެވެ.
2017 ވަނަ އަހަރު ތެރޭގައި އޭރުގެ އިދިކޮޅު ކޯލިޝަނާއި ގުޅިވަޑައިގަތް 12 މެންބަރުންގެ ތެރޭގައި އަމީތު ހިމެނެއެވެ. އެއާއެކު އެ 12 މެމްބަރުންގެ ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅިއެވެ. އަދި އޭގެ އަހަރެއް ފަހުން އެ 12 މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމިއެވެ.
