އެފްއޭއެމް އާއި ރާއްޖޭގެ ފުޓްބޯޅަ ރިފޯމް ކުރަން ގޮވާލައި ފެށި ހަރަކާތުގައި ގިނަ ކްލަބުތަކުން ބައިވެރިވާނެކަމަށް ބުނި ނަމަވެސް އެއްވެސް ކުލަބަކުން މިހަރާކުގެ ފުރަތަމަ ބައްދަލުވުމުން ނުފެނުނެވެ.
ނިމިދިޔަ ސާފް ޗެމްޕިއަންޝިޕްގައި ރާއްޖެ އަށް ކުރިމަތިވި ނާކާމިޔާބާ އެކު ރާއްޖޭގެ ފުޓްބޯޅަ ބަދަލު ކުރަން ޖެހޭ ކަމަށް ގޮވާލައި ސޯޝަލް މީޑިއާ އާއި ވައިބާ ގުރޫޕްތަކުގައި ކަންބޮޑުވުން ފާޅުކުރުމުގެ ތެރެއިން އުފަން ކުރި "ސޭވް އެފްއޭއެމް" ކެމްޕޭނުގެ ފުރަތަމަ ބައްދަލުވުން ރޭ ވަނީ ޝީ ބިލްޑިންގެ ސެމީނާ ރޫމްގައި ބާއްވަފައެވެ.
"ސޭވް އެފްއޭއެމް" ގެ ލޯގޯ ޖެހި ޓީޝާޓް ލައިގެން ކުރީގެ ކުޅުންތެރިންނާއި ފުޓްބޯޅައިގެ ކުރީގެ ބައެއް ހިންގުންތެރި ތިއްބެވެ. މި ބައްދަލުވުން ލީޑު ކުރެއްވީ ގައުމީ ޓީމުގެ ކުރީގެ މެނޭޖަރު އިބްރާހީމް އާމިރު (ސަލްސާ)އެވެ.
މި ބައްދަލުވުމުގެ ބައިވެރިން ވަނީ ރާއްޖޭގެ ފުޓުބޯޅަ ކުރިއެރުވޭނެ ގޮތްތަކާ މެދު މަޝްވަރާ ކޮށްފައެވެ. އަދި އެފްއޭއެމަށް ގެންނަން ޖެހޭ ބަދަލުތަކާއި ގުޅޭގޮތުންވެސް ވަނީ މަޝްވަރާކޮށްފައެވެ. އަދި ސޭވް އެފްއޭއެމް ކެމްޕޭން ފުޅާކޮށް ކުރިއަށް ގެންދެވޭނެ ގޮތްތަކާ މެދުވެސް ވަނީ މަޝްވަރާކުރެވިފައެވެ.
ސޭވް އެފްއޭއެމްގެ ނަމުގައި ކެމްޕޭނެއް މި ފަހަރު މި ފެށީ، ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖޭގެ ގައުމީ ޓީމުން ބޮޑު ނާކާމިޔާބީއަކާ ކުރިމަތިލާން ޖެހުމުންނެވެ. އެގޮތުން މި މަހު އިންޑިއާގެ ބެންގަލޫރުގައި ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތުގެ ގްރޫޕް ސްޓޭޖުން ރާއްޖެ ވަނީ ކަޓައިފައެވެ. މިިއީ މި މުބާރާތުގައި ރާއްޖެ ބައިވެރިވި ފަހުން ރާއްޖެއިން މުބާރާތުގެ ގްރޫޕް ސްޓޭޖުން ކެޓި ފުރަތަމަ ފަހަރެވެ. އަދި މި މުބާރާތުގައި ރާއްޖެއިން ވަނީ 20 އަހަރަށްފަހު ބަންގްލަދޭޝް އަތުންވެސް ބަލިވެފައެވެ.
މިހަރަކާތުގައި އެފްއޭއެމްގެ ދަށުން ހިންގާ ގިނަ ކްލަބްތަކުން ބައިވެރިވާނެކަމަށް ބުނި ނަމަވެސް މިބައްދަލުވުމުގައި އެއްވެސް ކުލަބެއްގެ ބައިވެރިވުމެއް ފެނިފައި ނުވެއެވެ.
